Pucuak bulek, urek tunggang

Pucuak Bulek, Ughek Tunggang

oleh Hanafi Risa pada 04 Agustus 2011 jam 13:22

‎"Baghontilah manangih! Ten ceneang babunyi ha, ghodi bisuak pek jalan gak nyeah!" Oncu Sina mangecek. Adiek den nan ketek, nan den patangihi cako, lansuang baghonti. Yobona joleh suagho lonceang daghi jalan lobuah baguguah. Pastilah ughang sughuahan walijorong gak nye reah. Pek nagoghi kami, ghodi gotong royong keah lah biaso, ampie satiok manjalang masuak puaso,. aghi ghayo, atau hari perayaan penghormatan untuak ratu di nagori kinicie angin jauah teeeen. Balando sorang pek Kumbuah nyeah, sorang pulo pek Salikih, tapi, anak buah eah; banyak. Kami takuk sadonyo. sanagoriko takuk jo Balando. Kok lalu eah ba 'ondagodang' nan bunyi eah ajak garejoh ka putuh,...kami manyughuak ka baliek batang polam.

Kekuatan magis apulo nan dikomohi nyeah dek wali jorong, residen, wedana, pulisi, ongku Buyuang Kampang, dan antek-anteknyo geah? Daghi nan tuo sampai nan mudo, daghi nan godang sampai paja ketek; takuk mandongea eah ajo,...apolagi kok basuo! Jadi, kok babunyi ceneang, jan bona indak soto gotong royong bisuak muah! Mbiek-olah den lah! Ontah kok lai rila ongok ka poi! Kughuh badan jadi ughang ghantai pek tambang Sawahlunto ten! Cubolah, kok iyo lai bagak! "Tangkeuk jo pangkua lah ba asah ieh mak-paja?" nyeah nan Mak Siri ka Oncu Sina. "Olah, dek Tuan baliek sawah bukik potang..." "Indak jadi den manggilai tobek bisuak reah; gotong royong ughang!"

Puku onam, ughang lah ghami pek lobuah. Jalan tanah indak ba aspal. Tapi, dek lai indak ado oto lalu tiok siang; jalan keah lai ancak datea eah. Oto Pit Tuan Residen, kareta angin Ongku palo, Ongku Buyuang Kampang, bendi, padeti, itu ajo nan ado baghu..... Sabontea gotong royong; jalan lah barasieh. Mak Siri, Camat Bulun, Buyuang Kentong, Amie Bilih, dan sado nan godang badan, lah tobik poluah. Ongku Wali lah manenteang kibang ba isi lopek godang-godang. Ado pulo godok ubi. Bakatumpeh tanagn makan eah! Dalam himpitan penjajah; makan lopek jo godok keah, lopeh juo tokanan batin ughang ketek-ketek!

Buyuang Kampang tibo jo Abun Kilah, tambah jo Sutan Sikikih. Paisok eah godang. Indak samo jo panduduk daun onau kami reah. Mirip jo carutu tuan Wedana. Golak eah godang. Nagori ko, inyo nan punyo! Kibang lopek lah tandeh isi eah. 'Ma lopek dek den?!" nyeah. "Abih Tuan Buyuang..." ughang nan banyak, manjawek. Pucek! Sobab salegho eah godang; lopek abih. "Jan pucek pulo kalian; kami lah manintieng bolah keen cako!" nyeah. Patuklah poghuk eah lah tabudua.... Sudahtu di kaluea an nyeah api-api daghi saku baju eah,.."Ma nyeah Abeh Kinyuk?" tanyo eah.

Abeh Kinyuk bajalan ka muko. Ajak paja ketek diimbau pak guru. Manungkuk, manengok ka Buyuang kampang, ntu manunduak baliek. "Nyuk!" Buyuang Kampang ma angkek piapi pek tangan kida eah. "Nan sero sketek Nyuk!" piapi di lauk-an Buyuang kampang ka Abeh. Sutan Sikikih takikieh dek golak. Abeh lah mangaroti ajo. Tu berarti inyo disuruah kumpulan preman reah ba sijobang, maisi kotu manjalang tangah hari. Lah biaso ajak iko, ampie tiok gotong royong! Kadang-kadang malam, kotu ba rundo pek Congkong. Ntu lah mancangkuang Abeh Kinyuk pek batu godang topi jalan. Kotak piapi lah mandocah-docah ma jadian gondang. Syair sijobang maluncua dari muncuang Abeh..."Karuak-karuak tobang marukuak mak, tobang marukuak masuak padi ndeh oiii...Lai den tau baso bontuak den buruak maaak, tapi lai ado juo nan konai atiii, ndeh oiii..." Ceh---ceh...ceh... bunyi kotak piapi mairingi...

Abun Kilah lansuang bacaruk-caruk godang. Jan ditulih pulo 'caruk' e reah lai! "Den ang sindie Beh?" nyeah. Sutan Sikikih tambah tapingkea-pingkea dek golak. Buyuang Kampang senyum ajo saketek. Senyum 'urang bagak'! Jak ikolah caro urang tajajah malopehan ati nan taimpik! Abeh Kinyuk toruh juo basijobang. Ketukan birama dari kotak api-api nan baisi satangah, mandoceh-doceh pek ateh batu, bolah ka suok tumik Abeh. "Kocieng bolang baranak bolang mak oiii,...manciluk korak di ateh pagu deh kanduang oiii....Dalam ati den yo bona sayang mak oiii,....ka di katokan sabonea raguuuu...ondeh lah kanduang oiii,...."

Amin muak ajo poghuk eah nengok pertunjukan keah. Di ansua eah togak, parmisi, pulang. Aghi iyo lah ampie pulo talu-u. "Tungkai, ka ma ang?" Abun Kilah maimbau. Amin badan eah kughuh. Kodpk dikatoan ughang inyo amin Tungkai. Nyo kok poi ka Tanjuang Ongik, bajalan ajo jauah daghi umah eah, ten poi mangaji pek sughau tobieng. Amin manengok salinteh ka Abun Kilah. Golak ketek ajo eah, sambie parmisi, "pulang lah den dulu Da Bun," nyeah. "E, kniaklah ang dulu! Ughuk pungguang den stek. Lotieh wak gotong royong keah!" Abun maimbau. Ontah maimbau, ontah manyughuah, ontah mamarentah, ontah manzalimi. Tasoghah kalianlah! Padahal, dek kecek-an bona sabonea eah, Abun ndak soto tio mamangkua do; togak-togak ajo eah ajak mondua nyeah!

Amin mangobek-an kain saruang eah ka pinggang. Baju guntieng cino eah lah pudua rono eah. Kapiah-beka lah mangalupeh pulo topi-topi eah. Bajalan eah ka Iban Kilah, di pogangannyeah bahu Iban duo kali. Sakadar jan bongih ajo eah. Ntu nyo bajalan manjinjieng pangkua, pulang. "Eee, iyo lain pogangan ughuk tangan ughang sughau keah ieh?.." Iban Kilah kombang liang iduang eah. Amin golak ketek ajo salapih! Kaki kughuh eah bajalan manjauah. Tapi, ontah baa pulo ajak eah; Buyuang Kampang manjawea tanah pamangkua-an sudah gotong rayong cako, ntu digodoh-an nyeah ka kuduak Amin daghi lakang. Dek Amin ba badan kughuh, baju lapang pulo, tanah sabingka reah masuak ka dalam baju eah. Ntu takojuk Amin reah; madok eah ka lakang. Buyuang Kampang, Sutan Sikikih, Iban Kilah, nan lain-lain, takikik dek golak. " Tumun Sunguk meah Min. " Buyuang kampang mamalik-an kojo eah ka Tumun. Tumun, nan duduak bolah ka topi, ontok ajo. Iyo ndak lomak dimain-mainan ughang pek nan ghami ke reah. Tapi, ca pulo nan tolok malawan ka Buyuang kampang? Ughang bagak , kawan orek Upeh Bulando?

Ari paneh badongkang. Abeh toruhjuo basijobang. Dektakuk ka Buyuang Kampang. "pupuk sarunai mancabiek dado nak dagang..." Dan Amin mangalucuh pulang. Tumun Sunguk tamonuang soghang. Mancoliek tapi indak mamandang. "Kambie mudo baliek lobuah tu ha, lobek tandan batandan" Sutan Sikikih tangadah. Sambie manoguak ludah. Lansuang nyo mamarentah. "Panjek Mun!" Tumun lunglai sudah! Manyumpah-nyumpah!

Kambie lah turun duo tigo. Sutan Sikikih lansuang mambolahnyo. Buyuang Kampang mananti sajo. Iban Kilah maambiekkannyo. Tumun Sunguk bacaruk-caruk. Sowa jo baju diponuhi somuk. Ka mailak badan tasangkuk. Gigik garonggo tambah manjujuk! Eh lah !!!

Mak Siri batansua pulo pulang. Pangkua tangkeuk lah basandang. Tibo pek iko inyo tabalolang. Kambie nyo, ba dek lah baganyang....... "Ba dek ba ambiek kambie den Sutan?" nyeah. "E, mooh an ajolah Siri. Ko kami auh bona sudah bakojo. Panambah-nambah pahalo Siri di akhirat isuak..." Sutan Sikikih manjawek. Tumun lah basicopek ajo maluncua turun. Rauh-rauh siku jo botih eah. Asailah! Buyuang Kampang lansuang pulo mangecek,"Ambieklah gak satandan lai Mun! Indak ado tio ughang nan ka bongih reah. Kok ado nan buruaksumbek biko, jo den inyo ba adok-an!" Sangajo dikoreh-an nyeah kecek-eah dek Buyuang, supayo tangoran dek Mak Siri. Lah mauruk dado ajo Mak Siri, sambie ma ansua langkah pulang. Ten, Oncu Sina, lah masak nasi jo ikan paweh eah goran?

Mak Siri mungkin iyo lah godang copak eah makan jo Oncu Sina gak nyeah. Tontu iyo, badan lotieh sudah bakojo pek lobuah, yo ndak? Tapi Amin Tungkai, lah bajalan madok ilie, ten ka Padang Jopang.. Sambayang luhua jo makan sangenek pek umah eah, ntu nyo lah toruh ajo lalu ka lobuah kampuang. Tuak Putiah, kawan inyo samo mangaji, lah bitu pulo. Siang sampai sonjo biko, Tuan Guru pek sikola agamo inyo keah, mintak tolong batanak nasi agak banyak; mambuek gulai paku, silomak jo sarikayo bagai. Kecek Tuan Guru potang, ado pertemuan malam biko. Amin jo Tuak Putiah indak batanyo bona, sia ajo nan ka datang do. Tapi kalau Tuan Guru mambuek hidangan ajak iko, mungkin kawan-kawan Baliau dari jauh nan ka tibo. Dulu, wakotu Inyiek Burhan dari Batuhampa tibo; ajak iko pulo Amin mamasak idangan jo kawan-kawan nyo.

Sasudah tugorik, lah badoa , lah sambayang sunat, Tuan Guru lah duduak pek muko. Kawan-kawan nan lah tibo duduak ba kalilieng. Amin tau beberapo dari nan lah tibo. Sadonyo pangulu nan lai kodok ka masojik. Ado Tuak Manso, Tuak Tan baro, Tuak Mongguang, tuak Patieh dll. "Lah tambah zolim Bulando takah eah Tuan...." tangoran dek Amin salah sorang mamulai. Amin duduak juo sambie ba zikir. "Kobea nyo, anak buah Angku Ibrohim nan pek mudiek lah ditangkok-i di Silungkang..." kecek nan sorang lai. "Nan ajak iko, indak bisa di adok-i sorang-sorang do. Iyo harus basamo-samo awak..." jawek Tuan Guru. 

"Pek Limbonang, komih potang, tambah kurang ajea parangai urang tu Guru. Ba bao padusi gilo dari Sawahlunto, ka ateh umah bulek reah. Lah ajak anjieng Tuan Wedana jo Upeh pek itu. Pareman awak keah soto pulo ...kiamat nagori lai ko Tuan.." Tuak Manso manambah. Mimik wajahnyo yobona ibo. Ibo bacampue bongih.

"Wak nanti Baliau tibo sabontea lai. Wak mufakat-kan baa nan rancak,..." Tuan Guru manjawek. Dan olun salosai bona kato-kato tuan Guru reah lai; lah tangoran ajo kudo maringkiek pek laman. Sado nan pek dalam longgea ko, togak bulu kuduak eah. Bunyi kudo, duo macam ajo nyeah. Kudo Bulando, sudah tu kudo Tuanku Nan Biru!

"Assalamu'alaikum..." suaro sojuak tangoran dari luea. Sado nan pek dalam, lansuang cerah oman eah. "Tuanku Nan Biru!" Ca pulo nan indak tau jo namo iko? Urang tanamo maso itu. Partamo, ilemu ugamonyo tinggi. Kaduo, kalau nyo bajalan, susah ditorangan jo aka; sobab , kudo nyo bisa balari koncang, ma ambua dari sawah ka ladang, dari bukik ka gunuang, sainggo indak tolok dek Bulando manangkoknyo do.

Tuan Guru jo nan lain-lain, copek manyambuk ka pintu. Basalam-salaman! Bapoluak-poluak! Amin soto pulo palieng kadian. Ondee, ajak iko raso tangan Tuanku Nan Biru? Salamnyo orek, ajak mangalie sojuak ka dalam jantuang! Raso barubah jadi dusanak kanduang rasonyo! Ontah ilemu a pulo nan dipakai Tuan keah,......sojuak, lombuk, tulus,.....

Tuan, Ongku, Datuak-Datuak reah lah bakumpua pek ampieng mihrab. Amin indak soto do; nyo manjopuk idangan ka dapua. Tapi sakileh, lai nampak juo, urang reah bacarito serius bona. Takah-takahnyo, Angku Nan Biru jo Tuan Guru, sapokat indak bagabuang jo Angku Ibrohim Mudiek. Sobab Angku Ibrohim Mudiek marekrut sado pemuda dari sambarang latar balakang; asa lai omuah bajuang untuak nagori, pareman galadia ndak baa do. Itulah sobabnyo, ado nan bakhianat, sainggo katauan dek Balando. "Kalau inyo lai takuk ka Tuhan, bisa wak picayo Tuan, tapi kalau ka Tuhan sajo inyo indak picayo; apolagi awak-samo-awak?" kato Angku Nan Biru. Nan lain maongguak-ongguak ma iyokan. "Tuan Guru kan longkok kini ko? Lai bisa Tuan manyiapkan agak sapuluah urang sajo nan lai bisa dipacayo?" kato Angku Nan Biru. "InsyaAllah!" Tuan Guru maongguak. Iko lah ado tujuah. Tingga mancaghi tigo lai.." Jawek Tuan Guru. "Masalah sinapan jan comeh Tuan, lah kami boli di Dumai, dibao dari Singapura.." tambah Angku Nan Biru. Sudahtu nyo mangecek aluh-aluh bona, ajak ba bisiek, ndak tangoran dek Amin lai..... munbgkin dek ilemu pandongaran Amin olun sampai kiun gak nyo lai....

Nampak oman urang-urang reah masygul sadonyo. Prihatin! Tapi dek lai basandea ka Tuhan, indak nampak pulo boban borek pek konyieng Guru jo Pangulu-pangulu te reah. Tuan Guru malah bagorah ka Angku Nan Biru, "elok-elok mamogangan ondeh-ondeh reah Angku. Nyo bisa mangaliciek ntu malompek isi eah..." Angku Nan Biru senyum ketek. Nan lain golak ta tahan. Indak pulo banayk nan tamakan dek Guru jo pangulu ke reah, mungkin dek makan basamo-samo, jo hati tawaduak, nan saketek lah mangonyangan ! "Den indak bisa lamo-lamo reah Tuan. Den lansuang ka Buya Balubuh tuica keah..." Angku Nan Biru pamit. Sudah tu, basalaman bapoluak-poluak orek-orek, ntu Angku Nan Biru bajalan kaluea. Ringan! Antaro tacocah jo indak! Dalam ituangan dotiek; kudoh eah lah ilang ajo dalam kolam malam. Amin Tungkai tangango! Iyo banyak kaji nan olun dituntuk eah kigho e lai!

"Ba dek copek bona Angku reah poi Tuan Guru,..?" Amin batanyo. "Itu nan palieng bijak. Kok lamo eah pek iko; awak tabao lendo ka Salikih ten Nonyan bisuak dirantai Upeh!" Tuan Guru manjawek. Sudah tu Tuan Guru tatogun sabontea. Mamandang ka kawan-kawan nan hadir. "Baa Tuan?" Tuak Putieh batanyo. "Lah tibo eah di Balubuh, takah eah!" Tuan Guru manjawek. Ndeh, komunikasi a pulo nan tajadi antaro ughang keah? Amin Tungkai tambah tangangak! Subhanallah!

Pagi-pagi, salosai sambayang subuah jo tadoruh, Tuan Guru mamintak ka murik-murik eah untuak latihan. Tapi indak jak nan biaso do; tompeknyo di dalam ruang kelas. Biasonyo pek laman balakang, pek bawah umpun botuang ten. Iko latihan tambahan, jadi di dalam ruang ajolah. Bangku baraja basusun ka topi. Ruang nan indak godang bona reah, lah licin dek Amin, Leman, Tuak Putiah dan lain-lain baganti-ganti bagoluk. Sudah minum kawah pagi, Amin baliak ka mudiek. Jalan bairieng-irieng jo Tuak Putieh. Peng simpang Pajak Congkeh, Tuak Putieh lah mangelok ka kida; Amin toruh juo ka mudiek. Iko ari nonyan. Jadi ari pokan pek Salikih. Ajak nan biasonyo, Amin ka pokan manjalang tangah ari, sambie mambao kotak pakakeh mangguntieng obuak. Bangku lipek dari kayu, ciek. Lah ba sandang madok mudiek. Nyampang lalu padeti, nompang jo padeti. Kok lai dapek bendi, copek tibo pek pokan. Kadang-kadang, sambie mambao pakakeh guntieng obuak, Amin mambao kambie bagai satanjua duo tanjua, panambah-nambah piti balanjo. Ajak itulah Amin ba usao, maiduk-i mayai jo adiek eah nan padusi. 

Tapi agak aneh juo Nonyan sakali keah. Ba dek agak longang ajo pokan keah? Lah togak bangku kayu, lah babukak kotak pakakeh guntieng, lah ba isi aie pancxuci oman ughang ka dalam kaleng, ...baru maota kawan sabolah. "Agak angek situasi Min," nyeah. "Ba pulo ajak eah?" tanyo Amin. "Ado anak buah Upeh Balando 'konai' pek Balubuh malam cako, kobea eah!" "Konai baa pulo?" "Konai geok! Sssst, Ongku Nan Biru!" "Hah, baa carito eah?" "Longgea Buya Balubuh dikopuang eah. Ssst, Angku Nan Biru! Lopeh! Duo Upeh nan konai. Pagi cako ba kubua-an moik eah. Urang Kubang Tungkek jo Tanah Mati kobea eah..." "E, patuk dek indak banyak ughang nan kaluea ka pokan tu?" "Ho-oh! Angku Nan Biruuu..hiii!" Amin taontok. Tabayang dinyo, kajadian manjalang tuica malam cako pek Longgea Tanjuang Ongik. Angku Nan Biru,.....hiiii; pasti lobam-lobam ijau moik e reah! Pasti! Lah tasobuk dalam antero nagori keah, musuah Balando nomor satu reah Copek ilang, copek pulo tibo eah! Kok mangonai 'tangan' eah; ijau kabiru-biruan!

Ha, yobona sanak! Lah lalu Upeh sarombongan jo keta angin madok ka ilie! Wedana mungkin lalu pulo jo motor guduh-guduh eah gak nyeah bontea lai geah! Ntah! Dobok-dobok ajo daghah! Angku Nan Biruuuu, hiii!!!

Duh-guduh-duh-guduh-duh! Motor piet tuan wedana Salikih lah lalu madok ilie. Oman eah bakoruk-koruk. Ajak ughang konai gigik salimbado. Atau ditukak pambutuang! Gas motor eah bapunta-punta sajadi dek koncang. Gabuak jalan indak ba aspal, tobang kateh udaro. Urang nan bajalan pek topi, lah mailak ajo ka jalan kareta api. Jalan kareta api Pikumbuah - manggani, untuak mambao galian tanah manganduang omeh. Ontah iyo omeh ajo, ontah ado nan lai bagai isi eah..... Sampai pek Pikumbuah nyo lansuang malapor asisten residen, Tuan Frederick, baso ado duo anak buah polisi nan 'konai geok' malam cako pek Balubuh. Asisten Residen reah tamonuang. "Mayat itu orang biru-biru?" selidik eah. "Beetul Tuan,.." jawek Wedana. "Angku nan Biru itu orang! Godverdom!" Ntu nyo bamonuang pulo baliek. "Saya heran sama pribumi mudiek itu; penghulu adatnya tak bisa dipisah dengan kaum surau! Malah pengulunya yang jadi pengurus masjid. Coba cari akal untuk mengadu domba..." nasehat asisten residen reah ka Wedana. "Tuan Wedana!" "Ya Tuan ..." "Pastikan tambang 'emas ' Manggani dan rel kereta api tidak ada masalah!" "Ya Tuan , ya..." Wedana maongguak-ongguak. Nyo tau bona, iko jalur ekonomi Balando strategis.

Buyuang Kampang, Iban Kilah dan Sutan Sikikih kini dapek tugas baru basamo upeh-upeh nan lain. Cibuak-cibuak-an karajo urang di masojik, musola, longgea, sikola agamo dan sejenisnyo. Pilieh pangulu nan lai dapek diboli, jo apo sajo, bao bakawan. Iko bisikan Wedana bona keah. Ado guldennyo sketek dibaliek iko! Ntu okok cerutu sa slove. "Kaji manurun tu Tuan Wedana!"nyeah nan Buyuang Kampang. "Itu..., sekolah ugama yang di Padang jopang, awasi Yung. Sepertinya diam, tapi bergerak! Buktinya Darul Funun; kita sudah buat aturan sekolah ugama tidak boleh di pinggir jalan raya ha, tapi di pinggir sawah jauh dari keramaian, tapi itu Syehk berdalih, sudah di pinggir sawah...." kato Wedana. "Tuan Wedana, jo Buyuang nyak indak ado ijuak nan basogea do Tuan, picayolah!"

Di lakang longgea Tanjuang Ongik, Tuak Patieh lah sibuk mangokang-ngokang sinapan. Ba bao jo padeti daghi Harau potang. Oncu Rohana nan manjujuang bacampua jo kayu bakea untuak batanak daghi Limbonang. Oncu Rohana  keah nan manjua kacemuh bolah ka suok umah bulek pokan Komih. Umah eah pek ampieng Paghik Dalam.

Tuak Patieh jo Amin Tungkai nan manjopuk ka umah Oncu reah tongah malam. Untuang lai indak basobok jo ughang ghundo! Nan jadi masalah kini keah, paluru eah indak banyak do; lai bisa dibuek pek Sungai Puea paluru keah? Ca nan lai ka bisa poi kiun? Ca pulo nan lai omuah mangojoan diam-diam? Sobab, kalau katauan, bedo kaji! Kandang Situmbin pek Salikih atau Pikumbuah nan ka mananti! Lai tolok lolok jo ongik, ta ciik dalam biliek, makan jo ubi, bakojo daghi pagi lanteh sonjo? Kok indak padek ati, jan lai!

Leman nan lai padek ati eah poi ka Kiktinggih. kato Tuan Guru, singgah di mahsikola Ompek Angkek Canduang, tomui Rasyidi. Inyo biko nan ka mambantu ka Sungai Puea. Leman lah biaso poi ka Kiktinggih, sobab mamak eah tingga di Lampuang. Itulah sobabnyo, pagi-pagi kolam, Leman lah mangulucuh poi ka ilie. Piti sagumpa dalam uncang bolah ka dalam baju guntieng cino eah. Untuanglah, dek lai ditolong Tuhan, indak disalak anjieng inyo pek Simpang Mungka do.

Manjalang taluu, lah tibo eah pek pasea Kumbuah. Makan ciek lu! Lai ado pajak nasi manjua goreng boluk jo pongek daun kacang. Tu iyo tobik poluah pek konyieng dek makan reah! Bismillah....

Sudah makan reah nyo mintak tolong ka uni nan bajaga reah,..."bolian den putas jo balerang ka toko Cino tek Uni,...." nyeah. Di agieh eah Uni reah piti sa sen,...godang bona ati Uni reah. Putas jo Balerang geah parolu pek Sungai Puea biko malam, kato Tuan Guru.

Leman pulang duo hari sasudah itu'., alhamdulillah, lai berhasil! Sa uncang kaduk godang paluru perak dalam uncak pek baliek sowa kotok Leman. Lah payah pulo manjago langkah kaki, jan kanampak-an ginjai! Disangajo Leman pulang tibo malam-malam, bulieh jan curiga pulo urang....

Jalan ketek ka Longgea Tuan Guru keah, lah apa dek Leman. Bolah ka ma nan ba lonyah, bolah ka ma nan ba bingkah, ..... E, tapi ca pulo nan pek ampieng pagea Tuan Guru marunduak-runduak reah? Ha, baduo eah!! Badobok koncang dado Leman! Baghonti eah sabontea...di tonangan nyeah ati eah. Bismillah....la haula wala quwwata illa billah.... Ma ongok agak panjang, sakali, duo kali, tigo kali...Bayangan ughang cako lah manunduak mangcek jo kode jaritangan....nan sorang lah mambuang-an aie ka pagea, nan sorang lai ma angkek ampu tangan....a makosuk e keah? Dek angin lai baombuh dari arah itu ka iduang Leman, copek tabaun minyak tanah! Ha, ka ba panggang longgea keah? Berarti indak aie nan kaluea te reah! Minyak !! 

Copek Leman ma ambua kiun! Urang nan baduo reah takojuk godang! Lansuang cigin! Tapi lompek Leman indak pulo sambarang lompek deah! Lai mangaik kaki sambie ba putea! Tasimpai nan sorang; nan sorang lai lopeh ka nan kolam! Sambie baguliang-gulieng, nyo tapokiek, ba caghuk-caghuk. Sado nan kumuah di baco eah. Leman copek mancaghi ka saimbangan ntu lansuang togak! Ughang reah lansuang pulo malompek ka nan kolam,gasosoh posoh malendo pagaghan, ..ilang! Tapi, aso-aso eah, bunyi suagho urang reah, pernah mandongea aso eah Leman...pek ma lah yo?

Tuan Guru lah togak ajo pek itu. Aluh bona 'jalan' eah! "Ang Leman?" nyeah. "Iyo Tuan Guru. Den baghu tibo... Tapi cako ajak ado nan baniat indak elok takah eah!" Leman lansuang mamogang tangan Tuan Guru, basalaman. "Lai tau den. Dek ang tibo cako, firasat den lah indak lomak. Lai ughang awak juo meah. Masuaklah. kan lai dapek?" "Lai Tuan Guru....nyak meah dalam uncang sowa kotok!"

Muhammad Soleh. Ancak bona namo eah kan? Tapi ontah ba pulo ajak eah; dek ughang kampuang, ba imbau an ajo Mat Sulah. Padahal, kapalo eah indak sulah bona tio deah. Lai agak toba obuak e nyeah, walaupun iyo togak ajak bulu landak. Nyo ba danagu pek topi sinama. Kojo eah sambarang ajo. Kadang maambiek upahan ngubak kambie. Kadang manolong ma angkukpadi. Sunguk eah jaghang, gigih iyo agak tunggieng saketek. Tunggieng tambah pulo panyogan bagusuak; jadi kunyieng rono eah. Ka dangau e reah Tuan Guru jo Amin Tungkai poi pagi sasudah makan. Cahayo matoari pagi, barasieh jatuah pek oman Tuan Guru. Tonang. Ajak aie sinama dalam. Raso eah indak copek Tuan Guru malangkah reah, tapi Amin lah basijungkik manuruk-i dari lakang.

"Assalamu'alaikum..." Tuan Guru manyapo daghi laman dangau Mat Sulah.

"Ca reah?" tadongea suaro dari dalam.

"Den Mat. Batandang taragak ajo..." Tuan Guru manjawek.

Mat Sulah kaluea. Tapandang Tuan Guru, oman eah lansuang pucek. Pucek yobona pasi. Indak obeh nan ka dikakok!

"Lai bulieh kami masuak Mat..." Tuan Guru senyum ketek.

"E, ngg, o, eh, masuak, masuaklah, Tuan Guru...ba ajak e keah ..ajak baghasian den?" Mat Sulah tagagok.

Tuan Guru manyalami Mat Sulah kotu lah duduak pek palantea dangau. Bau apiek aroma dangau bacampua kain saruang indak basosah joleh manyaruak ka iduang. Tapi Tuan Guru totap juo tonang, sajonieh aie mato aie pek ampieng masojik.

"Tolong den dih Mat. Sakali reah ajolah..." Tuan Guru bakato sudah itu.

Mat Sulah indak tolok mamandang ka oman urang nan baduo keah. Iyo inyo nan malingkuk-an minyak ka longgea Tuan Guru malam cako. Iban Kilah nan manyughuah. Dapek peres eah ciek-piah tambah daun onau sa guluang, timbakau sa lapih toba! Kini, Tuan Guru, nan kadianguhan nyeah malam cako, datang jo lombuk ati, jo elok muko... dan tibo-tibo, Mat Kilah manangkuk, sujuk ka pangkuan Tuan Guru. Manangih eah. Tasodu-sodu. Ajak paja ketek. "Moohan den Tuaaan, moohan bona deeen...."nyeah. Amin lah malengong arah ka batang kuini topi sawah ten, ndak tolok ati eah nengok reah! Diosok-osok eah kapalo Mat Sulah dek Tuan Guru. Palajaran lain pulo dapek dek Amin pagi keah. Maadok-i kejahatan jo ikhlas kabaikan...onde......masyaAllah.

Tuan Guru mamasuak-an piti sa gobang dalam saku Mat Sulah manjalang pamit. Dipaguk-paguk eah kaki Tuan Guru skali dek Mat Sulah. Tapi lai copek diangkek eah badan Mat Sulah kateh dek Tuan Guru,..."indak buliah talampau sujuk ka manusia reah Mat,..."nyeah nan Tuan Guru. Senyum eah totap juo aluh, ......

"Iyo santieng Guru Dulah keah ieh!" tibo-tibo lah tangoran ajo suagho daghi bawah batang kuini topi pamatang sawah. Hep; Iban Kilah! Iban Kilah lah togak pek itu batodiek pinggang. Obuak agak panjang, muko petak, okok putieh pek muncuang eah! Tuan Guru jo Amin lansuang manengok ka Iban. Sacopek Kilek pulo Tuan Guru mafhum! Amin lansuang takona jo parangai Iban Kilah kotu gotong royong topi lobuah.... Ba sutan di mato, ba rajo di ati! Kawan orek Buyuang Kampang jo Sutan Sikikih!

"Itu Iban Kilah reah Tuan Guru,..."Amin mangecek. Tuan Guru indak parolu menyalidik duo kali; sakali tengok ajo cako, lah joleh maqom urang reah dek Tuan Guru. Kaputusan batin copek di ambiek. nan ajak iko; indak usah dilayani. Banyak hal hal mustahak nan lain nan ka di urus! Walaupun tajam kalimat Iban Kilah indak siagak reah. Umua eah joleh jauah lobieh mudo dari Tuan Guru, tapi indak mamandang saketek tio e reah. Guru Dulah, nyeah ! Godang bona pangka lidah eah!

Dek indaK ditanggapi, nyo malintang di pamatang tompek Tuan Guru jo Amin Tungkai ka lalu. "Den konaan ka korek-an dih. Baraja mangaji ajolah pek sikola jo longgea reah. Jan dicubo-cubo pulo maambek langkah pamarentah Holland lai!" hyeah. Mato eah ajak mato olang. "Kok tongkea kalian, tapaso manyosa sampai ka anak cucu biko!" tambah Iban pulo. Tuan Guru indak bergeming. Tonang ajo. Aie dalam indak ba riak! Di nanti eah kok ado tambah kecek Iban Kilah. Dek indak ado kato nan kaluea lai; Tuan Guru malangkah ka muko. "Numpang lalu kami saketek,..."nyeah nan Tuan Guru. Pamatang sompik! Angin sinama ba ombuh ka tangah sawah. Aroma minyak wangi Tuan Guru masuak ka iduang Iban Kilah. Pana ! Dek indak nampak tando-tando malawan saketek tio di wajah Tuan Guru, lah tapaso ajo Iban mailak ka topi. Iko porang batin nampak e keah! Amin lah manuruk ajo pek lakang. Jarak-jarak tigo meter Tuan Guru jo Amin lah lansuang talewat; kaki Iban maontak ka tanah! Runtuah pamatang!!! Tuan Guru baronti, tapi indak mamandang ka lakang. Sudah itu langkah ba toruhan baliak. Qul a'uu zubirobbil falaq; min syarri maa kholaq !

Asisten Residen Kumbuah, Frederick, manalepon ka Padang. Mintak tolong bona ka Governoor, suruah Raden Mandraguno, kapalo keamanan tambang Indaruang, ka Pikumbuah. Raden reah nan manolong manumpeh pemberontakan pribumi di Jawa Barat, Banten dan Batavia. Angku Nan Biru ko kadicarikannyo lawan nan indak ka mungkin kalah. Sobab Raden keah indak tolok dek ladieng do. Ditembak Balando dulu waktu di Batavia, bulu dado jo baju eah ajo nan anguh nyeah. Paluru malantieng!

Dek lai omuah jadi kapalo ka amanan tambang Indaruang, nyo dibao Balando ka Padang. Tapi kondak eah iyo ba agieh! Bir Balando atau sakurang-kurangnyo tuwak Batak. Itu lai banyak dalam lamari makan tuan Frederick. Sagalo merek Bir Eropah, ba ungguak-ungguak datang pek Toluak Bayua jo kopea. Lah ajak minum kawah ajo dek inyo nyeah. Mabuak-mabuak saketek, biaso nye reah!

Jolong tibo Raden reah pek Stasiun Parik Rontang, lah dicaritoannyeah den Asisten Residen reah tontang Angku Nan Biru di kodai minum. "Itu orang terlalu cepat hilang ha...tapi saya yakin kamu orang pasti bisa bekuk dia." nyeah. Piti gulden lah bakobek jo kojai pek gonggaman Raden. Sambie manunduak, tapi mato manyolang tajam madok kateh, Raden reah manggarik-garik-an bibie. Sudahtu di katuk-an nyeah bibie eah. "Jangan-jangan orang itu sudah tau, saya barusan datang Tuan." kato Raden, konyieng eah bakoruk! Oman eah mamucek! Boto bir bakilek itam. Bayang-bayang putieh nampak pek boto bir ateh meja. Raden copek mamutea kapalo ka suok! Yobona! Angku Nan Biru,hiiiii........

Refleks asisten residen itu mencabuik pistol. Iyo indak ado carito eah deah; jauah-jauah marantau dari Netherland kaiko, ntu ka buruak pulo nasib tibo pek pedalaman Sumatera keah. Sorry Mom! Anak jo binyi eah ka sansaro, kalau tobik coreang arang pek muko, gara-gara Angku Nan Biru keah! Nei !!

Tapi, ikolah nan indak dalam paretongan Frederick. Tuanku nan lah lamo jadi buah bibie ekah, ajak siluman lah malompek kateh sambie salto dijontiek eah tangan asisten residen tinggih godang reah. Dan, indak disangko-sangko pulo, lomah ajo longan, siku so jari Tuan Frederick. Lopeh pistol eah, jatuah ka bawah meja! Tuanku nan Biru mandarat lombuk ajak ba per di baliek meja, kaki eah manyambea ka mangaik pistol lansuang bapindah ka tangan eah! Sacopek kilek! Dan, Tuan Asisten Residen keah tau bona bahayo nan mangancam; antaro nekad jo manggigie, di oriek-eah Raden Mandaguno. “Hajar bangsat ini!!!”

Raden reah malompek malindungi Tuan Ass Residen. ‘He, he,…sudah lamo pulo awak indak mauji kapandaian. Di Padang indak ado nan bagak. Cubo tembak dado awak ko!” nyeah manyombong. Tuanku nan Biru indak maraso bamusuah jo pribumi nan sorang ke reah. Tapi kok di ogo eah jaga, kok manyombong eah; berarti ‘lain’ makhluk nan diadok-i kini meah! Tuanku Nan Biru senyum salapih. Muncuang pistol di masuak-an nyo ka aie embe pambasuah pinggan urang pajak keah. Sudahtu lansuang di arahan nyeah ka kapalo Raden. Raden ma angkek tangan eah ka mangecek,..tapi olun ado kato nan kaluea lai; pistol lah manyalak! Bibie Tuanku Nan Biru masih bagetar maucap ‘bismillah’ jo makrifat; sudah itu, isi kapalo Raden reah baserak-serak di ateh meja ampieng boto bir. Tapi ang koba jo sanjato?

Tuanku nan Biru malosek mailang. Piti sagumpa pek pangkuan Raden jo sanjato pistol di bao eah tobang. Indak pulo parolu mampapanjang kasus do. Tingga an ajolah Asisten Residen keah jo muko pucek, sorawa basah! Kuyuah ang?!

Kajadian mamalukan iko indak bulieh bona dipublikasikan dek Tuan Frederick reah. Ca nan barani mancaritokan, awas! Konai geok!!! Manuruk pandapek Tuan Frederick, ulama Sumatera keah banyak nan gilo, indak takuk mati..!!!

Bisuaknyo, Wedana Salikih diparentahkannyo manjopuk Syehk Balubuh. Tangkok! Tuduhannyo: mengadakan rapat gelap. Melawan Pemerintah Kolonial. Subversif!  Wedana Sulikih tontulah indak omuah dicap indak loyal. Sarombongan Upeh lah siap pagi-pagi jo keta angin barangkek. Mambao borgol! Pribumi – pribumi ‘bodoh’ keah harus dihadapi jo tangan bosi! Dasar pribumi hindia olun terdidik! Konvensional! Setingkat di ateh simpanse..nyeah.

Rombongan Upeh baru tibo pek Ndonguang, urang di Balubuh lah tau. Tapi Syekh balubuh lai tonang-tonang ajo nyo, indak grasak-grusuk tio deah. Puku saboleh tangah hari, rombongan upeh reah lah tibo, malinteh simpang Kuranji toruh jalan topi sawah.  Urang lah rami pek umah syekh. Terutamo tetangga-tetangga jo murik-murik baliau. Katiko Wedana tibo jo motor piet, diiringi upeh-upeh basaragam sarowa ba saku-saku banyak, ba tungkek kayu, Syehk reah lansuang kaluea.  Wedana mamarintahkan untuak ditangkok! Syehk maangkek tangan eah sambie senyum. “Nanti sabonta. Masuaklah Tuan dulu, di dalam nyak awak mangecek..”nyeah. Dek murik-murik Syekh geah banyak pulo nan togak pek lakang baliau, agak bapikie-pikie pulo tuan wedana. Sainggo inyo satuju masuak duduak ka ruang tamu. Ditanyo eah bona dek Syekh geah, a salah baliau, dek harus ditangkok. “Tuan Syekh melawan pamarintah dan terlibat pembunuhan Opas Pemerintah..” kato Wedana. “Apo buktinyo kami malawan pamarentah? Sia diantaro kami nan mambunuah Opas? “ tanyo Syekh. Wedana bakoruk konyieng eah. Iyo ieh? A buktinyo syekh geah malawan? A pulo buktinyo mereka mambunuah Opas, sebab itu hasil’karya’ Tuanku nan Biru, nan kini ilang indak bisa dilacak kama poi eah…..

Syekh mangaroti, Wedana akan kailangan muko kalau indak mambao hasil tangkapan. Jadi di usulkannyo, kamanakannyo sajo dibao, nan masih bujang, ka Salikih. Kamanakannyo keah, lai indak ‘aie matah’ ajo pulo isi poghuk e reah! Negosiasi Syekh itu, akhirnyo ditarimo Wedana. Eh , Bulandoooo, Bulando !

Kamanakan Syekh Balubuh reah, Akmal namo eah. Ba antea an ka tahanan Asasisten residen bisuak itu dek Wedana ka Pikumbuah. Tapi Tuan Frederick sadang indak ado do. Inyo poi ka Harau jo pangawal eah. Poi manembak-nembak buruang. Sambie maubek-ubek ati. Setres eah. Pek ngalau batu tinggih reah, mamokiek eah kuek - kuek. 'Ik ben boos!!!! Ik Ben Boos !!!" Satiok inyo mamokiek, suagho eah bagema sambuk basambuk pek dindieng batu bukik. Tambah iruak rimbo dek inyo. Tambah lari buruang nan ka ditembak! Ten, pek ruang tahanan Simpang Benteng, Akmal lah tamonuang ajo soghang. "Awas kalien!" nyeah mambatin.

Sudah tu, sipir mambukak kunci pintu panjaro, setelah mancibuak-cibuak ka Akmal.  Pinggan baisi nasi ba obuh jo ubi togak tambah ikan tarubuak cikua di antea an sipir reah untuak inyo.  Aie minum dalm mok bughuak bakaghek. Sudahtu sipie reah  mangunci gembok pintu, sambie mangecek; “Jan ba aka-aka ndak kaluea, lah banyak nan mati dek biso kuku den!” nyeah.  Akmal ontok ajo nyeah. Posan mamak eah, iko ujian mental untuak naiek tingkek, ileum nan ang palajari salamo keah. Sobea ajo Akmal. Manjalang malam, batambah kawan soghang, tahanan subversive pulo. Ontah disangajo dek sipir keah ontah baa, di campua eah nan sikola agamo ajak Akmal keah jo tahanan sosialis acuah ka Tuhan. Murad Bahlil namo eah. Agak pangkek umua eah setek. Buku-buku eah saungguak.  Mato eah itam bulek. Baju kaus putieh. Indak sambayang. Malam-malam, Akmal bausao juo mambaco Qur’an agak sa halaman; pak Murad Bahlil keah ajak tekanan batin ajo mandongea.  Buang aie, Akmal olun salosai lai; nyo lah mangguguah-guguah pintu WC. Lah ajak porang dingin dalam biliek ketek geah! Dek komunikasi ‘indak sa hati’ ajak iko, ba tongkea juo kasudahannyo. Tagak dek kain basahan  -ontah sangajo ontah baa- ba ampaian pek kapalo tompek lolok Akmal. Di kipeh an nyeah dek Akmal. Madok buruak eah, lansuang ajo ba tampea! Ma pulo ka omuah Akmal! Ba ilak-an! Tambah bongih eah, di tenju godang-an nyeah! Ba kipehan pulo dek Akmal, tatenju ka dindieng! Bukannyo ondo, tambah sakik tangan tambah manyalo dado eah! Dicokiek eah Akmal! “Mintak mati ang ieh?! Tomuilah Tuhan nan ang puji-puji reah!!”nyeah. Moghieh Akmal lah dipogangan nyeah. Copek ba pocik-an jarghi nan mamogangan lihie reah dek Akmal, ba gonjua sa ontak ketek, ba putea tangan e reah ka luea; tapokiek! “Lai ba isi ang ieh? Iko nan kaiyo dek ang?!” nyeah sambie maontaman kaki! Kok indak copek Akmal begelek, iyo ghubuh salangkangan gak nyeah! Inyo talonsong ka muko, siku masuak ka rusuak eah! Lansuang bacaghuk godang eah!!!  Pinggan Loyang  di ateh lantai nan lah kosong, ditaghiek eah, ba ompehan ka kapalo Akmal.  “Pie!!!” badongkang bunyi eah. Baradu pinggan reah jo buku jaghi Akmal nan lah siap mananti! Sudah itu indak ba baso-baso Akmal lai! Bagasak ajo jo ujuang kaki ka dado, ka poghuk, ka bawah poghuk saketek,…Tapokiek, tajungkang, bacaco-caco!! Sado caghuk kaluea! Pintu kamar di guguah eah dek sipir…..”Byar..byar..byar!!”  Sudahtu lansuang baghonti arena sa babak reah……Murad Bahlil taduduak, Akmal basandea ajo ka dindieng. “Sakali lai kalian eboh, den masuak-an ka kamar setrum!” Sipir reah ma – ancam. Sudahtu nyo kaluea baliek. Akmal duduak lambek-lambek.  “Kok mati apak, lai ilang ajo ongok reah? Atau, ado partangguanganjawab ka Nan Ma Agieh ongok reah?” nyeah nan Akmal. Bahlil onieng ajo. Ontah a nan takona dek inyo. Nan joleh, lai indak pa laluan tangan eah sajak sudah itu lai!

Bisuak itu, Murad Bahlil lambek jago. Akmal jo napi-napi nan lain lah ba barih, jalan tempat, laghi-laghi sakalilieng laman dan hormat bendera kerajaan Hollad; tapi Murad tatilontang juo pek tompek tidua. Akmal masuak ka biliek, ditengok eah Murad lah domam. Manengkak-nengkak eah bajalan ka WC poi buang aie. Mato eah agak sayu. Tibo sipie panjaro kiun; ba agieh inyo ubek, ntu porsi makan eah ba agieh sayua daun ubi salain ikan taghubuak. Tapi nasi totap lombiek ba campua jo ubi togak, ajak muntah anjieng!
Sudah makan nyo lah bamonuang. Kadang-kadang malirik ka Akmal. Ibo pulo Akmal nan jadi. “Ba raso badan apak…”nyeah. Mamandang eah ka Akmal sabontea, sudah itu manakua ajo eah. Di ampingi nyeah dek akmal, ntu ditokanan nyeah bahu eah jo tunjuak, sakali, duo kali, tigo kali… “Nde iyo lah tuo den ieh Mal…” kasudahan nyeah mangecek juo eah.  “Bagha umua apak kini keah?” “Iyo lah masuak ompek puluah duo….” Diam eah sabontea.
Sudah itu, mangecek pak Murad reah baliek. “Tengok dek ang somuk pek siso nasi pinggan keah Mal. Kok den piciek, lansuang eah mati …..ca nan bakuaso nan ang geah? Deen atau Tuhan?”  “Iyo apak takah eah!” “Ba dek takah eah nyan ang?” “Kok iyo apak nan bakuaso, cubo bunuah pulo somuk nan pek luea laman panjaro ten.” “Indak mungkin  ajo pintak ang reah!” “Kok bitu, den tukea ajolah pintak den. Kok iyo apak nan bakuaso ka badan apak, mintak tolong den maontian donyuk jantuang apak gak saminik ajo. Apak nan bakuaso, atau ado Nan Lain?”

Tambah tamonuang pak Murad  reah. Tapi sabontea sudah itu ngecek eah baliek,”cubo paratian bona dek ang Mal. Kojo urang pek masojik reah. Sambayang, mangaji, dakwah, zikir. Omuah ba abih aghi. Lah sonang ajo ati eah sudah itu. Kan samo jo candu nan ang reah?” “Ho-oh.” “Ntu itu nan kadituruk-an tu?” “Indak. Jan dituruk-turuk-an pulo lai. Cari sa lah sorang!” “Indak parolu sambayang reah kan?” “Dulu Nobi saw sabolun poi Israk Mikraj, kan indak juo ado sambayang limo kotu ke reah?” “Alam keah bisa diatur jo utak awak Mal. Tapi iyo parolu urang-urang nan jenius. Ongku Ibrohim pek mudiek ten contoh eah ha!” “Ca nan palieng jenius nan apak pek dunie keah?” “Kok den baco pek buku; Einstein!” “Pak. Lai ado teori Einstein reah pek buku surau kami di Balubuh, pak. Energi tidak bisa dibuat dan hilang, hanya barubah bontuak,..nyeah.” “Iyo. Codiek pulo urang surau keah ieh?” “Kok bitu ajak eah; energi nan wak gunoan kini, paruah awak nan manggarik keah, jantuang awak nan badonyuk keah; indak ilang energi nyo do Pak. Barubah bontuak ajo nyeah. Berarti bisa dietong baliek nanti di Yaumil Akhir!Sagodang bijo bayampun!” Tamonuang pak Murad reah. “Ang patakuk-takuk-i den tu?” nyeah.
“Lai ado apak buku ilmu hayat?” “Lai! Sado buku ado den!” “Inti sel ciek nyeah kan Pak?” “Iyo!” “Jantuang makhluk, ciek pulo nyeah kan?” “Iyo!” “Kepala keluarga, ciek pulo nyeah kan?” “Ho-oh!” Wedana, Residen, Governoor, Governoor Jendral, ciek pulo kan ?” “Iyo, Iyo,” “Matoari awak ciek dalam tatasurya kan?” “Iyo. E, ba dek loweh bona lemu ang?” “Kok bitu ajak eah, pasti ciek pulo nan Bakuaso ma atur kasadonyo keah Pak. Yakin bona den!” Tamonuang pak Murad. Manakua ajo eah. Lamo. Sudahtu, ditaghiek-eah mok ba isi aie, minum eah satoguak, duo toguak, tigo toguak,…lolok eah manalungkuk!

Ten, di Pasaman Barat, Tuanku Rao lah bajalan jo kudo. Lambek-lambek. Malinteh rimbo godang. Sampai di Bonjol toruh ka mudiek. Lalu ka bukik jo lombah curam. Mancoguk pek Koto Tinggi-Puah Data. Manurun ka Sulikih, Andieng, tibo di Sipingai.  Tuanku Nan Biru, jo rombongan Tuan Guru, Syekh Balubuh bagai, dating pulo kiun. Pek rimbo ba talago, lubuak Panawea; jonji babuek. “Nyampang Bulando indak omuah manarimo tawaran politik, serangan bagilir melawan jarum jam, akan dilaksanakan. Mulai dari Payokumbuah, Bukik Tinggih, Bonjol, Tiku, Padang Marapalah, Pauah, Aie Bangih, Solok Silungkang, Pagaruyuang Lintau !”  Bukik Sipingai keah, akhirnyo basobuk jo Bukik Rao-Rao, tompek Tuanku Rao tingga babarapo hari di rimbo Lubuak Panawea.

Di kesempatan ikolah, Syekh Balubuh babisiek ka Tuanku Nan Biru, “tolong tek si Akmal, kamanakan den, di situmbin Pikumbuah…” nyeah. “Tumbal kadatangan den kiun dulu meah ieh?” jawek Tuanku Nan Biru. “Sakalian malatieh mental kamanakan den reah!” Syekh Balubuh tagolak.
Bisuak itu, lah talotak ajo surek pek meja Tuan Frederick. “Mohon Akmal dilepaskan. Jika Tuan tidak ingin terganggu malam nanti. TNB”  Asisten Residen reah gusar bona ati eah. Sado pengawal di kumpua kan nyo. Mulai dari nan Bulando asli, India, sampai ka pribumi. “Jago umah den! Rundo 24 jam!” nyeah. Pukua sapuluah malam, nyo olun juo takolok, Binyi jo anak eah lah bakoruah. Pukua saboleh mulai inyo manutuk pintu kamar dari dalam. Lansuang dikunci kuek-kuek. Sudah dikunci, nyo pareso pulo laman dari jarojak jendela. Pengawal tampak siap pek pagea ampieng jalan. Nyo baensuk ka tompek tidua. Marobahan badan. Baru tacocah kapalo ka banta, lah ado ajo urang togak pek ampieng lamari baju,…hiiii. “Belum dilepas Akmal ya Tuan?” nyeah sambie mamandang jo wajah dingin. Tuan Frederick takojuk godang! Bulu kuduak eah togak, pungguang eah dingin! “Besok. Besok dilepas. Mohon jangan buat keributan. Mohon….”nyeah, sambie duduak pek topi dipan.  Tuanku Nan Biru mambuka pintu, sudahtu ilang! Asisten Residen reah masuak ka toilet, lansuang mamokiek sakuek tanago! Godverdoooooooommmm!!!!

Pagi-pagi, kotu maantea sarapan, sipie panjaro reah, Malin Jontu namoeah, manyolami tangan Akmal. “Salamat ieh,…kaluea ang hari ko; komohi lah pakaian jo alat paragat ang!” nyeah.  Takojuk-kanjea Akmal,…dibaleh eah solam Malin Jontu orek-orek. “Yobona keah? Alhamdulillahirobbil’alamiin.” Akmal mangucap, lansuang sujuk ka lantai. “Siang biko lah bulieh kalua. Salosai cap surek-surek,”nyeah nan Malin. Sudah tu sipie reah kaluea. Pak Murad Bahlil, mamandangi Akmal takagum-kagum. “Ba dek elok nasib ang Mal?” nyeah. “Tuhan Nan bakuaso pak. Tuhan!” Akmal indak baronti-ronti batahmid. Tamonuang pak Murad. Mangaji-ngaji ajo eah nyeah, ntu sambayang tangah malam; ntu lah kaluea ajo eah! Ko lah kaluea dari garis kejeniusan idola inyo keah?
“Den mando’a ka Tuha Olah pak. Jo saponuah ati. Balombuk-lombuk. Baibo-ibo. Dalam-dalam. Indak ba bateh,….” Nyeah nan Akmal. “Lai ado idola apak nan pek mudiek reah maajea bahubungan jo Nan Palieng Bakuaso? Kok lai bisa mamintak ka Lenin atau Machiaveli reah, mintaklah kinyo…..” tambah Akmal. Iyo dalam takua oman pak Murad sakali keah. Kotu pek kamar bolah keen dulu, manjalang Akmal masuak, indak ado urang nan mambaco Qur’an sasojuak Akmal ke reah….ntu biko inyo ka poi lai! Nde, sunyi lubuak ati dek nyeah!
“Mal, indak ado urang nan ma ajai den nan ajak ang ke reah…ang tampa kuek-an hati den” Murad bacurhat. “Den indak ado ma ajai apak reah,…kok ado kato den, tindak tanduak den nan kasea, bahkan sangat kasea, moohan den dek apak..” Akmal manjawek. Ibo eah jo apak nan lobieh ompek puluah tahun keah. Padahal, buku apak keah banyak, inyo rajin pulo mambaco.  Tapi racun ‘berjuang demi rakyat kecil, dengan cara apapun’ lah talanjur masuak ka bonak eah. “Pak, lai apak baranak?” Akmal batanyo. Jauah pandang mato apak reah. “Lai. Dulu. Ketek lah den tingga an. Binyiden indak mangaroti jo nilai-nilai perjuangan reah,” nyeah. Sudah itu lah baraie-raie ajo mato eah. “Kok kaluea ang biko, tingga an untuak den Qur’an ang dih,” nyeah. Nde, jatuah ati nengok oman jo mandongea suaro e nyeah. Lansuang ajo diagiehan nyo dek Akmal Qur-an ketek nan dibao eah reah. “Untuak apak lah iko, dari Tuhan awak meah,” nyeah nan Akmal. Sudahtu, dipaguk eah Akmal. “Kok lai iduk juo anak den, mungkin lah sagodang ang pulo gak nyeah,…”nan apak reah,  ntu nangih eah. “Iyo lah banyak salah den Yuang, lah banyak…hh hks…hhh..” “Pak, Tuhan awak Maha pengampun pak, ..mando-a lah ka Den, Den kobua an, Nyeah.”  Indak di-joob eah dek pak Murad reah lai. Digigik eah ajo bibie eah.

Akmal mambaco surek pembebasan inyo hati-hati. Alasan nan tertera pek surek itu ‘tidak ditemukan kesalahan berat’ dan ‘dibebaskan.’  Lalu, pek bolah ka bawah surek reah, lah ado tandotangan Kepala Tangsi Pajakoemboeh.  Akmal manuruk ajo. Di tando tangani nyeah, sudah tu, Malin Jontu mampasilakan inyo kaluea. Basolam-solaman.
Pek teras luea, apak Akmal, pak Ismail lah togak mananti. Oman eah, cerah gembira. Pak Ismail keah urang luruh. Indak banyak gadele. Itu pulo sobab eah, Syekh Balubuh katuju inyo jadi laki adiek eah. Urang indak pa majak. Kok ka pajak, urang mamosan kopi, inyo teh ajo. Urang manduduk daun onau, inyo makan goreng pisang ajo. Urang ka pokan sampai tuasea, inyo manjalang talu-u lah baliek. Pagi-pagi nyo lah ka sawah. A pakan nasi nan di antea an amak Akmal, dimakan eah ajo. Indak mamilieh, indak mancacek. Tingga an ajolah inyo soghang pek sawah, biko lah sudah ajo sawah reah! Padiea an ajolah inyo soghang ka ladang, biko lah rimbun ajo ladang reah dek antimun, kacang panjang , ubi tolue dan lain-lain. Sambayang eah pek surau, nyo jadi makmum ajo pek saf muko. Jadi imam, urang ajolah disuruahan nyo ka muko. Walaupun bacaan qiro-ah Quran eah lai jonieh. Lai topek nahwu saraf eah, lai ancak mukhraj eah. Mungkin tagak dek itu pulo gak nyeah; indak ado pulo ughang nan omuah mampagorah-gorahan inyo. Urang ‘sungguah’ ajo!
Dipaguk eah Akmal dek apak eah. Sakian aghi indak basobok, takughuang dalam tangsi Balando, iyo lain pulo aso ati. Bak kecek Mamak eah, Syekh Balubuh, panambah-nambah ilemu  ang, nyeah. Bau baju apak eah, obeh bona dek Akmal. Bau kain kepah ba kalotik-i jo aie daun pandan. Lah apa bona, sobab tiok sambayang Jumat jo sambayang Rayo, pasti jak iko.  Tapi nan lobieh mandalam ka ati; dipaguk apak kaluea dari kandang situmbin! Nde pak, lai ado bahu tompek basandea, lai ado dado tompek baibo! Iyo agak lamo dipaguk eah apak e reah dek Akmal. Ntah baa pulo lah……

“Malah sambayang asea wak pek nsojik simpang ten, kok ka makan bagai awak dulu..” nyeah nan apak eah. Disandang eah buntie baju duo stel dek Akmal, lah ba irieng-irieng ajo eah jo apak eah ka masojik, sambayang asea. Sudah itu, makan pek pajak. Makan pek pajak! Sasuatu nan langka dilakukan apak eah ka inyo. Biaso eah, satiok inyo manyalai balanjo ka pajak kotu ketek; apak eah pasti manjoob,..”Ma abihan piti ajo nye reah, buek ajolah lopek jo amak ang, kok indak obuh ubi reah…” Kini, apak eah ka mambao makan pek pajak. Sijadieh! Piti nan ado pek saku sowa Akmal kotu masuak tangsi dulu, lah lonyap. Baru masuak ajo, lah ditariek eah dek sipie panjaro! Makan pek pajak….tabayang copak cepong biko, baduo jo apak eah, jo gulai daun ubi….

Masojik ketek pek ampieng  gareja. Gareja Bulando.  Bulando tambah babarapo urang toke pasea Kumbuah nan sipik-sipik. Pak Ismail manyuruah Akmal qomat, sudahtu lah sambayang ompek rakaat.  Mando’a jo ba zikir. Ontah ba pulo ajak eah; ado tontram nan marasuak ka dalam dado, ba jalan baduo jo apak e keah. Dilotak-an nyo tangan eah nan sabolah kida ka ateh bahu Akmal dek apak eah. “Paik bona dalam tangsi reah?” batanyo apak eah. Taontok Akmal sabontea. “Dek indak ado kabebasan; tiok sabonta konai suruah. Talambek saketek konai durek. Tapi tibo di den, basipatuah ajo…” nyeah nan Akmal. Tambah di paorek-eah tangan eah dek pak Ismail ka kuduak Akmal. Pajak nasi pribumi, lai ado juo nan babukak lai, pek topi pasea.
Lah duduak eah baduo. Lah taidang nasi putieh bulek. Ikan tawi jo ikan kalai goreng, samba lado, gulai daun ubi bacampue jo ikan baguak. Rondang itam, ado pulo. “Piliehlah a nan katuju” nyeah nan apak eah. Senyum Akmal. Ikan kalai badaguek goreang lansuang pindah ka pinggan eah! Batuyuang jo kuah gulai. Gulai daun ubi jo bau ikan baguak, ndeh! Pak Ismail baitu pulo. Bismillah, lah kateh suok ganti baganti! Pak Ismail mambukak kaleng karupuak nasi. Iko biaso eah urang jawa nan pek Kubu Godang ten nan mambuek geah. Dilotak-an apak eah ciek pek topi pinggan Akmal, ntu dimakan eah ciek dek apak eah. Ndee, pak. Ndak obeh nan kadisobuk do………
“Tambuah dih?” nyeah nan apak eah. Akmal copek maongguak. Iyo lai omuah juo di isi takah eah baru! Uda nan balopau nasi reah copek malotak-an nasi tambuah. Barasok-rasok! Basiram jo kuah, puncak eah! Akmal lansuang malingkuk-an nasi tambuah reah ka pinggan eah. Lupo eah jo nasi campua ubi obuh ba tarubuak! Siuk-siuk-i! Podeh-podeh lomak! Karupuak nasi keah ‘lain’ pulo saruduak eah!!!

Puku satangah limo, ajo ari. Indak taraso do. “Ba, pulang wak lei?” kato apak eah ka Akmal. “Jadih pak, molah wak ansua-ansua bajalan, mudah-mudahan tibo di umah tuisya biko,” jawek Akmal.  Pak Ismail lah manyadioan suluah colok pek dalam tas eah.  Mudah-mudahan urang salosai sambayang isya biko, atau palieng lambek puku satangah sambilan, lah tibo pek Balubuh. Lah taragak ajo Akmal jo ibu eah, walau olun lamo batingga-an. Lah taragak pulo mangaji pek surau jo kawan-kawan. Lah taragak pulo bgoluk-goluk pek lakang umah, bawah batang manggi, gonti mambuang-buang poluah buruak, gonti mampa pasieh-pasieh langkah!

Puku onam lah tibo pek jambatan Limposi.  Sambie bacarito-carito jo apak eah. Baso di dalam tangsi reah indak bulieh sambayang bajamaan do. Indak bulieh bakumpua-kumpua tio do. “Indak dapek ba jamaah jo kawen sakamr tio?” tanyo apak eah. “Kawen den reah indak sambayang do  pak,” nyeah.  “Tapi kok ba hujjah, yobona santieng. Masalah-masalah kilafiah obeh bona dek liau,” kato Akmal. “Nyo iyo ajak itu biaso eah. Pihak katigo justru nan tagieh mampatontangkan masalah nan lah joleah. Kalau ibadah Mahaddoh, lah ado tuntunannyo dari Rasul saw kan? Nan tertera dalam rukun Islam, sahadat, sambayang, puaso, zakat, naiek oji, indak ado karaguan lai, wak tiru ajo sarupo Rasul saw. Nyampang ado nan lobieh rancak dari nan dicontohkan Rasul saw, pastilah ajak itu dicontohkan Nobi awak reah dulu kan? Sobab liau sorang nen dijamin Tuhan sebagai uswatun hasanah nyo ken?” kato apak eah. “Iyo Pak. Dek awak iyo ajak itu, Amalan ghoiru-mahaddoh kok balain, silakan ba ijtihad yo ndak?” tanyo Akmal ka apak eah. “Ho-oh! Ho-oh!” apak eah maongguak-ongguak. “Bacaan syahadat ado di hadis sahih. Caro Rasul sumbayang ado di hadis sohih, caro Rasul  puaso ado pulo, zakat jo naiek oji baitu pulo, Jadi joleh ajak siang jo malom beda nan bona jo nan indak bona reah...” sambuang apak eah.

“Lah di jambaten Limposi awak pak!” kato Akmal.

“Iyo. Di suborang bolah mudiek geah ken ado dangau sumbayang. Pek bawah rumpun aua, dokek bonda tompeak ba udhuak. Sumbayang magorik malah awak dulu...” kato pak Ismail.  Ari lah mulai lindok. Awan sirah pek bolah ka ilie mambayang. Akmal lah baudhuak jo apak eah di luak dilakang dangou sumbayang jambatan Limposi keah. Sambayang gorik!

Sudah sambayang, lah bamaken paniarom ciek sorang. Baboli di pasa Pikumbuah cako.  Minum jo tabuang aie. Diansua bajalan ka mudiek. Malinteh sawah ba somak balukar sapanjang topi lobuah. Sabonta bajalan, malinteh titian ketek. Dari ilie cako longang ajo urang, tapi pek tangah somak sawah keah lah togak ajo urang batigo.

“Iko urang nan manciluk ayam tu ha!” kato nan surang, ba detea tinggih. “Iyo, borgol lah tangan e reah kini juo!” jawek nan sorang lai. Akmal jo apak eah lah dikopuang urang nan batigo reah. Sia pulo lai; Buyuang Kampang, Iban Kilah jo Sutan Sikikih. Mereka dapek order dari Pikumbuah melalui Salikih; “ balehan sakik ati Tuan Asisten Residen! Ba-a pun caro eah!!!” Akmal jo pak Ismail olun tau bona, nan ma nan Buyuang kampang, ma pulo Iban Kilah lai.  Pernah mandongea-dongea namo nyo ajo baru....

“Ko ajak kucieng dapek lipeh awak keah Tuan, main-main ajo lah salosai kaduoannyo geah.” Iban Kilah mangecek ka Buyuang Kampang. Buyuang Kampang senyum  pongah. Sutan Sikikih manyambuang’” Piliaeh lah dek ang Ban, bulieh den salosaian pulo nan ciek lai; Tuan Buyuang duduak ajolah pek topi jalan.” Tambah loweh senyum Buyuang Kampang. “Bulieh ndak singkek kaji, pilieh ajolah dek kalian, ka mati copek atau ka mati lambek?!” Iban mampaelok-an lotak korih eah pek pinggang.
“Oso ilang duo tabilang. Patah tumbuah ilang bagonti. Adat iduk bapantang mati, sabolun aja dari Nan Kuaso,” Akmal manjawek mantap. Nyo tau bona, apak eah indak pernah balatieh bagoluk do. Pak Ismail biasonyo, mamilieh untuk mangalah ajo, kalau ado ati paneh.
“E, lai godang galobang eah Tuan,..he he” Sutan Sikikih mancimeeh. Sambie maludah ka tanah. Sudah itu nyo lah mambukak langkah. Kaki suok elo ka balakang. Kudo – kudo kuek mancokam. Tangan manari malambai mamancieng. Mato tajam suduk mancari! Pak Ismail jadi incaran…..
Pak Ismail indak manggarik saketek tio. Nyo sadang mangandalian dobok-dobok darah pek jantuang eah. Indak malawan, musuah lah di muko. Indak katolok mangalah di muko Akmal reah! Ka malawan, wak iyo indak urang pagoluk do!
“Jan banyak pikie ang lai! Malaikat mauk indak sobea lai!” Sutan Sikikih tambah manggertak. Badan eah lah bakilik – kilik dari suok ka kida. Cincin parmato pek jari eah, bakilek-kilek dek konai cahayo bulan. Ten, jauah di ateh gunuang Bonsu!
Akmal maju salangkah. Mahadang langkah Iban Kilah. “Bori joleh kami batanyo, apo makosuk tuan sabonanyo, mako kami kadibunuah, apo salah silang sangketo, mako buruak tuan nan tibo…”  Lansuang manjawek Iban Kilah,”Kato nan usah dipapanjang, muncuang nan usah di pabanyak. Basiap-siap ajo lah waang, sakali locuk buliah kondak!” Kudo-kudo lansuang bapasang. Bamain Si Iban Kilah. Langkah suok barondahkan. Langkah kida ba miriangkan. Ontah ken ontah kaniak.Diangkek pulo kaki nan kida, ditokuak kaki nan suok. Dibao bagonjua suruk. Di bukakkan tangan nan kida. Mananti tangan nan suok. Malirik si suduk mato. Tajamnyo alang kapalang. Akmal maningkah maikuti….
Pak Ismail masih onieng. Togak luruh bak cando patuang. Sutan Sikikih tambah mandokek. Tenjo sairieng nan jo sipak. Gadebuk!!! Tenju godang mandarek pek oman!!!  Pak Ismail indak ado pilihan. Sakali keah tapaso bacokak juo! Jadi , dek ujuang pikie lah taontak, tatumbuak singka ka pambatang, ka malu pulo jo anak bujang, bakumpuakan sajo tanago pek tangan, asa ma ampieng asa batenjo ! Sacopek kilek, antaro takuk jo bongih, bacampua malu jo Akmal. Itu sobab eah, dek tadongak Sutan Sikikih! Aneh bona dek inyo, garik pak Ismail keah! Indak ado jurus silek ajak itu te reah! Onieng-onieng ajo; ntu lah batenju godangan ajo copek! Indak ado langkah pambukak, indak ado tari gulambai! Di osok eah dek Sutan Sikikih oman eah….iyo bongkak takah eah!
Indak bisa diagieh ati apak iko takah e reah! Lansuang ajolah kalueaan jurus ateh! Sutan Sikikih manyipak arah ka poruk, pak Ismail manahan jo tangan eah, lansuang babaleh jo tenju godang, ciek; duo; tigo! Tapi Sutan Sikikih lah tau arah eah kini. NYo mailak kida jo suok, kaki pak Ismail di kaik eah! Tajilontang!!