Buyuang Mudiak

BUYUANG MUDIAK

Oleh: Hanifa Marisa

Komplek Serumpun Indah Blok B III no 1 Indralaya, SUMSEL 30662

Dek lai congkeh babuah, sonang bona dalam ati, subuah-subuah langsung tajago, urang obang awak lah sambayang, sayang tampuruang dipogangan, suluah colok ba iduki, batang congkeh olah mananti.....

 Antaro duduk jo togak, manyangkuang nan ka lobiah, jaghi tangan copek manjalea, bungo congkeh dibinjek ciek-ciek

Copek ba pindah ka dalam sayak, langkah ma enggong ba kaliliang, ba sicopek jo dusanak, dikumpuakan ka dalam kombuk.

Indak tapado godang ati, lai takumpua satanagh gantang, langsung di kokea tongah laman, kok lai mosiak sampai sonjo. Nyampang lah mosiak inyo biko, di ciekkan ka dalam sumpik, di jua ka pajak Dimea, hrogonyo lai sadang tinggih.

O sanak ka sadonyo, lai takona maso daulu, sowa singkek di ateh lutuk, pangguanyo bajaik suok kida, lah coklat rono nan lobiah, dek taesoh keen kaniak....Ba kawan awak ka Pajak Dimea, tek Lida lai mamboli, tujuah ratuh kini sacupak..

Lai toba lipek piti, dimasuakkan ka dalam saku, meanggak langkah paja pulang, tabayang di ari akad, poi ka pasea payokumbuah , manegnok urang pacukudoh..

Indak siagak malu ati, sobab baa dek baitu, manjalang mangelok ka umah mayai, sobok bona jo Fia Phibodea. Inyo nan golak-golak manih, awak lah malu sajo sorang, dek panggua ba 

Golak manih lai dibaleh, tapi langkah batambah copek, takuk kok sowa di tengok urang, adat paja mudo-mudo, kayal mambubuang dalam dado, anak urang baroman rancak, hati awak nan malambuang-lambuang, ooo....iyolah tagolak sorang awak mangonanyo

Lah tibo ari akad, jonji jo kawan lah dibuek, mananti oto pek limbonang, bajalan malah awak lai, jo sowa nan lai gak segeh, jo baju pintalon apak, muko nan bacahayo sapanjang jalan, heran urang di kuparik, batanyo urang di simpang tigo....

Dara Tunggal olah baronti, lah sompik di ateh oto, urang rami poi ka pasea, nak manengok kasadonyo, pacu kudoh di hari nangko, paco boko nonyan bisuaknyo. Badan manyolek pek bangku lakang, tasopik di tongah pajaketek, orang tuo sabolah kida, sugi nyo manyompa pek suduk bibia

Tibo di badan awak nangko, indak paduli oto sompik,nan pentiang lai dapek barangkek, asok okok silang piuah, daun onau jo kansas soor.

Nan mambao anak lah manangih, paneh batintiang di ateh oto, nan maisok toruh juo, nan gadih kamek duduak dimuko, kakinyo manyingguang ka tungkek porsneleng

Supir oto acuah tak acuah, pandang jauah ka suok kida, talunjuak garik manggarik, batanyo sapanjang jalan. Adopun cingkariak, togak pek pntu lakang, badan sabolah di ateh oto, nan sabolah di luea manantang angin, tiok sabontea maoriak-oriak, ka ilie ka pasea ba imbaukan

Badobok-dobok raso ati, lah tabayang galanggang pacuan, urang rami silang pintang,kaluea sado paja mudo, ponuah dek anak paja ketek, nan tuo baitu pulo. Ado baju kuruang sirah, ado pulo salendang biru, nan ba sarowa jengkji banytak pulo, apolagi sarawa godang kaki, manyapi rumpuk suok kida

Ari batambah paneh juo, sadang maningkek bayang-bayang, indak tarasi awak lah tibu, simpang bunian malah kini. Cingkariak ma hariak-hariak, panumpang turun basicopek. "Pikumbuah abih ! Pasa abih !"

Bendi lah ponuah kasadonyo, tiok tibo tiok dikojea, kudo bakato dalam hati, lai kok lah banyak rumpuk biko?

DEk badan lai kenek, kawan basamo baitu pulo, maenggong bandi ka kubugodang, badokak-dokak bunyi kakinyo, urang nan rami sapanjang jalan, lah sirah rono baju paja ketek, lah itam baju pandeka, lah putiah baju ongku malin, sadonyo hondoh poroh ka lapangan pacu.

Awak malengong suok kida, ontah sia nan duduak di muko, dipocik dek ibu apaknyo. Untuang tadonga ibunyo maimbau,"Wati, bapocik ka apak kau....balobuak biko!" Oooo, Wati namo paja rancak ko?

Sampai juo di kubugodang, iyo saroman nan ba bayangkan cako, lah rami urang silang pntang, lah kaluea nan mudo-mudo, lah manyomuk paja ketek, lah ta bungkuak-bungkuak pak uwo, es tebak malimpah ruah, cindue jo limun baitu pulo, sapanjang jalan lopau nasi, dendeng kopau manyintak salero...

Sasuai pitawek apak jo mandeh, hati-hati waang di sinan, copet jo kuciang-aia banyak pulo, sako dirosok tiok sabontea, piti congkeh jan sampai ilang.

Balimpik-limpik mamboli kicih, padek pulo pek pintu masuak, awak masuak kicih disuyak, badan malompek lansung ka dalam. Eboh suaro urang banyak, kudo bapacu ompek jo limo, kadang tagarajai anak jokinyo, mamokiak urang di topi lapangan

Makin siang makin badaso, kudo nan lopeh batambah juo, ado nan sirah baju jokinyo, ado pulo nan kuninang tambago. Joki hijau datang pulo, nan biru gadang galaknyo. Urang manonton dari topi, ado pulo nan malinteh ka tongah, samo nak dakek ka objeknyo, lah tabao raso jo mato.

Tiok lopek tiok basorak, ado pulo nan batopuaktangan, nan mambao anak soto manjujuang anak, nan bapole duduak ka balakang. Kudo lopeh urang eboh, panjua es soto baronti, panjua limun taparangah, panjua kacang maninggakan mejanyo.

Lah saputaran kudo balari, lah tau sia nan di muko, tambah sonang supporternyo, topuak tangan makin manjadi, nan di balakang mukonyo marenguk, kecewa coki indak monang...

 Ikolah budaya masyarakat kito, lah tumbuah sajak daulunyo, bapacu di alam lapang, fairplay kato rang kini. Tapi o kawan kasadonyo, lai koh tau kawan tantang nangko, masyarakat ketek basorak mancaliak kudo, tapi di ateh dari pado itu, iko pertandingan gengsi antaro nan punyo kudo, banyak pangusaho rancak kudonyo, bahgan pnguaso ikuuk sarato. Kudo anu nan tanamo, kudo bupati di kalahknannyo.....

Persis sarupo awak kini, fraksi batandiang di DPR, kito batopuak tangan sato, ado nan sirah ado kuniang, nan biru baitu pulo. O kawan kasadonyo, nan punyo kudo, galak sengeang ba duo-duo, saliang taleponan, baradu gengsi....

Adopun kapado kami, indak omuah kalah pulo, urang basidingkik padek kamuko, awak soto manyolek pulo, ontah sia nan mamulokannyo, manundo nundo sajo karajomyo, lah takaliciak kaki kida ko, takarepeh maluncua taguliang pulo. Untuang indak silando kudo, muko pucek malu taraso, urang basorak bakeh kudo, lah raso manyorak bakeh awak juo....

Untuang tangan wak di elo urang, bapak-bapak malah kironyo, tarimokasih wak bakeh baliau. Kutiko di tengok muko baliau, raso kenal awak jo inyo, ondeee...nan ba kupiah di ateh bendi cako, bapak si wati malah kironyo...

Lah tinggih hari ruponyo. Lah bunta si bayang-bayang. Obang luhua lah lewat pulo. Pacu kudo sa rip lai. Poruk litak mulai taraso. Di ansua langkah ka pintu kaluea. Di luea urang rami pulo. Ontah ma nan rami di luea jo di dalam.

 Pajak nasi ba tirik-tirik. Aromanyo manyentak ka dalam iduang. Raso manggalotrea golang-golang. Dirosok piti dalam saku. Lai tingga ltujuah ratuh. Cukuk pamboli sa pinggan nasi. Sisonyo ka ongkos pulang ka mudiak

Urang lah rami dalam pajak. Bangku kayu basompik-sompik. Bunyi copak kacepak-kacepong. Poluah ma ilie dari konyiang. Salemo joniah turun pulo. Kuciang jo anjiang olah mananti, eten ampiang lakang pajak, matonyo putiah manengok rang makanb, ikuanyo goyang bagoyang, arok jo pantak sairih tulang

Gulai joriang lah agak tuo, kuahnyo kental ka topi pinggan. Boluk bagoreang saungguak godang, ladonyo ba minyak-minyak. Rondang itam maimbau pulo, irihnyo tipih-tipih, baunyo masuak ka dalam dado. Onde dusanak janyo kami, galau ati dek mamiliah, ma nan sasuai jo piti awak....

Manolah amai rang kopau asli, tolong tariak-kan kami sa piriang, agiah kuah jariang gak banyak, samba lado baitu pulo, rubik podeh ungguakkan saketek, sayuanyo si daun ubi......dicebok tangan ka aia, dibaco bismillah dalam ati, sudahtu lupo jo urang rami, nan tampak hanyo goreang ikan tawi, nasinyo badorai disuok gonti bagonti

Sadang lomak kami makan, basompik sompik pek bangkuk kayu, indak taraso masuaklah duo urang, nan ciek godang badannyo, nan ciek tinggi batopi sebo. Nan gopuak itam kuliknyo, nan tinggi agak tacelak putiahnyo.

“Tolong pe-se Uni ! “ katonyo ka urang pajak. Dek inyo togak dokeak awak, joleh bona bau muncuangnyo. Bau manyongek sarupo aia tapai. Ontah apo lah nan diminumnyo. Wak maleh mancaliak muko, dek bantuak urang bongih sajo.

“Pe-se a juo lai? Tadi kan alah?” jawab uni pajak indak sonang ati. Mungkin inyo lah biaso jo kurenah jak iko. “Nan tadi untuak urang ba kupiah saragam, nan iko untuak kami preman kandang…”katonyo. Tangannyo lansuang manggapai dendeang dan mangudok ka muncuangnyo ! Uni lapau ta antok. Rauk mukonyo tibo-tibo togang. “Pareman mabuak tampaknyo komah,…”birunguknyo .

“Jan banyak muncuang juo lai Ni. Den lingkuk-an sado jaga uni ko biko!” nan tinggi ba sebo mangoceh. Tangannyo mangacau-ngacau gulai cimbodak jo sonduak kayu. Awak dek duduak dokek itu, lah pucek, takuk tatimpo kuah cimbodak !

Uni pajak bapikia sabontea. Urang nan makan, togang mukonyo. Di pinggang preman tu ado nan tasolek. Ontah apolah agaknyo. Dan, ontah ba’a lah caronyo, uni tu lah tibo sajo maloncek ka muko preman nan mangacau gulai cimbodak. Lutuk suoknyo nyo angkek sacopek kilek. Dan preman sok bagak tu, lansuang ta rauang ! Bijo salaknyo nyo pacik kuek-kuek ! Onde yaiii….!

Preman nan sorang lai , nan badanyo gopuak badagok, bongih bona nengok kawannyo taluluang, taloncek-loncek, rambuik uni pajak diegangnyo, da irik kalua pajak, lalu di tenjunyo sakuek tanago.

Urang dalam pajak, lah malotak-an pinggannyo. Indak sampai ati manengok nan tibo, dado lah comeh kombang – kompih; tapi ruponyo unit u sangajo manuruik die lo kalua, supayo jaganyo indak ta tumpah.

Tenju uda gapuak tu sa miang padi lalu di muko pipihnyo. Sobab inyo ma lengong refleks arah ka suok. Sudah tu, kaki kidanyo sarupo panah lah tibo di ulu ati uda nantun. Perasaan awak tadi sipak uni tu, indak kuek bona; tapi ba ajaknyo, uda tu taguluang marepok dalam bondea?

 Dek urang rami, lansuang ba kopuang. Satalah tau apo sobabnyo, uda nan baduo tu sarupo lado jintan ba tumbuak, dek urang rami. Asailah di ang ! Dan nan awak agak heran, uni pajak nasi tu, wajahnyo dingin, indak barubah …!

.lah ampiang ka tuasea….pulang wak ka mudiak lai ?

Tiok nan tibo oto, lansuang ponuah, urang bacirobuk, untuang dapek oto Pak Oji Sedi. chevrolet abu-abu coklat, lah pek simpang Napa wak naiak

Yo bona lomak oto pak Oji Sedi, laghinyo koncang oyaknyo losuah, pintu jan lupo di kunci, nyampang lupo bias tajatuah. (…dek yo bona ponuah).

Lah manyompik kami pek muko, badan ketek isi ba rompek, awak itam kulik lah kolek, untuang pak Oji elok atinyo.

Disilau oman pak Oji, tampak sonang pek ati, panumpang ponuah bona isi, tasompik dompet jo piti.

Lah lopeh dari Limposi, tangan kida pak Oji mangaroti, kaset di cucuk-an ka dalam tape, Ely Kasim tadongea banyanyi.

Mudiak Arau olah talewat, ditoruhkan jo Malereng Tobiang, panumpang pek lakang maongguak-ongguak, ontah talomak ontah takantuak.

Ely Kasim toruh juo, oman pak Oji sarupo ta senyum, bunyi suliang maibo-ibo, tambua di guguah ba dantum-dantum

“Cincin siapo nan tuan pakai, denai nan indak ba bari tau….lah tujuah taun janji kok ungkai, bakeh siapo denai mangaduuu……” Ely Kasim makin manjadi. Lah talewat simpang Kuranji………

“Bedo kaset meah pak Oji….” Panumpang pek lakang ba komentar. Pak Oji Sedi makin sumringah. Gas oto makin ba tambah…..

     Tuak Liyeh Pokiah lah obang pek sughau – koghiang, kami baghu tibo pek umah. Badan lotiah tapi ati pueh. Banyak nan ka dicaghitoan pek sikola bisuak. Sambia makan kacemuh Jubik.

      Dusanak, katiko congkeh lai babuah, iyo lomak iduk pek umah. Taboli lading jo sawah. Taboli Honda jo kuretah. Golak pak Uwo sambia minun-kawah.

      Tapi sudah tu, lah mati congkeh. Tajua golang omeh. Karetah tajua, bantiang ba lopeh. Mulai bontuak indak segeh. Nan tuo manjua omeh. Nan mudo bakureh. Nan ketek manyarengeh.

      Sakola SMA iyo lai tomat. Ka kuliah, biayanyo; tobat ! Kawan sa umua ado nan  kubat. Longanglah kampuang, rantau di siasat.

      “O mandeh, den cubolah poi marantau”. Kok lai untuang nan takadia, barubah nasib rasoki mangalia, ta taui sawah nan pek ilia, kok lai taulang senyum pek bibia.

      Dalam saribu, mungkin sorang nan barasia, tabangun kampuang mudiak jo ilia, Uda Syahrul nan ka contohnyo. Zaman baliau jadi bupati, etan di rantau Pasisia, tabuek jalan di kampuang, sonang urang sa nagori. 

      Badoa awak ka Tuhan, banyaklah urang sarupo baliau, iduk paguno dek nan banyak, di sarugo lah ka tompeknyo. Amin.

     Lah bujang Buyuang kini, ditengok longan lah ba longan , di tengok botih lah ba botih, baa urang baitu pulo awak. Tapi, kok ka ma mangkua sawah, kok ka ma narukkan singka bajak, iyo agak payah, banyak onggan jo anggak.

      Bukan indak ado prospek, ado juo urang nan mandapek, apo lagi kalau musimnyo topek, tajua lado ka pokan dokek, takumpua  juo piti balipek-lipek.

     Tibo di Buyuang, takona aka nak mancubo untuang, di topi sinama bao bamonuang, dilinteh  bukik jo gunuang, di lalui lauik jo pandayuang, nyampang rasoki indak uruang, takumpua omeh sa sayak tampuruang.

      Piti lai ado di saku, agak saratuh duo ratuh ribu, upah manolong kawan bajua di pokan Sotu, kok lai di tambah eah dek ibu, cukuk ka modal untuang di adu, o tanah Jawo badak taragak kasitu.

      “Jadi ang ka poi…?” ba tanyo ibu pek dapua. Di jalang baliau kiun, di tampakkan muko nan joniah, di jawab malah tanyo nantun; “….kok lai ibu jo apak maizinkan, nak den cubo ka rantau urang…..hari akad muko di ansua langkah…”

     Mandeh sarupo sibuk ma ombuh api, tapi ontah apo nan taraso di hati, Buyuang togak juo mananti,,,…..sobab ba a dek baitu, anak bujang sorang si Buyuang nan lah godang, adiaknyo masih ketek-ketek, salomoko inyo lai rajin manolong iduk….

     “Lah ang kecek-an ka apak ang?”, ibu manyambuang batanyo. Suaronyo agak garau……

==

      “olah mak…..senyum ajo apak nampak dek awak nyeah….” Buyuang manjowob. Ibunyo manengok sabontea, sudahtu nyo toruhkan ma ombuh api. Padahal api lah iduk. Daun manggea koriang jo ndayang kambia lomak bona dek api tungku.

       “Kok nyampang jadi barangkek ari akad, elok-elok-an bona niat muah…” ibunyo manyambuang. Ha, kama arah kecek ibunyo ko? “Poi manambah ilemu iduk, poi mancaghi rasoki halal,…….” Tontu iyo ibunyo sonang kok lai ado anaknyo berhasil ajak anak urang lain.

      “Dondam ang ka Mita…?” ibunyo manyalisiak. Buyuang taloncek raso tapokiak. Tau ibu ?

       “Ang anak den. Sado kurenah ang obeh dek den. Den geah mudo pulo dulu……..” ibunyo manambah. Buyuang tadiam. Potuh ari keah?

      “Surek kalian tabaco dek den bulan lalu. Ang solek-an pek lakang jendela. Den mambrasiah-an biliak ang dek urang ka rayo…” ibunyo manorangan. Ondeh bu, iyo, tapi inyo kan lah diambiak ughang? Pak Guru nan ganteng  pek sabolah ilie ten lah marajok inyo jo pinangan bulan nan lalu. “Iyo ta ibo ati den….” Buyuang mangecek pendek. Lidahnyo ta tahan. Atinyo iyo lah talanjur arok,……

      Ba pulo ka indak?  Sajak ketek paja tu lah rancak nampak dek inyo.  Iyo tacelak di bandiang jo nan lain. Indak tinggih indak pulo rondah. Obuak tajelo jak arai pinang. Mato bulek ba cahayo. Dari golak, senyum nan lobiah !

      Kok lalu eah pek lobuah, ma nyenter mato urang pek pajak manengok. Indak sakadar dek kulik kuning lansek ajo reah; tapi io lai coga oman eah….ndeee , baa lah mancaritoan nyeah ka…

      Dan kalau basobok pandang jo Buyuang, ontah baa lah sobab eah; darah Buyuang tasirok-sirok. Ontah dek konai pangaruah psikologis, kecek kawan-kawan baso inyo coga; tapi dado Buyuang bona nan maraso an nyeah ! Tang kapentong ! Tang kapentong ! Dak-dik-duk; dor !

      Itulah sobab nyo dulu, tahun-tahun nan lalu, Buyuang tamonuang-monuang dalam biliak, sorang. Raso-raso tangoran golak ketek inyo pek musolla, jo kawan-kawan eah; katiko poi sambayang tarowieh. Nde tuan !!

    “Kirimi inyo surek Yuang !....” baitu saran kawan pek longgea baruah, katiko carito-carito pulang sikola. Dan, saran tu, yo bona dikojoan Buyuang. Ba boli lah, karoteh surek babungo pek pokan komih Limbonang. Ta bujua lalu , ta balintang patah !!! Nekad !

   “Wak iyo jak itu pulo Uda….., tapi wak malu, wak ndak buliah ba cingkiriang-cingkiriangan dek ibu awak reah,” baitu jawaban Mita nan tibo sabelok sasudah itu. Raso tobang Buyuang di ateh langik……

      Katiko sobok pek jalan, pek kapalo tobiang, jo lidah agak kaku, Buyuang mambagak-an badan mambao Mita mangecek, pek bawah batang ghambai. Mita manangkuk ajo kapalo eah nyeah. Embe nan dipogang-an nyeah tabuai-buai juo pek tangan eah. Nde tuan….

    Dan o , dusanak sadonyo; ontah apolah nan  ka disobuk, katiko Mita omuah di bao poi pokan komih boli sate jo es tebak. Abih-abihlah piti…!

     Ontah ca nan manampak Buyuang poi pokan jo Mita, lah ba ombuh kobea dalam kampuang. Dan, lah samo tau juo wak; kobea sa godang tangkai pangkua, bias baubah jadi sa godang batang pinang, dari muluk ka muluk. Lah babisiak bisiak ughang, lah tagolak-golak ibu-ibu pek luak padusi. Eboh !

       Ontah da Das nan manulih ontah Guru Wandi; lah ponuah dindiang kughuangan pek tobek mudiak jo tulisan; Buyuang = Mita. Malahan ado pulo nan lobiah inspiratif; batambah jo gambar daun taleh. Indak kojo caghi kojo ! Kughuangan geah mungkin lah ba ubah jadi tompek inspirasi. Ado nan sonang malogu-logu sambia basiua. Ado nan maokok-okok sambia bamonuang. Kakobeh soghang-soghang !

      Etek Timah Rowana, ibu si Mita, kalau masuak ka kughuangan itu baalah raso ati eah? Kadang-kadang, katiko mandi pek luak padusi; amak-amak nan lain, baliak pek sawah, lah manyindie-nyindie pulo. “Buyuang yo bona ancak logu eah…” Lah tagigik lidah etek Timah dek inyo. Pincughan luak lah soto pulo malogu-logu. Srrrrrrr……!

      Pagi potang, Mita lah eboh pulo pek jalan. Kawan-kawan eah lah golak-golak manyindia sambia bakareta angin. Kawan nan pek lakang batanyo ka kawan nan pek muko, “A logu da Buyuang awak kotu sandiwara rayo potang…?” “Anak urang sabuak-andaleh, pulang ka rumah si sutan mudoooooo….” Sudahtu lah cikakak-cikikiak dek golak. Ampia talendo dek onda mak Oji Nawea lai…..

     Si Mita lah manunduak ajo lai. Ndak obeh nan ka dikecek-an nyeah deah. Pipih-eah lah sirah dek malu. Tapi, o sanak kami sadonyo, pek dalam ati Mita, ado bungo nan sadang kombang; bungo nango-nango oghun bona ! Oliak den !

      Weh, lai nampak perubahan pek penampilan Buyuang ? Tengoklah, sikek obuak eah kini. Yo bona rapi. Minyak lavender-pomade nan ba kaleang hijau bulek tolua; talotak pek meja. Dipakai Buyuang jo adiak-adiaknyo. Obuak Buyuang dek lai luruh, kalau disigo tongah, di jatuah-an setek nan pek muko, yo ajak ‘pemuda harapan bangsa’ bona …..

      Buyuang rajin pulo manareka baju. Tiok ari akad, sayak karambia lah ta ungguak pek laman lakang. Disusun ba ungguak-ungguak, di agiah abu setek, siram jo minyak tanah, ntu di iduk-an api. Baro sayak reah lah siap malicin-kan baju so sowa Buyuang untuak dipakai sabelok nan ka dating. Malah baju adiak jo apaknyo, nyo tolong pulo sakalian. Tontu sonang ati apaknyo.

       Apaknyo , nan ba pajak jo ba sawah, lai mangaroti pulo jo kurenah paja ko. Tapi inyo, saroman indak tau ajo. Inyo pa ontok. Tapi, walaupun paontok, kawan eah banyak. Buktinyo, banyak nan sonang ba balanjo ka pajak inyo. Nan tuo, nan mudo, anak-anak bitu pulo. Buyuang di paratikannyo sajo dari jauah. Mungkin takona dek inyo dulu, ibu si Buyuang,….nde sanak; ontahlah !

        Dek Buyuang batambah rajin, manolong pek dapua bagai inyo tangkeh, kan wajar balanjo Buyuang di tambah setek yo ndak? Potang mangopiang kayu. Cako maangkuk padi ka eler. Ari akad manareka baju. Ma asak bantiang lah inyo pulo. Kok ka mambasuah pinggan, jan dikato lai; lah campin bona ! Iyolai copek kaki ringan tangan.

      Manjalang ka lolok, pek biliak, Buyuang lah manarawang. Kasau pek loteang lah di etong-etong eah. Bara ka lomak eah, kalau bisa poi ka Bukik Cintuak jo Mita iah……… Misalnyo Mita ta taruang, bara ka lomak eah, di pogang-an nyeah copek, jan sampai balobuak……. Bara ka lomak eah ma lotak-an tunjuak pek pipih Mita, sudah tu, dielo turun setek-setek, sambia senyum baduo-duo…… Kasudahannyo Buyuang takolok dek lah lamo manarawang. Nde pantuang; abih den !

       Ari rayo, kasompatan bona dek Buyuang batandang ka umah Mita. Baa pulo Etek Timah Rowana ka manulak, urang poi ba rayo. Olun sajam duo jam salosai sambayang rayo pek tanah lapang tugu lai, Buyuang lah tibo jo kawan eah pek umah Mita. Bahkan, sabonea eah, ajak daghi tanah lapang cako; nyo lah bairiang-iring juo. Apak si Mita ajo nan kombang-kompih dado eah nampak eah nyeah. Maklumlah, Mita kan klas 3 SMA baru ! Mudo matah….

      Yobona elok duduak Buyuang pek ruang tamu. Ajak kuciang dibaoan lidih. Etek Timah Rowana lah baramah-ramah pulo; lah basalam-salaman cako. Kue sopik dalam boto yobona lomak; tapi lobiah lomak manengok ka Mita. Kue bolu coklat ghoda pespa yo bona oghun; tapi lobiah oghun obuak Mita. Raga-raga sirah powder yo bona kamek; tapi kamek juo oman si Mita. Nde tuan, baa lah ka mangecek-annyo koah ?

       Kacang tujin lah di binjek ciek-ciek. Yobona sadang elok garam jo bawangnyo. “Iko pasti Mita nan mambuek kan?” tanyo si Buyuang. Mita ma ongguak takzim. Ado senyum pek bibie nyo. Lah ampia salah gigik Buyuang jo lidahnyo manengok. Onde Yuang, bantiang ang lah bakaluea an?

      Sasudah kotu asea, lah Mita pulo nan batandang jo kawan eah ka umah Buyuang. Grogi Buyuang ? Iyo setek; tapi lai indak lamo do, copek Buyuang mangatongah-an lontong ba gulai paku. Tangkeh bona ! Tiok sendok lontong nan masuak ka muluk Mita, di pandangnyo juo…… Dalam ati Buyuang malogu; “seindaaaah rembulan, di malaaaam hari, seindah mentari pagi, hatikuuuu…” Pek poghak lakang pajak, bantiang malonguah pulo.

       “Dek den taghagak kau manjadi ughang Ta. “ Apak si Mita mangecek malam. Kok dapek, disambuang sikola kau ka Padang, kok lai manjadi guru…” sambuangnyo. Apak Mita lah mafhum arah etongan. Kilek baliuang lah kaki. Mita manunduak. Obuaknyo jatuah badorai. Nde, ancak eah lai. “Wak iyo taragak pulo kuliah Pa. Kok iyo lai bisa ditarimo di Padang,” nyeah. Kok dapek, inyo manjadi contoh ka adiak-adiak, yo ndak? Eee, ba dek golak?

      Dek untuang nan takadia, elok nasib garih tangan, iyo lai lansuang sikola Mita. Lai ditarimo kuliah di Padang, walau bukan program sarjana, tapi program tigo taun, kan lai ka manjadi guru SMA atau SMP nanti tu, yo ndak? Sonang bona ati apak jo ibunyo. Raso bakurang lotiah karojo, ikhlas ati piti abih, asa anak lai manjadi ughang.

      Buyuang lah arok-arok comeh, calon induak boreh iyo lai ditarimo kuliah, kok nampak nan ganteng dek inyo di Padang baa aka? Bukannyo Buyuang indak ganteng, Buyuang kan lai pulo tomat akademi, kok disorongkan ijazahko ka SMP, lai pulo bias manjadi guru, sia tau nasib lai mujua…..

       Agak panjang surek Buyuang bakirimkan, katiko Mita ka poi ka Padang, bakualuea an bona isi ati, putiah kapeh dapek di like, putiah hati ba kaadaan,….’o diak kanduang sibiran tulang, ubek lotiah palorai domam,…nyampang jadi adiak barangkek, kona juo kami di rumah…’

     Manunduak Mita dalam biliak, mambaco surek nan bak nantun, nasehat Buyuang di ingek-ingek, namun cito-cito totap dilanjutkan.  Dek sayang jo apak jo amak, dek samangat lai tinggih, ditungkuh malah paragat sikola, longkok jo buku nan parolu, bajalan badan ka kota Padang, oto Bahagia kan lai lalu bisuak pagi…..

        Ayam jantan ramabayan toduang, ikua manjelo masuak padi, tinggalah kasiah tinggalah sayang, badan bajalan hanyo lai.

      Tabedo raso badan Buyuang duo hari. Apaknyo lah malirik-lirik ajo dari jauah.  Ibunyo baitu pulo. Tapi indak kato nan ta katokan, saluang sajo nan mambori tau…..

       Di panai juo puncak Bukik Andiang, di tengok awan nan ba rarak, di pabia kan angin malendo abuak nan ta juntai,….onde sawah nan tabontang, onde sinama nan elok ati, onde buruang pipik, nan tobang jauah………

      Tontu iyo agak kontak badan Buyuang saketek. Wak indak pulo tau, baa sobabnyo do. Tapi inyo lai rajin juo manolong apak eah pek pajak, pek poghak jo pek baghuah. Potang manyewek ikan Buyuang pek bondea pulau. Lai dapek ikan puyu jo anak ikan rutiang  sa kaleng .

      Cako pagi, Buyuang duduak pek muko pajak. Sikek obuak eah lai inda baubah reah; tapi cahayo muko eah ajo nan agak kughang kini. Anak-anak sikola lah rami , lalu jo keta angin pek lobuah. Barombong-rombongan. Tu , banyak pulo nan ancak. Anak Buya Oji Fauzi, terkenal bona ancak eah, ajak daghi Padang Jopang sampai ka Limbonang. Ni Godang, Ni Azizah, Ni Afrida dan nan ketek, ni Anisah. Kok senyum inyo jo kawan-kawan eah, sambia lalu, yo bona sonang ati nengok. Gigi eah rato, putiah pulo. Tapi dek Buyuang, kan ciek nan ancak nyeah; Mita !

       Tapi, Buyuang, lai rajin juo manulih sughek. Karoteh bagambar bungo, ancak bona, lai banyak pek ateh meja. Lah jadi pujangga pulo Buyuang kini.  Sobab , curahan ati Buyuang, ampiang soman jo puisi nan ma egang-egang ulu ati. Mita lai rajin pulo mambaleh. Padahal, semester kaduo, lah banyak tugas pek kampus, lah batumpuak pulo laporan jo piper nan kadibuek.

       Liburan semester, Mita pulang ka kampuang. Nyo tontulah taragak jo apak jo ibu eah. Jo adiak-adiak eah bagai. Ntah, kok lah lamo pulo inyo indak makan gulai daun ubi jo kincuang pulau, masakan ibu eah. Mungkin dek Mita biaso bapikia, biaso baraja, biaso badiskusi jo kawan-kawan; batambah cerdas penampilan Mita kini. Batambah dewasa, kato urang. Matonyo tambah ba cahayo. Konyiang eah makin tacelak. Dan, nan tambah maelo hati; senyumnyo tambah lembut. Nde Yuang, den ambui-lah luak dalam keah?

      Lopeh bona taragak Buyuang katiko sobok. “Uda Buyuang, sasudah tempo keah, kami tandiang vocal-grup pek kampus dalam rangka dies. Logu a nan ancak kami baokan?”, nyeah nan  Mita. Kalau masalah itu, enteang dek Buyuang reah. Lah kaji inyo bona. Logu ‘sansaro’ apa bona dek Buyuang. Logu ‘kaparak tingga ‘ jo ‘lintuah’ lah pasiah pulo. Pueh ati Mita. Sojuak pulo kigho-kigho Buyuang.

      Bulan batukea, taun bagonti, indak taraso abih kotu. Lah Tigo taun zaman balalu. Lah tomat sikola Mita. InsyaAllah , bulan muko; acara wisuda. Indak siagak sonang ati. Baubek joghiah jo payah. Paja nan rancak, kok lai kajadi ughang !

       Disetop oto Bahagia, nan bajalan dori loket Lintas Andalas, ditanyo ka sitokar, lai juo ado bangku, lalu duduaklah Mita pek tongah-tongah, sambia manenteang tas jo makanan, kampuang mudiak lah tabayang.

     Iyolah baubah rono kini; lah ajak ‘guru’ barghu. Obuak basanggua ketek, bibia balepong tipih, baju jo rok rapi kasadonyo. Lah sogan ughang manyapo. Lah tapancea ‘aura’ kecerdasan. Lah patuk togak di muko kelas. Tapi bukan itu nan takona dek ‘bu Mita’. Acara bulan muko nan kadiboea an ka ibu jo apak. Kok dapek poi basamo ka Padang, soto acara wisuda sarupo urang. Bialah ari paneh badongkang, bafoto basamo dilaman rektorat godang, untuak isuak ka dikonang-konang.

        Taonyak Mita tibo di umah. Etongan lah masak kighonyo nan mananti. Raso badan taghangah, kobea dari ibu manari-nari. “Urang Ilie tibo belok potang. Inyo ba niat elok. Kok dapek kau mangawani iduk anak kamanakan inyo, nan banamo Irsal, nan ma ajea pek SMA  Bangkinang,” Hoyong badan Mita, lah galau pamikiran.

     Uda Irsal tu iyo ganteang. Tinggih godang. Keluarganyo tamasuak barado. Umuanyo jauah di ateh Mita; tapi olun dapek jodoh nan sasuai. Ibu jo apaknyo lai urang tapandang pulo dalam kampuang. Tapi Uda Buyuang, lain pulo eloknyo. Walau inyo urang biaso-biaso ajo, tapi salamoko, lakunyo katuju bona. Budi basonyo aluh. Perasaannyo tajam. Senyum jo golaknya lomak lombuk. Indak ta ciah-ciah. Nan godang jo nan ketek, katuju jo da Buyuang. Indak cacek parangai jo kurenah do.

     Indak lolok jadinyo Mita malam.

Memang, salamo bakawan jo da Buyuang, kadang ado pasang, kadang ado suruk, tapi indak pernah biduak tasakek. Nyo lah talanjur manarawang, maeto kain saruang, mambayangkan da Buyuang  ka jadi junjuangan iduk……kok manengok dusanak ka  Mato mita tongah malam, lah kaluea aia pek suduk eah !

        Ko iyo ajak maelo bonang dalam topuang keah. Bonang taelo, topuang jan taseghak. Walaupun da Buyuang jo mamak-mamaknyo olun pernah datang sarupo da Irsal tu, tapi secara de-facto, kan lah basuluah matohari, lah basosi mato urang banyak? Nde, o dusanak sadonyo; tolong jo do’a oiii…

      Jadi langkah partamo, baposan ka kawan, wak taragak basuo, baiyo-iyo, pek dangau sawah pulau, bisuak pagi! Di tengok bona, baa hati da Buyuang?   

       Kok iyo katokan iyo, kok indak katokan indak… Sobab baa dek baitu, nan umua kan iyo lah cukuk. Sikola iyo  lah sampai. Tontu, baa ughang, baitu pulo awak!

      Nyampang buliah bakato; banyak pek Padang nan nak iyo jo awak. Kawan sa angkatan, urang Lubuak Aluang ado. Anak ibu tompek awak kost, urang Padang Panjang, lai pulo. Bahkan, kakak senior nan jadi asisten dosen, lai pulo….. Dek parumahan lai datea malah agak eah… Tapi sayang ka uda Buyuang nan elok laku, nan pandai ma-ajuak-ajuak ati; lai bajago juo. Kini, baa dek iko nan tibo?

       Lah sudah manolong ibu mamasak nasi jo gulai makan pagi, lah sudah adiak makan kasadonyo, bajalan Mita ka baghuah. Mudah-mudahan da Buyuang, lah ka baghuah pulo…. Bukankah dangau itu dulu, pernah manjadi sosi, baso inyo iyo ‘anu’ka da Buyuang?

      Daghi jauah lah nampak da Buyuang manjuntai pek dangau topi sawah pulau. Jan dikatoan pulo, da Buyuang duduak ajak boghuak indak ta-jua. Inyo sadang ‘sobea’ jo masalah iduk nan tibo. Sajak rombongan keluarga Irsal datang ka umah Mita, belok-belok nan lalu, lah ba ombuh barita ‘manjalang kaduduak-an’; dunia keah raso agak baguncang taraso dek Buyuang.

      Baa dek iko nan tibo, Tuhan. Buyuang batanyo dalam ati. Kan lah samo tau, baso Mita reah ’jo’ inyo. Lah tigo taun ! Ntu, bapinteh ajo, ntu ba lalui ajo, ..... indak ado ma’mandang’ sangenek tio ka den? Baa bona den keah?

      Saindak-indak eah, kan mangecek Mita malalui surek, baso ado masalh ajak iko? Baso ado ughang lain nan ka datang? Tu baa dek oning-oniang ajo, lah masak ajo etongan antaro keluarga duo pihak ! A kojo namo eah reah? Ba palantiang-an den tu? Bughuak bona den keah? Dek mantang-mantang apak den ughang biaso-biaso ajo tu?

      Tapi, nyampang tau ajak iko, baa kok indak apak jo mamaknyo ajo nan disuruah eah poi mambuek etongan ka umah Mita dulu? Supayo jan sampai di langgea ughang gaghobak awak? Nde, setres den!

      Sampai juo Mita pek dangau. Da Buyuang mancubo untuak senyum. Tapi ontah baa sobab eah; pencong ajo bibie reah. Daun padi pek sawah, olun manggarik ajak cako. Angin bukik andiang olun tibo. Kaku ajo! Aie pek pambuluah ajo nan tadongea marosau pek bolah ka bondea.

       ”Lah lamo Uda tibo.....?” Mita manyapo. Lai ajak nan dulu juo suagho eah. Letai ati dek eah..... Den laghian-lah kau keah diak?!

        Da Buyuang maongguak-an kapalo. ”Olah”, nyeah. Ombun pagi masih basiso pek daun padi. Agak dingin pagi keah. Buyuang nak mamulai mangecek. Tapi satiok ka bakato, taonti ajo pek rangkuangan. Ma nyeah kato-kato nan lah disiap-an nyeah malam cako? Ba dek lonyap dianyuk-an sinama; pek ampiang Mita?

        Mita lah paham jo aia muko da Buyuang. Dulu kotu da Buyuang cimburu jo ughang Kupaghik, jak iko pulo ’style’ nyo. Jadi, dimain-mainkannyo jari manih-eah dek Mita. Pek jari manih sabolah suok reah, lokek cincin perak. Iyo, cincin perak!

      Bukankah cincin itu, da Buyuang nan mambolian sangkek inyo baru poi ka Padang kuliah dulu? Baboli pek pokan Komih. Dek gara-gara poi pokan komih, malinteh jalan pek tugu simpang tigo, ampiang talendo Mita dek bendi. Untuang tangan Mita di elo da Buyuang copek. Ndeee....lain pulo raso eah kotu itu. Ndak lolok Mita samalam dek nyeah reah. Dan kini, cincin hadiah da Buyuang itu masih ado..... Nde Tuhan Ollah Nan Kayooo,…masih ado pek jari Mita!

        ”Uda lah tau sado an nyeah kan?” tanyo Mita. ”Iyo. Olah.....”Buyuang manjawek. Cincin nan bakilek ditimpo cahayo pagi daghi arah bukik Andieng reah, manguekkan ati Buyuang!

        ”Ntu baa dek uda kini?” Mita indak sobea.

       ”Den lai manyadari sia den Ta. Sia keluarga deen. Kok ati deen nan Mita tanyo, ndak parolu dijoob lai. Lah basuluah matohari, nyampang takilek ikan dalam aie, lah joleh jantan batino eah...”

       ”Tu, lai bisa uda datang ka rumah jo mamak-mamak uda?” Mita arok.

       ”Itulah nan manyompa ajak malam. Urang ilie reah lah joleh duduak pangka eah. Den maghabo-ghabo ajo baghu.  Kok saliang mandului, indak elok pulo ditengok ughang....”

       ”Jadi, baa nan ancak?” Kini Mita nan sobak muko eah. Obuak Mita jatuah ka dado .Bilalang tobang pek pamatang. Ujuang umpuk ditenggeri titiak-titiak bulek aia ombun. Oi, daun kambie, oi daun pinang, oi puncak bukik rao-rao, baa lah lai keah?

       ”Kemungkinan nan paliang buruak Ta, awak poi laghi maghantau, wak bao ijazah wak. Wak caghi wakotu nan topek....” da Buyuang sarupo mangecek soghang. ”Tapi iduk-awak mungkin maghano, sobab ibu jo apak pasti bongih ka awak.....” sambuang daBuyuang pulo.

Mita manunduak toruh. Sudah tu dijawab eah kecek Buyuang,”Iyo kecek Uda tu; a guno eah awak sikola tinggih, kok itu nan awak baleh ka apak jo ibu. Indak sampai ati awak do da....”

      Buyuang manogak-an kapalonyo. Mamandang ka Mita jo mato sayu. Sa sayu awan di ateh bukik Cintuak. Iyo, ontah baa ajak eah, roduk ajo cahayo matoaghi nan lah tapancea topek di pungguang bukik Andiang. ”Cubolah Mita timbang-timbang bona samalam duo malam; samo wak pikie an, kalau dituruk kondak apak jo ibu Mita, apo akibatnyo; kalau ditulak, apo pulo akibatnyo. Nyampang sacaro objektif memang elok nan kondak apak jo Ibu, awak usaokan bapandai-pandai maubek ati wak Ta, bialah awak nan mangalah....”nyeah.

     ”Uda!?” Mita tadongak. Ringan bona uda mangecek jak itu? Apo botua kecek urang-urang di majalah jo koran nan kodok dibaco eah pek pustaka di  kampus,”Laki-laki sering berfikir lebih rasional, sementara wanita mengarah subjektif emosional.” ”Kok wak cubo baghundiang jo apak Mita bisuak malam baa?” Mita mambaleh, ongok Mita agak sosak. Tapi sipatuang -sighah duo-tigo tobang santai ajo pek pucuak daun padi. Ajak indak tau ajo eah jo ati awak!

       ”Jadihlah kok bitu. Cubo Mita ajuak-ajuak ati ibu jo apak malam biko, sasudah makan. Caghitolah dulu tontang wisuda Mita jo inyo, sudahtu cubo tengok tanggapan nyeah ka awak. Ka si Buyuang nan bansat maloghat nyak!” Buyuang lah agak lancea ajo mangecek. Kaluea jantan eah!

       Mita tambah tapaghangah. Da Buyuang ?!....... Tapi, saindak-indak eah, ide da Buyuang reah bisa untuak jalan tongah. Iyo kan? Siapo tau, kalau dilobi intensif, apak jo ibu paham perasaan awak? ”Cuma, sabagai gambaran Ta, wak mungkin ndak tolok ma’isi’ sabanyak nan dibao dek keluarga si Irsal tu do. Ta kan tau kondisi kaluarga wak....” tambah Buyuang.

      ”Jan di pikie an itu dulu Da. Salangkah- salangkah wak salosaian,”jawab Mita. Utak eah lah kodu ajo raso eah; walaupun IP kumulatif-eah di ateh tigo! Ajak sompik ajo pamandangan, ajak ketek ajo matoaghi!

      Daghi arah tobek longgea, nampak ughang mambao bantiang. Mungkin ka poi ka pulau, topi sinama. Indak joleh bona, ca lah gak eah reah? Ati Mita jo Buyuang jadi indak lomak, kalau inyo lalu ka pamatang godang di ampiang dangau keah. Mita mamandang ka da Buyuang. Buyuang mambaleh jo mato sayu. Sudahtu lah saghontak ajo kaduonyo, sapakat ba baliak kateh. Nan joleh; Mita ka mangecek jo ibunyo biko malam! Tolong dih Tuhan.....tolong bona kami......

      Suaro loncek pek mato aia, tangoghan sampai ka tongah sawah. Sauk-ba sauk! Unggeh kalayau coklat- mudo tobang daghi arah batang kuini topi sawah. Malinteh di baliak daun pinang, malayang, baduo, malinteh awan...... Mungkin arok kok lai aghi ka paneh; indak ujan ghonyai.... Dan langkah kaki Mita, tatogun-togun mandaki tobiang.

       Buyuang tamonuang soghang. Duduak manyangkuang topi tobek. Pek ampiang dangau sambayang. Lah tujuah kali piambang digodoh-godoh eah jo batu ketek. Aia tobek baghiak-ghiak bulek satiok digodoh Buyuang, ajak ombak malingkea. Ikan tawi, nan maongok-ongok amping palantea- nyosah takojuk, laghi ka bawah panyawea....

       Ta-intuak ati! Sobab, katiko di sunui nyeah ati Mita cako, jo kemungkinan ’balaghi ka ghantau’ Mita indak marespon setuju. Padahal, ghaso-ghaso eah, itu nan lai ka mungkin nyeah manjago tali nan mauntai pek ati. E yayai jeah; den godoh lah piambang keah sakali lai? Plung!

       Mita lah lucuk kateh! Biduak lah taombang-ambiang..... Mato eah lah boghek. Sobok jo Yenni pek tobiang, disapo eah, senyum ketek ajo eah nyeah. Maninjau padi lah masak, batang kapeh di topi jalan; ati ghisau babao juo golak, ajak paneh manganduang ujan! Daun pudiang pagaghan di engguk an nyeah! Putuh!

       Lah ngalucuh ajo masuak ka umah. Apak eah sadang manggusuak-gusuak onda pek laman, tacongang ajo. Tapi, kakobeh ughang tuo; copek apak eah mangaroti..... Ibu eah malirik pulo daghi dapua. Tapi ontok ajo ibu eah. Nyo sayang bona ka Mita. Ba pulo ka indak? Daghah dagiang eah; inyo nan ma laie-an! Inyo nan ma nyusu-an! Inyo nan mandukuang-dukuang sajak ketek; apolagi kalau sadang angek badan Mita....

        Missi lobi Mita ka ibu eah lai indak gagal gak nyeah reah. Buktinyo, pek dapua, sasudah sambayang asea, nyo lah mangecek-ngecek jo ibu eah. Lah panjang kato! Lah bacaghitoan, baso inyo sabonea eah, ado ’apo’ jo da Buyuang sajak dulu. ”Apo” nan ’apo’ reah-ha! Ngaghoti ajolah soghang! Ndak pandai den ngecek-an nyeah reah!

       ”Dek ibu kau keah Ta, pek ma kau ka sonang. Kok sonang iduk kau, ta pandangi dek kau adiek-adiek kau; lah jadi dek deen reah,”nyeah nan Ibu eah. Kan lai ancak reah?

      Sudah itu ; ibu jo apak eah lah mangecek pulo manjalang magoghik pek topi laman. Ndak tangoghan bona dek Mita reah. Tapi, pastilah tontang inyo! A leah lai?

       Sudah makan malam, adiek Mita nan ketek lah bakoghuah pek tangah umah, di ateh lapiek. Mita saketek ajo makan eah. Asa jan ma-alang lapea ajo! Padahal, gulai cipuk jo ikan kaluw goreang lai ’manari-nari’ juo dalam pinggan ba idangan.... Dan, apak Mita, maimbau daghi ruang tamu, ”apak nak mangecek Ta....”nyeah. O Tuan Ollah Robbi, ba aka lai? 

Apak Mita duduak pek kurisi panjang. Mita duduak pek kurisi di adok-an nyeah. Mita, lah siap jo sado perbendaharaan argumentasi. Apak eah lai tonang ajo, indak gadobak-gadebuk ajak inyo, takah eah deah. ”Pek niaklah duduak anak apak ah..”nyeah nan apak eah sambia malotak-an tangan eah pek ampiang bolah suok.

       Mita pindah duduak ka ampiang apak eah. Iyo lah lamo inyo indak duduak pek ampiang apak. Dulu kotu partamo ka Padang, ma-antea poi kuliah, di ateh oto Bahagia. Sudah itu, kotu poi bagholek ka Ampang Godang, ba ombeng mangawani apak eah sangkek ughang libur tahun nan lalu.

        ”Lah tabaco ati kau dek apak Ta,” nyeah, mamulai kecek. Mita malengong ka oman apak eah. Sabontea! Sudahtu nyo manunduak baliak. ”Etongan iko indak apak jo ibu nan mamulai do,....tapi ughang ilie reah nan datang.....” apak eah manukuak kato.  ”Tapi keputusan, kan pek awak kan pak?” Mita baliak batanyo. ”Iyo. Tontu iyo. Bamufakat awak. Wak timbang elok bughuak eah....” jawab apak eah.

        ”Dek kami, apak jo ibu kau, jo Mamak kau bagai, kok ado ughang nan datang, kan barati anak kami lai di pandang ughang reah. Tontu kami sambuk jo elok-elok. ”nyeah nan apak eah.

       ”Tapi Mita sabonea-eah,....” Mita taonti mangecek. Sadar inyo copek, baso da Buyuang lun pernah basobuk ka apak eah lai. Nde tuan!

        ”Iyo. Apak ngaroti.... Nan ka ma makai kau....nan ka marasoan paik manyih eah, kau....” tambah apak eah. Ibu eah lah soto pulo duduak kiun.

       ”Nyampang batanyo apak jo ibu ka kau, nan pek ati paliang dalam, jak a laki nan katuju dek kau..... Tontu nan elok laku eah, ancak agamo eah, lai ba pandidikan, lai batangguang jawab lahie batin,....jak itu kan?”

        ”Ho-oh.....” Mita maongguak.

        ”Kini, cubo awak pandangi basamo-samo, si Irsal tu. A kughang eah nampak dek kau?”

        “Iyo indak ado reah,…..”

        “Jadi, kan lai setuju kau reah?”

        ”Tapi bitu Pak, den...”ta kado-ok pulo lidah Mita baliak. Ba jak e keah?

        ”Inyo kan lun tontu sayang ka awak lai Pak?” nyeah nan Mita.

        ”Nyampang indak katuju, ntu ka datang ajo mamak-mamak eah kiko?” apak eah batanyo. Iyo iah? Kok lah di pandang-pandang jauah an nyeah wak jak dulu? Tapi,....da Buyuang...

       ”Lai nampak inyo aktif pek masojik ilie dek kau?” tanyo apak eah.

       ”Lai....”Mita manjoob.

       ”Lai obeh ibu jo apak eah dek kau?”

        ”Lai...” Iyo, apak jo ibunyo guru. Bahkan guru agamo pulo lai.

       “Baa nampak dek kau inyo, bughuak?” Mita ontok. Sudahtu manggeleang, lomah ajo. Iyo, si Irsal reah lai ‘sadang elok’ pulo panampilannyeah!

        “Jadi, kan lai indak ado cacek eah treah” tanyo apak eah. Nde, baa lai ko? Dado Mita lah boghek. Sosak ongok! Raso taimpik, tapi ndak joleh deah!

       Tibo-tibo apak eah malotak-an tangan eah ka kapalo Mita. Ndeee….sojuak ati! “Apak jo ibu sayang ka kau nak……” nyeah. Di osok-osok eah ubun-ubun Mita.  “Nyampang sonang iduk kau, sonang pulo kami.  Kok nyampang lai panjang umua kau, taraso dek kau isuak, ba pulo punyo anak.” Apak mangecek jo lomah lombuk. Tambah boghek kapalo Mita. Ntah baa ajak eah, lah manughuk ajo aiemato eah!

Padahal, lah digigik-eah bibie eah jak cako….. lah manitiak ka pao eah. Ibu eah pindah pulo duduak kiun….lah dipaguk-eah pulo bahu Mita.

        Jak cako nyo siap tempur jo alasan. Banyak !  Tapi, kini baa dek lah caie ajo sado eah? Lah diapik ibu jo apak eah, jo kasiah sayang, lah jadi paja ketek ajo eah.....ndak ta ta-an isak lai..... Lah maonjak-onjak bahu eah......

      Dan kasudahannyo, jatuah tarorau Mita pek pangkuan ibu eah. Dilopeh-an nyeah sagalo boban. Yo bona marorau godang! Ndak obeh aka lai....ibu eah lah manangih pulo. Ibuuuuuuuu.....uuuu...uuuu...uuu....

Lai takona jo bujang-tangguang nan manggodoh-godoh piambang pek tobek baghuah? Ten, pek ampiang dangau sambayang? Nan matonyo sayu reah ha? Iyo. Buyuang!
Tia an lah den poi nyeah. Kok iyo indak katuju ughang mudiek keah jo deen, nyeah. Padahal den indak bonci tio deah. Den indak dondam tio deah, nyeah.
Den lai katuju juo jo bondea topi lobuah keah. Den lai sayang juo jo tobiang keah, nyeah. Den lai tasangkuk juo ati pek daun kaghambie jo daun pinang keah,nyeah.
Indak ka den lupo an sinama dooo, nyeah. Indak ka den sisiahkan daun padi nan balompok tangah sawah reah, nyeah. Lai tabau juo umpuk basah pek topi pamatang ten. Tapi, ndak baa deah; den poi, mangalah den; den ubek ati den soghang, nyeah
Buyuang lah duduak diateh oto ANS pek Aua Kuniang. Sabontea lai mungkin bangangkek gak nyeah. Den indak ka manangih reah! Den jantan!
Kok taibo ati den, den gigik ajo lah bibie den! Kuek-kuek! Den kopa ajolah jaghi den! Kuek-kuek! Kecek apak den, kincie baputea, kadang iyo di bawah, kadang kan di ateh?
Jan tengok pulo ka muko den lai. Aia nan mamboghan-boghan pek mato den keah, "kalimponan" cako meah. Banyak gabuak pek loket Kiktinggih keah! Yo bona! Indak den pulo nan ka manangih reah!!!! Indak!
Apak den lah baposan bona, jan di patughuk-an ati ang Yuang, nyeah.
Ma saputangan amak den cako? Dilap lah setek aia nan kaluea pek mato keah. Indak ibo tio ati deah! Indak!!! Den lai kuek. Sadangkan sinama lai den ghonangi! Den olun kalah lai!
Indak ka ta dongea an dek den tambua ughang baghaghak deah, nyeah. Kok ka ba tando, ba tandolah! Kok ka manjalang ka duduak-an , jalanglah! Kok ka ba robab, ba robablah! Tu, titiak aie pek suduk mato eah. Eh, lah den kecek-an kan? Indak ibo tio deah. Indak nangih tio deah. "Kalimponan" ajo nyeah! Yobona!
Kok ka mambantai kambiang, bantailaaaaaah! Kok ka mambuek gulai cimbodak jo ghobuang, bueklah! Buek bona, nan lomak! Kok ka manggoreang gubik, goreanglah. Goreanglaaaaaaaaah!!!! Nde, pantuang!, ponuah iduang dek aia!
Kok ka ba alua, ba alua lah! Kok ka ghami ughang, ghamilaaaaaaaaaah! Kok ka makan koghak jo kuah gulai cimbodak, makanlaaaaaaah!!! Den indak soto do. Den poi lai! Kok ka senyum, senyumlah, den poi lai. Kok ka golak-golak pek dapua, maisi pinggan ughang nan tibo, golaklaaaaaah! Golak bona lah!!!!! Den indak ibo tio deah, Indak nangih tio deah. Iko , gabuak masuak ka mato meah. Itu dek sighah!
Iyo Kupak ati den. Tapi tia lah den ajo manangguang-an. Indak den ka mintak ongok! Den jantan, nyeah nan apak den! Den jantaaaaaaa.!!!! Hiks, hiks!

Ba pulo ajak-eah supir oto ANS keah? Baghu pek Simpang Jambu-Aia , lah ba putea pulo kaset nan 'manjojok' keah? Tiar Ramon! O-ooo-ooo-ooo---iii.......adiak nan manih jawab tanyo, sadang ba iyo ba indakkan, .....tangguanglah dosooooo, sa lamo nyoooooooo........o-oo-oo-oo--oiiiii....tangguang doso, sa lamo nyoooo.... (kau indak ba doso reah Diak, .....den nan olun baghuntuang, nyeah).

Stokar oto ma leah ka peduli jo awak. Nyo ma okok-okok ajo jak cako pek pintu. Amak nan mambao anak ketek pek bolah kida ten, lah sibuk ajo mangaluea an bika, untuak anak eah. E, yayai.....

Heh, Tiar Ramon, baghonti lah ang! Di laie sajo nampaknyo sanang, di batin luko denai suruak-kan, nyeah. Olah reah Tiar!

Weh, supir, indak ado kaset nan agak dangdut sketek? Mus Mulyadi, Ida laila, atau Oma Irama, baiaklah...jan itu juo di putea! Di ghameh eah dado den!

Cingkariak stokar oto ko ado duo urang nampaknyo. Nan ciek, lah agak pangkek. nan sorang lai, paja mudo tangguang, nan dari tadi marokok sajo karajonyo. "Pek lakang ten lah maisok Nak Bujang, kamanakan ang indak bisa lalok dek asok rokok ko ha.." kato ibu nan duduak sabolaj kida. Anak ketek nan dipangkunyo, lah manangih.

Tapi, cingkariak tu indak baronti juo. Nyo tengok amak tu sabontea, sudah tu nyo toruh-an lo maisokj. Asoknyo ba piuah-piuah ka dalam, di ombuh angin. Amak tu agak songa nampak dek Buyuang. Tapi baalah, awak manumpang, nan punyo oto iyo inyo!

Dari pado ighuak jo tangih paja ketek, Buyuang manjulua ka muko ka supir. "Tolonglah amak nan mambao paja ko da Supir. Adiak nan marokok tu indak amuah baranti do..." katonyo. Supir malengong ka Buyuang. Sudahtu ka amak nan mamangku anak tu. Sudahtu ka cingkariak nan mambalakang togak pek pintu. "Ontianlah okok ang tu dulu Jon," nyeah.

Si Jon lah manengok ka supir. Sudahtu ka Buyuang. Paneh ati eah ba kaduan ka supir. Nyo coliak buruak pulo Buyuang. Buyuang, indak mancari-cari masalah. Jadi nyo acuah sajo. Padiea an ajolah, paja jolong godang reah!


Lah tibo pek Gunuang Medan, baghonti makan, si Jon, cingkariak oto ko masih madok-buruak juo ka Buyuang.  Mungkin olun bapangalaman paja ko mambao panompang oto, gak nyeah lai. Olun pandai maambiak ati ughang pasisie.  Buyuang lah mailak-ilak ajo. Turun ka bawah, poi ta kaie jo makan jo sambayang asea bagai, lalu Buyuang ka pintu lakang. Wak poi mancaghi iduk! Indak mancaghi musuah reah!

Pek muko umah makan, sasudah sambayang, lah konyang poghuk, lah duduak Buyuang pek tembok. Ughang  lain ado nan togak-togak ajo, ado pulo nan maepok pek tembok teras reah. Si Jon cako lah lalu pulo di muko Buyuang. Buyuang pura-pura manengok ka nan lain ajo.


“Hoih, sinan kalau managah maisok jan ka supir …!  Lansuang sajo ka waden! Tu mancirik parangai namonyo tu mah!” katonyo sambia mambao boto aqua godang ba isi kopi. Dilotak-an nyeah pek sabolah kurisi supir, sudahtu nyo lalu pulo baliak ka muko Buyuang. “Lai mangarati ang tu?! Kok kurang sanang, malah bacubo di lakang tu ha!” Nyo garegak pulo Buyuang.

Jan mancaghi-caghi  lantai tajungkek pulo jo paja ko lai…, kato Buyuang dalam hati. “Iyo Da. Mooh nan cako reah dih….” Nyeah nan Buyuang. Buyuang ba usaho ramah, sambia golak ketek.

Tapi, dek dasar cingkariak sadang paneh, Buyuang lah elok-elok di anggap eah pulo mancimeeh. Golak Buyuang di anggap nyo maghondah-an inyo.  “E…pantx! Galak lo ang. Galadia!” katonyo.

Tasirok darah Buyuang di ariak si Jon tu.
“Jago bona ati ang muah Yuang,” nyeah nan apak eah kotu njalang ka poi. Jadi mangalah ajo Buyuang.

Dek mangalah jak itu, ruponyo tambah lanteh angan si Jon ko. “Urang oto tambang ka Jawa ko indak cirik se isi paruiknyo do, lai tau ang?! Ba ka den agiah pangka talingo ang tu?!” si Jon manggaretak sambia bantuak ka manenju muko Buyuang!

Urang di sakitar itu, mulai manengok ka Buyuang. Buyuang nyak, dek si Jon lah sarupo ma ayunkan tenju, tibo pulo insting lamo eah. Lai takona kotu poi manengok pacu kudoh dulu kan? Uni pajak nasi Kopau, nan mandului tampea preman Kandang Kudoh pek Kubu Godang?

Pangalaman manonton cokak uni jo preman tukang palak reah, lai mambokeh pek ati Buyuang. Katiko itu, uni lopau nasi reah, copek sa tangah dotiak maangkek kaki, mandului tangan preman.  Hasilnyo; preman tu talungguak ka dalam bondea!

Kini, katiko si Jon sarupo ma ayunkan tenju ka inyo, pangona Buyuang lansuang ka ‘garik-uni-pajak-nasi’ reah. Tu-lah! Lah tibo pulo ujuang kaki Buyuang pek ulu ati si Jon. Klapak!! Ontah baa caro eah cako…Buyuang indak pulo takona amek lai! Ntu lah ta duduak se si Jon di muko  nan rami reah.

Indak omuah manangguang malu, si Jon lansuang togak, lansuang malompek ma nangani Buyuang. Muko eah lansuang sirah! Dek Buyuang indak maraso basalah, nyo nanti pulo dek Buyuang ! Ampiang ka tibo tenju pek bibie eah, nyo malengong. Sudah tu, bakilik kakida, nyo angkek pulo lutuk eah dek Buyuang. Persis gerakan uni pajak nasi pek Kubu Godang dulu! Hasilnyo pun samo! Lutuk Buyuang masuak ka karampang , dan si Jon ta jalea pek tanah! Inyo ka togak baliak, lah dipogang-an nyeah dek ughang ghami. Supir oto cako, nan badanb eah godang tinggih, kapalo botak, lah tibo pulo pek itu. “Manga pulo ang?!” di oghiak-eah si Jon. “Paja ko baghu meah. Jan dimasuak ka ati bana…” kato sopir tu. “Daripado marasau se di kampuang dibaok jo oto, kok lai ka tumbuah pangananyo. “ tambah uda sopir reah. He, patuklah  ajak itu pamburansang eah iah?
Agak malang nasib si Jon sa aghi keah. Ulu ati eah podieh. Kaghampang eah ngilu. Sudah tu, konai bongih pulo dek pak Supir. Lah manengkak-nengkak ajo inyo mambao embe daghi lakang, ka muko oto, mambasuah comin. Lah basabuni jo panggolan kayu, daghi ateh sampai ka bawah, ba simbui jo aia. Lah barasiah, nyo poi ka dalam, makan jo pak Supir nan soghang lai. Padiea an ajolah! Nyo sadang mancaghi pangalaman iduk!

Buyuang lah waspada ajo duuduak peng bangku eah. Sakali-sakali di tengok eah ka lakang. Si Jon pindah togak ka pintu lakang. Kok di bonaman nyeah ujuang obeang ka kuduak wak , baa? Indak takolok bona Buyuang reah, lah ma akuak-akuak ajo ….. Lopek nan di tungkuh-an ibu eah kan lai ado juo? Abih-an lah…..jan ghosan pulo eah bisuak.

Tibo pek Kopea Ferry Bakauheni, si Jon lah bamonuang ajo duduak jo Cingkariak nan soghang lai pek topi pagea dek kopea. Agak manengkak-nengkak juo jalan eah takah eah lai…. Lah ibo pulo Buyuang manengok eah.

Diboli eah dek Buyuang okok samsu duo batang, pek pajak ampiang musolla ferry. Didatangi nyeah si Jon.
“Rokok…?” nyeah, sambia ma agiah-an okok ka si Jon. Takasima si Jon, nengok Buyuang. Ontah togak bulu kuduak eah, ontah ka bongih.  Tapi baa pulo ka bongih, nyo lah di tatar eah dek supir pek umah makan cako,”Kok lai ka kojo juo ang, elok-elok jo panumpang!” nyeah nan supir. Ha !

“Ambiaklah! Wak indak berang gai ka sinan do…” kecek Buyuang. Jolong-jolong eah gak ghagu-ghagu si Jon. Tapi nengok ka oman Buyuang nan sayu, indak goghah-goghah, ajak lughuh-tabuang ajo, jo jaghi manggigia lai nyo taghiek juo okok reah. “Den kadang-kadang pa emosian pulo. Biaso ajo nyeah reah…”nyeah nan Buyuang. “Ka Jakarta ‘uda’ yo?” nyeah nan si Jon sambia maisok Samsu. Lah agak ba cahayo muko eah setek! 

Dek masalah jo si Jon lah salosai, lah agak dapek Buyuang ma-ongok saketek. Sudah sambayang pek musola fery, lah saparo panyaboghangan, lah dapek duduak bamonuang pek kurisi suduk dek. Lah tampak panumpang kopea kasadonyo. Ado nan duduak jo anak binyi eah; ado nan lolok mangapah jo laki eah (ntah iyo laki eah, ntah indak…), ado nan ma ota jo kawan-kawan eah.

Ado nan tangoghan ba bahaso batak, ado pulo nan ba bahaso jawa, ado pulo nan ba bahaso malayu lampuang, ado pulo nan ba bahaso awak. TiVi pek bolah muko, iduk ajo toruh. Nan manonton ado pulo.  Ado nan ba kapiah oji, ado nan sulah, ado nan ba obuak panjang, ado pulo nan obuak eah ajak saghang-tupai ajo. Ado nan ba lilik, ado nan ba baju bolah pendek, ado pulo nan nampak katiak – busuak-eah. Heiii…dunie….!

Kok di tengok ka badan awak, wajah sayu, baju lah lusuah. Lah samalam pek ateh oto. Lopek ibu olah abih pulo. Ka makan mie ajak ughang pek pajak kopea geah, indak lanteh angan reah. Gulo-gulo pek saku lai ado juo. Iko ajo lah di kunyua-kunyua!

Sudah tu, dibukak dompet. Di pareso alamat si Maran. Lai indak jauah dari Kalideres reah, nyeah dulu, kotu bakirimi surek. Maran keah, kawan samo sikola kotu pek salopeh SMA dulu. Ten pek akademi anu. Inyo lai kawan dokek juo. Malahan aghi ghayo, pernah datang ka kampuang, mudiak keah. Nyampang lah basuo, kok lai ado ka kakok, kok lai barasoki, tontu ajak ughang nan duduak pek bolah ken itu den isuak iah? Bisa manyiboghang kopea jo anak-anak. Binyi lah mangaluea an sia pulo ponuah jo makanan. Paja lah golak ba main-main jo adiek-eah. Ndeee…aso ka lomak!

Tengoklah, keluarga tu, binyi eah ancak, batikuluak. Anak eah putiah-putiah. Anak nan tuo di kojea eah dek adiak eah. “”Ariiii…..ntar jatuh lo!” ibunyo tangongan maingekkan anak-eah. Sudahtu anak eah nan godang laghi ka pangkuan apak eah. Anak nan ketek tibo pulo pek itu. Golak – golak di pangku apak eah…. Ndeee aso ka lomak, nyeah nan Buyuang ba kayal….. 


       Fery marapek ka palabuhan, sauah ba buang ka daratan, urang maikek oghek-oghek. Pintu kopea tabukak lambek, oto cirobuk nak kaluea. Tinggalah lauk selat Sunda!
        Merak mananti ari lah sonjo. Oto bapacu langgea ma langgea, lah masuak pulo ka Cikupa. Lai sa irama poruk jo supir, disiko poruk babunyi, di supir lai baronti. Mikrofon salamat datang lansuang manyambuk, pasisie turun ka bawah, toilet  caghi daulu. Kalau lah lopeh sosak ka lakang, di ansua masuak ka rumah makan. Gulai tambusu jo kalio ati, ghondang baminyak jo goreang ayam, mananti tangan ka makan.
       “Makan da? Jo a? Duduaklah Da.....” manih palayan manyapo. Manjangkau ka dalam dado. Merengguk ka dalam dompet. Ndeh tuan! “Talua dadar ado?” batanyo Buyuang, indak kuek-kuek.  Tolua dadar kan lai indak maha bona reah kan? 
      “Lai da. Duduaklah. Minum jo a Da? Teh manih? Kopi?” Sudah badingin-dingin jo angin lauk pek selat Sunda keah, raso ka lomak kopi susu yo ndak? “Aia putiah ajolah. Kok lai ado, nan angek dih!” Buyuang manjoob. Sarupo biaso, matonyo sayu!
       Ciek ajo pangona, kok dapek berhasil poi maghantau, jo jalan lughuh. Itu posan apak jo ibu,.... Eh, ba pulo dek takona ibu? Tampak-tampak langkah ibu poi ka baghuah. Kadang manjujuang piambang pek tobiang. Hus! Indak buliah jajek! 
    Lah tibo masuak Jakarta, lah rami lampu dalam kota, lah silau mato mamandang, rumah si Maran dima kok lah…. “Sungai Dareh ! Sungai Dareh abih!” Kato kondektur nan agak tuo, togak pek pintu. “Kalideres! Kalideres!” katonyo lagi. “Siap-siap Kalideres!”
       “Turun dima?” Kato supir ka Buyuang. “Terminal ko atau di pool?” “Terminal sajolah da. Kawan awak lai dakek siko rumahnyo..” jawab Buyuang. Tapi iyo lah ragu pulo mancaghi umah ughang pukua samilan-saparompek ajak iko iah?
        Sasuai jo alamat nan batulih pek karoteh dalam dompet Buyuang, iyo iko takahnyo rumah Maran. Rumah panjang ba petak-petak. Rami juo ughang duduak pek teras eah keah. Ditanyoan lah ka apak nan bakipeh indak ba baju tu ha, mungkin ka angek-an inyo gak nyeah!
       “Kagak ade nyang namenye Maran disini dik. Kalo bang Imron, ade! Tu , nyang rumahnye besar, seberang jalan. Pegawai tatakota dienye!” kecek apak tu. Binyi jo anak eah lah soto pulo kaluea manengok Buyuang batanyo. “Nyang orang Padang ye bang? Emang disini ngontraknye dulu, tapi ude pinde. Katenye beli rumah perumnas. Kagak tau tuh, dimane…” tambah binyi eah.,..
      Ndeh, baa lai keah? Kok ado bona Maran pek iko, manumpang pek umah petak sompik ajak iko, ghami dek paja-paja ketek, lai lah ka takolok badan keah? Iyolah sompik Jakarta keah iah? Indak ado tanah poghak sa godang poghak Kiah Tapa pek iko reah! Ughang Ndughiang ajo nan ba padiea an poghak langkeh liek…
      “Kalau masojik nan dekat dari sini, dima pak?” tanyo Buyuang. “Na ade tu, seberang sono. Lewat jalan gang pintas. Masjid peta , anu, Nuruniyah. Kalo pake bajaj, muter, enakan naik ojek. Cuman ati-ati, kalo malam suka minta gede. Pada nakal tu…” kato apak reah. “Iyalah, makasih banyak..” nyeah nan Buyuang. Jalan kaki ajolah. Sadangkan maminteh sinama ka sipingai, lai ba jalan kaki ajo wak nyeah. Sampai ka Andiang bagai. Lotiah-lotiah saketek…..
      Lai indak bakunci masojik iko kigho eah reah. Syukur bona wak. Lah ma ambiak uluak, lah sambayang duo rakaat, lah ba lotak-an kapalo di ateh tas,  lah ba piciang-an mato sambia talontang. Lolok lah badaaaan......jan dikona juo nan itu reah........
      Karatau madang di ulu, ba buah ba bungo balun. Maghantau Buyuang daulu, di umah ‘paguno’ alun. O mato, tapicienglaaah, ...bisuak poi malah ka Ciputat ten, ka umah Etek Sima, dusanak sepupu ibu. Weh, ongik, jan datang pulo ka talingo den keah!  
      “Maaf, mas. Dari mana ya?” lah ado ajo ughang nan masuak ka masojik keah, sadang Buyuang ba ayun-ayun jo pangona eah. Ka ilie ka mudiak. Takojuk Buyuang! Lansuang nyo duduak. “Saya kemalaman. Saya ni dari kampung. Tadi mencari kawan disitu, tapi sudah pindah. Tidur saja saya di mesjid ni. Besok di cari lagi lah,” jawek Buyuang. Ughang itu duduak dokek Buyuang. Di ulua kan nyo tangan eah. Basolaman! “Saya penjaga masjid Mas”, kecek eah. “Sering kok musafir tidhur di masjid kita ini..... Mas dari mana ya? Kayaknya dari Sumtra logatnya?” tanyo eah. “Iya, iya, saya ni dari Payakumbuh,” nyeah nan Buyuang.
“Jadi saya mintak izinlah tidur sampai subuh disini ya pak...” tambah Buyuang.
       “Iya mas. Saya juga bukan dari Jakarta. Saya dari Pekalongan, Dulu saya ikut kawan merehab masjid ini. Oleh karena pengurus masjid senang sama saya, disuruhlah ngejagain masjid. Tu, pondok saya di belakang mihrab,...” kecek panjgo masojik reah. Oooo,....gaghin eah kigho eah.
      “Pak Syamsir malah yang minta saya tinggal disini. Dia itu orang Padang juga lho. Dulunya ketua pengurus masjid. Sekarang jadi penasehat aja. Tapi kita-kita pada hormat tu sama beliau. Orangnya baik banget..... “ kecek ughang reah. “Eh, iya, nama mas siapa ya, saya Buyuang,” kato Buyuang. “Aku namanya Kirman, Sakirman...” Kirman senyum.
      Lah panjang pulo ota jadi eah. Kigho eah Kirman keah lah bakeluarga, tapi binyi eah pek Pekalongan. Sakali sabulan inyo pulang ka kampuang eah. Pek masojik keah inyo di agiah eah dek pengurus bogheh  jo pamboli ‘lado bawang’ tiok bulan. Kalau pagi, puku salapan, nyo ba kaliliang ka kampuang nan bolah mudiak masojik, malinteh jalan, bajajo aia dalam belek. Banyak ughang nan mamboli aia ka inyo untuak minum. Kalau nyosah jo mandi, pek sungai ketek ajo. Aia sungai reah, kodu. Ajak aia lonyah pek jalan mudiak. Tapi ughang tahan ajo mandi jo nyosah pek itu.
      Subuah mas Kirman lah obang. Buyuang copek-copek ba uluak, basuah muko. Ghangkik-ghangkik badan eah. Sudah sambayang subuah ba jamaah, basoboklah inyo jo pak Syamsir reah. Mas Kirman nan mangecek-an ka pak Syamsir, baso Buyuang baghu tibo daghi Payakumbuah. Tasangkuk ghaso eah ati ngecek jo pak Syamsir keah. Iyo elok inyo takah eah. Sojuak ajo ati mandongea inyo mangecek. Obuak eah lah agak putiah. Tapi mato eah ajak ramah bona. Maco lah posai dek ombak. Lah lamo makan asam gagham pek ghantau!
      Itulah, dek takadia Tuhan, lah lokek Buyuang jo pak Syamsir kasudahannyeah. Kok poi dusanak ka pulau, iyu boli balanak boli, ikan panjang boli daulu; kok  poi sanak ka ghantau, ibu caghi dusanak caghi, induak somang caghi daulu....iyo bitu iah?  Tu mah, lah jadi pagawai umah makan Buyuang pek Senen. Umah makan reah pak Syamsir nan punyo. Kigho eah pak Syamsir ughak Kik tInggih, nyo punyo tigo umah makan pek Jakarta keah. Toko pakaian ado pulo eah pek Tanah Abang.
       Sujuk syukur Buyuang. Tia anlah indak basuo dulu jo Maran. Tia anlah kok bilo-bilo ajo mancaghi Etek Sima nan pek Ciputat. Lah dapek kojo, lah jadi reah dulu. Lai ado nan ka paisi poghuk. Kok lah lomak togak biko, di cuboan manggunoan ijazah ke kantua, ca nan ka tau, baubah nasib!


      Di bandiang jo manolong apak ibu pek pajak mudiak, iyo payah badan pek umah makan pak Syamsir.  Tapi, o dusanak kasadonyo, nyampang lotiah daghi iko, ka dikojoan juo !  Tekad pek ati lah bakuek-an bona. Sukses pek ghantau! Indak ado caghito ka pulang ka mudiak kalau indak tasonangan ibu jo apak reah! Nyampang bansat dibao pulang, eloklah ghantau di pajauah!
       Ciek lai, pek pajak makan keah, Buyuang lai indak banyak laku do. Awak paliang ketek. Badan manongah  ajo. Muko sayu. Lai pulo copek kaki ghingan tangan.  Mambasuah pinggan reah lah biaso pek umah. Mambolah kaghambie reah lah kodok. Mamangua, manjoghangan nasi, mangacau gulai, sampai poi balanjo, alhamdulillah, lai lancea!  Pek mudiak, dulu, mangaluea-an bantiang, ma-asak bantiang, manconcang batang pisang jo palopah kambie, lah mainan tangan dek Buyuang.
        “Yuang, uni Eni maimbau,”nyeah nan Ujang. Uni Eni reah anak pak Syamsir nan mamogang umah makan. Katiko Buyuang masuak ka tompek ni Eni, lah sabulan bakojo, kigho eah ni Eni mamboghian gaji eah. “Iko piti ang Yuang, nan sapuluah persen Uni mamogang-an. Guno nyo kok ado paralu tagageh, atau untuak tabuangan ari rayo nanti,” kato Ni Eni. Ndeee, Tuhan Alloh Nan Kayoooo,....aso ka titiak aia mato mamogang-an piti reah. Iyo indak sabanyak gaji ughang deah. Tapi kok dilipek duo, dimasuak-an ka dompet, lai toba juo! Manunduak-nunduak ka manusia indak buliah reah, kacuali ka Tuhan; tapi tabungkuak-an juo badan eah dek Buyuang sambia manyalami tangan ni Eni, manjalang kaluea daghi ruang ni Eni. Manjalang ka poi k a  Jakarta dulu, mancaghi piti ka ongkos ajo, bajua ayam bagai. Tandeh piti ibu eah. Kini, ondee.....sakopa! Sudahtu lah lapang bona ghaso eah umah makan reah dek Buyuang. Sado ughang nan basuo di bao eah senyum. Tukang mintak-mintak, di agieh eah pulo! Sudah sambayang luhua, di tambah eah sambayang duo rakaat lai, syukur den ka Kau o Tuhaaaan....nyeah.
       Bisuak eah Buyuang lah ba sipatu kain baghu, Dallas merek eah. Indak batali, tapi sasuai bona ghaso eah. Lah ajak Jet Lee pek pilem Cino. Baju kaus bagai taboli duo olai. Bighu mudo jo putiah. Lai basiso juo lai. Ditabuang lah iah?
         Kawan eah lah paham ajo. “Okok sa bungkuih Yuang!” nyeah nan Ujang. “Den nonton ajolah biko malam Yuang!” nan Edi pulo. Tapi Buyuang ngaroti, kawan bagoghah ajo; sobab mereka kan lai managhimo pulo! Mas Kirman gaghin nsojik Kalideres, iyo dibolian nyeah ghoti sakaleng. “Untuak mas kalau pulang ka Pekalongan,” nyeah ka mas reah. Godang bona ati gaghin reah !
      

Managhimo gaji, suasana kojo nan kodok bagoghah tiok aghi, jo Edi, Ujang, Iyon dll; indak taghaso maubah hati Buyuang. Walau mato totap sayu, indak pernah golak godang, tapi muko lah mulai bakilek. Makan lomak tiok aghi. Badan lah mulai pulo baghisi, mungkin dek bakojo bapoluah toruh tiok aghi gak nyeah.
      Lah ghaso umah eah ajo suasana pek umahmakan keah. Ni Eni lai elok pulo. Sudah tu, ughang nan makan ka iko lai ghami pulo. Lah pandai pulo Buyuang maetong makan pelanggan sambia mamogang buku ketek. Oman Buyuang nan barasiah, mambuek sonang pulo ati ughang nan makan.
      Buyuang, batambah pulo samangek eah. Ba pulo ka indak? Tiok aghi ditengok eah ughang makan. Ado nan datang jo kawan. Ado nan makan jo binyi eah. Ado nan tibo jo cingkiriang eah. Ado nan mamboli batungkuh sampai bapuluah-puluah bungkuh. Ditengok-tengok ughang nan mamboli nasi; iyo batambah samangek iduk dek nyo. Apolagi kok tibo ughang ba oto ancak, tughun jo anak-anak jo binyi eah bagai, lah jauah pangona Buyuang. Ontahlaaah...Yuang!
      Kadang ado nan tibo ba onda. Nan pek muko gagah. Nan ba bonceng ghancak. Tangan nan padusi lah bapocik ajo ka longan nan jantan. Kok duduak, kurisi ba egangan dek nan janan, monjo bona! Batanyai lomah lombuk, “Pengen lauk apa ya....” ondeh, lomak eah iduk kalian lai! Kalah bona den!

        Nan sa aghi keah iyo agak lain. Lain ajo perasaan.  A lah nan ka tajadi keah? Buyuang duduak bapikie-pikie pek suduk ruang. Ughang nan tibo makan, lah cepak cepong ajo.  Nan manjujuk ghondang lah tapicieng-picieng mato eah. Nan maelo ayam lah kulek-kulek-i maisok sumsum tulang pao eah.  Nan mamosan jus pokat ado pulo....
      Ha, tibo pulo ughang ka makan ciek lai. Ba onda mambonceang binyi eah. Lah parkir, lah ngecek-ngecek eah ka binyi eah, ungkin batanyo jo a ka makan gak nyeah. Atau ka ba tungkuh ajo? Dilayani lah copek. Kok ka makan, kok ka batungkuh, kok ka minum jus bagai....
        Tapi, olun jadi Buyuang batanyo, katiko manengok ka uda nan tibo reah, tagalenjek Buyuang! “Maran....?” aso ka ilang suagho Buyuang dek takojuk. Nan, ughang itu, lah tabalalak pulo. “Weh, ang  Yuang?!!”
        Indak lai. Lah bakatintam ota! Kigho eah nan di ombeang eah keah iyo binyi eah. “Baghu ka kawin kami pek kampuang,” nyeah. Manih pulo binyi Maran keah. Ketek-ketek ajo badan eah, tapi mato eah joniah.  Kigho eah sudah kawin, inyo lah pindah ka Perumnas pek Jakarta Selatan. Cako inyo poi ka dusanak ughang umah eah keah pek Kemayoran Lama, nyeah. Ontah baa pulo ajak eah,  dek untuang nan takadia, lah mangelok ajo ka umah makan tompek Buyuang bakojo keah, ka mamboli nasi bungkuh.
       “Bara bungkuh dek ang taragak? Den nan mambaia!” nyeah nan Buyuang. Ondeee,....poi bona lah ka umah Maran keah kok bilo-bilo eah nan ancak, iah?
      Baghu  lah bajalan onda Maran jo binyi eah, lah tamonuang pulo Buyuang sabontik.  Maran bakojo pek toko percetakan kigho eah. Lai  bapagunoan kapandaian nyeah mambuek-buek gambar jo huruf bakelok-kelok kotu pek Padang dulu.  Mambuek spanduk, mambuek undangan, lah kojo inyo bona reah! “Lah baghisi binyi den Yuang, lah indak tibo sakik  bulanan nyeah jak bulan nan lalu,” nyeh nan Maran cako.  Tibo pek badan awak, baa keah? Indak sangajo, di tukua an nyeah dek Buyuang pena pancatat makan ka meja!
      “Baa ang Yuang?” nyeah nan Iyon. “Eh, idak,...indak ba tio deah!” Buyuang copek sadar. Bayang-bayang piambang dalam tobek ampiang dangau sambayang; lansuang di usia eah dek Buyuang! Ndeh.....!!
  Nan sa aghi keah iyo agak lain. Lain ajo perasaan.  A lah nan ka tajadi keah? Buyuang duduak bapikie-pikie pek suduk ruang. Ughang nan tibo makan, lah cepak cepong ajo.  Nan manjujuk ghondang lah tapicieng-picieng mato eah. Nan maelo ayam lah kulek-kulek-i maisok sumsum tulang pao eah.  Nan mamosan jus pokat ado pulo....
      Ha, tibo pulo ughang ka makan ciek lai. Ba onda mambonceang binyi eah. Lah parkir, lah ngecek-ngecek eah ka binyi eah, ungkin batanyo jo a ka makan gak nyeah. Atau ka ba tungkuh ajo? Dilayani lah copek. Kok ka makan, kok ka batungkuh, kok ka minum jus bagai....
        Tapi, olun jadi Buyuang batanyo, katiko manengok ka uda nan tibo reah, tagalenjek Buyuang! “Maran....?” aso ka ilang suagho Buyuang dek takojuk. Nan, ughang itu, lah tabalalak pulo. “Weh, ang  Yuang?!!”
        Indak lai. Lah bakatintam ota! Kigho eah nan di ombeang eah keah iyo binyi eah. “Baghu ka kawin kami pek kampuang,” nyeah. Manih pulo binyi Maran keah. Ketek-ketek ajo badan eah, tapi mato eah joniah.  Kigho eah sudah kawin, inyo lah pindah ka Perumnas pek Jakarta Selatan. Cako inyo poi ka dusanak ughang umah eah keah pek Kemayoran Lama, nyeah. Ontah baa pulo ajak eah,  dek untuang nan takadia, lah mangelok ajo ka umah makan tompek Buyuang bakojo keah, ka mamboli nasi bungkuh.
       “Bara bungkuh dek ang taragak? Den nan mambaia!” nyeah nan Buyuang. Ondeee,....poi bona lah ka umah Maran keah kok bilo-bilo eah nan ancak, iah?
      Baghu  lah bajalan onda Maran jo binyi eah, lah tamonuang pulo Buyuang sabontik.  Maran bakojo pek toko percetakan kigho eah. Lai  bapagunoan kapandaian nyeah mambuek-buek gambar jo huruf bakelok-kelok kotu pek Padang dulu.  Mambuek spanduk, mambuek undangan, lah kojo inyo bona reah! “Lah baghisi binyi den Yuang, lah indak tibo sakik  bulanan nyeah jak bulan nan lalu,” nyeh nan Maran cako.  Tibo pek badan awak, baa keah? Indak sangajo, di tukua an nyeah dek Buyuang pena pancatat makan ka meja!
      “Baa ang Yuang?” nyeah nan Iyon. “Eh, idak,...indak ba tio deah!” Buyuang copek sadar. Bayang-bayang piambang dalam tobek ampiang dangau sambayang; lansuang di usia eah dek Buyuang! Ndeh.....!!

 Sudah sambayang Jumat, lah manangkuk ajo Buyuang pek tompek duduak eah. Ughang lah poi ciek-ciek. Ado juo nan lamo bado’a pek shaf muko; tapi inyo, indak obeh deah, ontah doa a-a lai nan ka di panjek-an nyeah ka Tuhan.  Ghaso lah koghiang ati dek mangecek ka Tuhan. Kadang-kadang lah tobik ‘malu’. Tapi, Tuhan, kan bakato pulo pek Qur’an; “Den katuju jo hamba Den nan badoa. Badoalah ka Deen, pasti Den kobua an,” bitu kan?
      Ado ‘kecek’ Maran nan ma-ugia-ugia  dalam ati eah.”Pikia an juo untuak mambuek usao soghang, Yuang. Kok ka jadi anak buah ajo toruh, lambek ‘togak’ awak. Den itu dek lah bagak barumahranggo. Kodai den iyo ketek. Tapi bisa den kelola soghang. Komah, lah bisa pulo managhiak onda,” tangiang-ngiang kato Maran. Tapi, inyo, kok ka ba pajak soghang, pek ma? Jo a modal? A nan ka di usao an? Ciek lai, pak Syamsir lah elok ka inyo. Kok indak di tolong pak Syamsir sakian bulan nan lalu, ontah baa iduk eah kini..... Tambah ma nakua Buyuang pek sajadah. Subhanallah, wal hamdulillah, wa laaailahaillallah, wallahu Akbar!
        Dikona-kona eah isi katubah kotik cako. “Saudara, kaum muslimin jemaah ju’at rahimakumullah; dalam rangka meningkatkan taqwa pada Tuhan SWT; adalah penting untuk diingat, ke istiqomahan kita dalam ber-amal. Sekecil apapun perbuatan baik kita, lebih penting istiqomahnya....” Iyo pulo reah kan?
       Tapi indak berarti samangek  untuak jadi ughang sukses, mambangkik batang taghondam ilang tereah! Kok Tuhan nan ba kondak, ca nan bisa ma halang?! Tibo-tibo tabayang oman ibu eah.... Sudah tu oman apak eah....Oman adiak eah. Batang ghambai.....Tobiang ka baghuah.... Sawah loweh tabontang.....Bunyi aia sinama pek popah......Pipik Bondo tobang basamo-samo..... Ontah baa ajak eah, tangan Buyuang la mangopa, baghubah manjadi tenju!  Ontah a pulo salah sajadah, lah konai tenju ajo sajadah keah! Hoh!!!
  Dek lai bagoghah-goghah juo tiok sabontea, lai aman ajo ati.  Kadang tibo ughang ba oto ancak mamboli nasi; Ujang lah babisiak ka Buyuang,”Olun ang tomui calon mintuo ang potang, tu nyo lah kiko mancaghi ang ha...” Buyuang lah golang sengeang ajo. Kontuk !
      Kawan samo  bakojo tiok aghi keah iyo lain pulo oghek eah. Lah ajak dusanak kanduang. Kok ado nan takona pek ati, jo kawan keah lah tompek maota. Ntu jo caa lai?
      Kalau jo ibu jo apak, lah jauah. Bakighin sughek ajo lai nan dapek. Ciek lai, apak eah, indak pandai manulih sughek panjang-panjang deah. “Semoga ananda tetap sehat, pelihara sembahyang, jaga hati induk semang dan kawan kawan”; jak itu ajo nyeah. Di tambah; ibumu dan adik sehat-sehat saja, wassalam. Lah ! Jak itu ajo! 
       Jadi kalau ado kawan nan pulang kampuang agak soghang, misalnyo sarupo si Yon bulan nan lalu; taghaso bona ilang dusanak. Apolagi inyo biaso pagoghah. Ado-ado ajo nan ka jadi objek guyon eah nyeah. Kok mamboli anak gadih ughang, ditanyai nyeah, jo a ka makan? Kalau dijawab jo hati, indak jo utak makan?, nyeah. Tamalu-malu ajo paja reah dek Iyon. Iyon,-iyon!
        Itulah sobab eah, katiko preman keah pulang sado eah dek sabelok ka ghayo, Buyuang tamonuang soghang eah. “Indak pulang ang Yuang?” nyeah nan Edi. Manggeleang ajo Buyuang. Olun tolok pulang lai. Baa-ka baa; di kuek-an ati dulu pek ghantau. Kan olun sampai sa taun lai?
       Sabelok manjalang ka ghayo, lah batutuk umah makan. Kawan lah bi poi. “Ang ajo manjago posko muah Yuang” nyeah nan Ni Eni. “Iduk-an lampu luea kalau malam. Pintu sa papan ajolah bukak. Kok ado kaba nan penting telepon kami”. Ntu lah mbaco-mbaco koran ajo Buyuang. Ma isi TTS. Manonton Tipi. Jan ditanyoan, baa ghaso ati katiko malam takabia!
Mbiek-olah deen lah! Ghomuak!!
       Acara tipi lai banyak nan gembira. Tapi kotu malam takabia reah, indak tatonton tio tipi reah. Manyonak ghaso eah ka kapalo. Talingo lah badongiang-dongiang ajo. Lah ba bao mandi balimau, tambah kaluea salemo! Domam den keah? Ndak ado cito eah deah! Kuek! Kuek an ati den Tuhan....! Mamintak den ka Ongkau....
         Jan kan ati Buyuang, sado Jakarta lah longang.  Jan ka perasaan Buyuang, penyiar tipi lah tapatah-patah pulo kecek eah. Lai tangoghan juo ughang takabia. Tapi takabia reah tambah ma anyuk-an jantuang! Badan sarupo si padi ampo, kok  basuo urang sisiahkan, kok di tompi urang kiraikan; o ombun, tolong salimuti,...o angin, baolah tobang, buliah nak tabuang , jauah..juah.... Serbet lai banyak pa apuh aia nan kaluea pek suduk mato keah! Den tenjulah dindiang keah?

        Tapi iyo ndak ado cito eah reah ka maghauang.... Kok manitiak satitiak duo titiak aia mato reah, tia-anlah.  
       Bisuak pagi ibu jo apak ntu ka tanah lapang gak nyeah reah? Ntu ghami ughang pek lobuah reah? Ntu, lomak bona golak reah....................? Ndeee.....saoklah pintu keah, pek dalam nyak lah manungkuk! Jajek jajek saketek, kalau lai lopeh sosak dado, kan ndak tau tio ughang reah?  Hiks...      

  Ma nyeah kain anduak ketek wak? Dikobeklah kapalo setek. Kok lai bakughang boghek pek dalam utak keah! Ughang, kok ka poi takabia, poilah. Kok ka mambuek kueh bolu, bueklah! Paja-paja ketek reah, kok ka malotuh-an mercon, lotuh-an laaaaaaaah....! Lotuhan bonalah sakuek-kuek eah! Kok ado nan sadang ba baghu-baghu, ba senyum-senyum, senyumlaaaaaahhhhh......! Tia-an lah den soghang pek niak! Tia-anlah! Ndak ba tio deah! Kan lah ajak ketek den maghosai! Tia-anlah....tianlaaaaaaaaaaaaaaaaaaaaaaahhhhh...
Hiks,...hiks...
        Ca pulo nan manokok-nokok pintu umah makan reah? “Tok-tok-tok! Tok-tok-tok!!!” Di lap lah mato keah dulu.... Disikek obuak keah setek dulu, ca pulo nan datang malam takabia keah? Bukak baiaklah pintu...
        “Pak....apak?”
        “Iyo, Yuang. Assalamualaikum...”
        “Alaikumsalam ww. Masuaklah apak....”
        “Ni Eni ang ngecek potang. Pajak lai Buyuang nan manjago,. Buyuang lai indak pulang gai do Pa....” ceknyo. Hiiii, pak Syamsir kigho eah!
        Indak disangko apak keah jak itu bona paratian nyeah ka awak reah. Lah tibo eah soghang jo oto. Tu lah dibao eah pulo minuman sa dus. Baju batiak saolai. Kue, banyak bona. Ntu, dititip-an nyeah pulo piti limo olai dalam saku. “Baa, ibo bana ati?” nyeah. Nde mak, aso ka manangih wak pek dado pak Syamsir keah......... “Bisuak, sudah sambayang, ka Kalideres ajolah main. Kok sepi bona soang disiko...”nyeah. O Tuhan....
  Lah poi pak Syamsir, lah soghang pulo Buyuang baliak.  Takabia ari ghayo mandonguang juo daghi jauah. Disonduak-eah ati!  Tapi ado ciek nan kadijago; jan sampai sakik pek ghantau ughang geah! Nyampang sakik, ca nan ka maubek? Ughang bagambira ari rayo, ntu awak ka lolok pek umah domam ? Yo indak ado cito eh-treah! Indak!
       Dicaghilah kawan kaluea. Ha, tu si Jeki, tukang jua okok ado pek luea.... Ughang Sulawesi nan soghang geah iyo ligat mancaghi piti. Manjua okok, jo binyi eah pek emperan. Pajak eah ketek ajo, bisa di lipek-lipek pintu eah. Kalau di tutuk lah jadi dindiang, kalau di bukak lah jadi atok. Pek dalam pajak ketek reah ado pulo lapiak bisa untuak lolok sabujua. Binyi eah ughang Jawa Timur, setia pulo mangawani pek itu. Kalau lah siang aghi, Jeki lah jadi tukang parkir bagai. Tiok sabontea lah ba ombuh pluit; ‘trus! ..terus!....putar kiri!...ok! Yop!.....” ntu dapek piti. Lai iduk juo inyo jo anak-anak eah bagai pek umah ketek pek lakang pasea ten.
       Dibao eah dek Buyuang minuman kaleng nan di agiah pak Syamsir, diagiah eah Jeki satangah lusin. Ntu lah maota ajo jo Jeki sampai tangah malam. Lah takantuak mato, baghu lolok pulang ka umah makan.
       Anak-anak pemulung nan biaso lalu ka muko umah makan reah lah kiun pulo cako. “Bang Buyung, zakat fitrahnye buat kite aje ye?” nyeah. “Lha, ude gue berikan ke masjid dek! Tapi kalo mau kue , ni abang kasih!” nyeah nan Buyuang. Kue nan diagiah pak Syamsir cako, lah dibagi eah pulo jo anak-anak pasea reah. Indak siagak godang ati anak-anak reah diagiah kue do. Bacahayo-cahayo oman eah. “Bang Buyung, makasi ye... !” . Buyuang jo Jeki lah senyum ajo nengok karenah paja-paja reah.
        Untung, Toni, Endang, dll; paja indak sikola. Padahal ado nan lah lapan taun umua eah. Tiok aghi lalu ka muko umah makan keah, ja sumpik dan galah mancaghi siso barang bekas. Umah eah pek topi rel kareta api, pek sampiang pasea. Apak jo ibu eah tahan tingga pek tumpukan umah daghi triplek jo  karoteh kardus ajo! Mandi eah ka sungai ketek nan koghuah aie eah. Kok manyosah eah, lah bajajea-jajea kain ta ampai muko umah triplek reah. Dipikia-pikia; kan lai indak bughuak bona nasib awak dibandiang nan lain tereah? Subhanallah!
        Baliak sambayang rayo, Buyuang copek-copek bakomeh ka Kalideres. Ka umah pak Syamsir. “Ki, lu liatin posko gue ye? Jangan kecolongan! Ntar gue kasih adiah lu...”nyeah ka Jeki, nan indak poi sambayang rayo; tapi totap manjua okok, walau ughang lah longang. Iyo kuek ati urang Sulawesi nan soghang keah! Ajak lah mati ajo perasaan nyeah. Ndak tampak taragak pulang kampuang eah saketek tio deah. Patuklah nenek moyang eah sampai ka Madagaskar ten poi marantau. Maaf lahir batin ya Daeng! Kau tunggulah warung rokokmu itu!
        Kigho eah ajak ughang bagholek ketek pek umah pak Syamsir. Tibo anak eah sado eah. Dagi Surabaya. Daghi Jakarta, lah joleh.  Daghi Tangerang. Anak eah nan jantan, nan jadi tantara pek Pontianak, tibo pulo. Cucu-cucueah lah ghami silang pintang pek umah eah rah. Tapi lai ramah-ramah sado eah. “Kami, bajulo-julo Yuang. Julo-julo keluarga. Kok indak bitu, antah bilo kami bisa bakumpua samo-samo....”nyeah nan Ni Eni, anak nan paliang godang.
       Amai, binyi pak Syamsir yobona sumringah sa aghi keah. Sonang bona ati eah. Bakumpua cucu eah ka Jakarta. “Iko olun sadonyo lai ko Yuang,...nan kuliah pek telkom Banduang, indak datang reah. Nyo barayo ka umah kawan nyo, ceknyo. Nan anak si Eni nomor duo, di Bukiktinggi, rayo jo mak tuonyo. Kuliah di sastra Inggris, Unand...”nyeah nan Amai.
       Ado juo untuang eah inyo ka Kalideres. Dapek bacarito-carito jo pak Syamsir. Sampai tasobuk dek pak Syamsir, baso kunci sukses inyo bausao pek Jakarta keah; nan partamo iyo nawaitu Yuang, nyeah; nan kaduo, ulet, jan mudah patah arang, walau kadang awak dicido urang, nyeah. Kan Tuhan tau, sado niat jo usao awak.  Nan katigo; kok takumpua piti, puta! Indak usah disimpan-simpan. Buyuang lah maongguak-ongguak ajo.
       “Dima ang di Pikumbuah Yuang,” Amai mamotong carito jo pak Syamsir.
       “Di mudiak Mai. Kiro-kiro 20 kilo dari pasa Pikumbuah,” nyeah.
       “Eeee, anak mak tuo Eni kan kiun ba junjuang. Di apo namonyo Pa?” tanyonyo ka pak Syamsir.
      “Limbonang!” nyeah nan ni Eni mamotong.
      “Iyo, Limbonang! Kami dulu pai ka sinan, dek si....Rini, sapupu Eni nan di Bukik baralek. Indak jauah dari pakan Limbonang tu do. Duo hari kami disinan dulu. Pasanyo hari Kamih kan?”
        “Iyo Amai, iyo....” jawek Buyuang.
        “Ondee,...lamak satenyo sinan kan? Kami bali tapai gai sinan. Pulang ka bukik Amai borong talua itiak jo talua ayam....ha ha ha,” Amai banostalgia.
        “Di Batam si Rini tu kini jo lakinyo,” tambah Amai pulo.
        Buyuang lah maongguak-ongguak ajo toruh. Cucu pak Syamsir nan ketek-ketek lah barobuk remot. Ado pulo nan bacilepong muncuang  eah dek kue bolu blackforest. Ha ha ha..... Eboh!
         
Siang sudah makan, Buyuang baliak ka umah makan  pek Senen diantea da Irwan, laki ni Eni. “Wak anta ang ka Senen Yuang, sambia pai ka tampek kawan,”katonyo. Ni Eni bagai lah soto pulo poi jo anak eah nan bunsu. Di ateh oto ko lah Ni Eni jo da Irwan batanyo latar belakang pendidikan Buyuang. Batoruh-torang ajo nyeah, wak iyo tomat akademi, kok lai ado kesempatan nanti, nyampang diagiah jalan dek Tuhan, kok lai bisa dimanfaatkan ijazah keah. Ni Eni nampak oniang sabontea. Sudahtu nyo batanyo ka laki eah,” Kok dicubo keahlian Buyuang tu untuak mangalola rumah makan nan di Depok ba nyeah Da,..jadi wak fokus ka toko nan di Kalideres sajo sambia manjago Amai,”nyeah. “Jadih. Mangeceklah awak ka papa dulu beko,”nyeah nan da Irwan. Ha, peluang?
       Cabang RM ‘Bundo Kanduang’ nan pek Depok reah; baghu. Itu Ni Eni nan mambukak bulan nan lalu. Olun ghami bona pelanggan eah lai. Kok awak lai ado ilemo manajemen saketek, ado kasempatan ba pulo ka di ilakkan? “Itu tantangan ka awak tu Da, Uni. Kok iyo diizinkan pak Syamsir, wak cubo malah”nyeah nan Buyuang. 
        Buyuang baghu pulang dari Tebet, acara halal bi halal Gonjong Limo. Inyo poi baduo jo Iyon. Ghami juo ughang cako. Kigho eah ado ughang awak nan lah jendral pek Jakarta keah, nan jadi tuan rumah cako. Bahkan yobona ‘eboh’ acara eah. Ado calempong bagai dari tim kesenian minang TMII. Lah hondoh poroh, kaluea sado ughang Pikumbuah pek Batawi! Lah tamonuang-monuang pulo wak mandongea biduan tuo mudo tampil manyanyi. Tapi, adat logu Minang, banyak nan maibo daghi nan malonjak-lonjak. Jauah pangona dek eah!
       Katiko baghu pulang acara reah lah; Ni Eni mangecek, baso pak Syamsir satuju inyo dicubo mangalola cabang baghu  nan pek Depok. “Gaji Buyuang, tontu gaji manejer. Wak  agiah tigo kali lipek nan biaso,...baa?” nyeah nan ni Eni. “Bismillah Ni, wak cubo”, nyeah.
        “Iyo elok nasib ang iah Yuang,” nyeah nan Edi jo Ujang. “Dicubo tantangan keah Jang. Kok payah maju eah, den mintak ang pindah kiun suak ka ni Eni,”nyeah. Lah bakomeh-komeh pindah ka Depok. Suzuki  carry nan lampu eah bulek lai takona? Jo itu inyo pindah, di antea da Irwan. Dikona-kona pitunjuak pak Syamsir; nawaitu, sobea, putea-an piti!
   Iyo indak ghami kigho eah cabang nan pek Depok keah reah.  Mungkin dek lokasi nan pek jalan ketek bagai gak nyeah. Dibandiang jo Senen, lai indak banyak pajak nasi pek iko reah; tapi yo olun koyun pajak keah lai. Lai lah ka tacapai  target ko, dusanak?

       Ditengok pamboli, banyak nan bujang-bujang ajo. Banyak pulo nan gadih ba karuduang mintak dibungkuh . Ado pulo nan mamboli samba ajo, nasi eah indak. Ba aka nan ancak keah?
       Lah bamufakat jo Iyus , jo Amia bagai, kawan nan mamasak pek lakang. Wak bagi 10 lah ayam keah nyeah; jan dibagi lapan pulo lai; wak turunan ogo eah setek. A, tu iyo ide nan ancak pulo reah.  
       Namo umah makan ditogak-an lah pek topi lobuah reah. Dibuek godang-godang. MASAKAN PADANG! Jak itu dibuek jo huruf godang, tapi namo umah makan keah, ditulih ketek ajo pek bolah bawah. Jadi nan ditonjolkan nikmat masakannyo, indak namo umah makan eah reah.
       Sudah tu, ba imbau tukang jajo koran, babuek langganan Pos Kota, di lotak-an pek bangku panjang bolah muko. Gratis ca nan ka mambaco.  Jadi kok sanak mamboli nasi bungkuh; bacolah koran, samantaro kami mambungkuh-an nasi....
      Olun juo pueh ati. Ba fotokopi iklan jo  karoteh, di potong-potong, diupah-an ka anak ketek manempe pek tunggak listrik jo batang kayu, baso umah makan keah siap malayani pamboli jo masakan padang nan nikmat! Ha, iko iyo, copek taghaso ‘dampak’ eah. Lah gak ba’ungguak’ piti masuak!
        Dek banyak pulo nan batanyo musola, diubah suduk umah makan keah jadi tompek sambayang ketek. Di aleh jo  papan, di bontang-an sajadah, di bateh jo pot bungo duo buah pot. Ca nan ka manumpang sambayang, ba uluaklah pek lakang, sambayanglah pek suduk reah....   Eee, iyo koyun juo jadi eah iah? Guru-guru pek SD bolah ka lakang ten lah rajin pulo mamosan nasih baboleh-boleh bungkuh tiok  siang! Sip!
     Ntu lah datang pulo suplier minuman botol manawarkan bagi-hasil. Ndak baa reah, nyeah nan Buyuang. Jadi lah ta onggok pulo boks minuman dingin pek suduk muko, ampiang bangku mbaco koran.  Datang da Irwan jo ni Eni kiun, lah geleang-geleang kapalo ajo eah. “Kok ajak iko, lai tacapai target awak cak nyo Yuang?!” nyeah. “Doa-an lah dek Uda jo Uni,”nyeah. Sanak, tengoklah badan Buyuang kini, lah agak gompa!
       “Jual rokok, kagak Bang?” ado pulo pelanggan nan batanyo. Jadih malah! Dibuek tompek okok ketek pek meja keah, dilotak-an gak  ompek-limo bungkuh pek muko, Nan ba slov-slov ba simpan pek lakang. Yo, izin uaha awak kan umah makan?
      Nanti bontea! Tu paja nan mangoku ughang Padang potang datang plo ah! Lai manih eah! Pek ma uda pek Padang, nyeah potang.......
 “Pek pikumbuah diak. Adiak ko urang Padang yo? Dima?” tanyo Buyuang.
       “Awak di Sawahlunto Da.” nyeah.
       “Dima tingga siko?” tanyo Buyuang.
        Paja tu golak manih. Incek mato eah manari-nari. Mungkin katuju dek inyo mamanai mato Buyuang nan sayu reah gak nyeah.
        “Tu di sabalah sinan da. Wak kost. Dulu barulang dari Bogor. Kini dek lah banyak bana tugas , kecek mama, kost sajolah, indak baa do, jan latiah bana,”
        “Hooo. Ho-oh. Kalau lapa, kasiko sajolah bali yo...!” kecek Buyuang pulo.
         “Iyo Da. Wak indak sempat mamasak do. Randang patang lamak rasonyo da. Tu babaliak awak kamari ...” lai cipeh pulo paja keah.
       Lah ligat Buyuang manungkuh-an nasi. Di agiah pulo kuah gulai ayam.  Sambalado mudo ba tomat ijau baminyak. Ndeh nti!
       Lah sudah dibaia eah, nyo lai senyum-senyum juo. “Wak pulang Da,”nyeah. Eee...alah jeah!
       Tapi Buyuang lai sadar juo, kalau tibo urang awak, nyo iyo ajak itu. Apolagi nan sadang sikola jo kuliah. Kok dapek jan dimaha –an andak eah. Korting-korting juolah Uda oiii....
         Iyo lai takumpua piti. Iyo sayang Tuhan. Dulu kotu pek mudiak, mamogang piti kgho ka balanjo sa belok ajo. Kini lah bajuta-juta. Bahkan ba puluah juta. Ndeee...lain pulo raso eah bapiti banyak keah iah?
         Pitunjuak pak Syamsir lai takona juo. Jan dilimpok-limpok ajo pek bawah banta...putea piti reah! Itulah sobab eah, bagak ati Buyuang maambiak umah RSS pek Sawangan. 
        Katiko wawancara jo patugeh Bank, di tanyo eah Buyuang,”Kagak nyesal nih, ngambil RSS tanah sempit 100 m aja? Ntar kalo udah bekeluarga, kan kerasa sempit mas?” nyeah.  “Jadi bagaimana nan rancak menurut ibu?” baleh Buyuang. “Ya, ngambil dua unit kek, gitu?!”
         Bapikia Buyuang sabontea. Kalau di tariak duo, kopel, lai tolok juo maansua reah. Kagonti manabuang piti, ka dek a pulo nyeah?
        “Ha, jadi jualah Bu. Saya ambil dua.”
        Tumah lah ba tando tangani pek muko notaris. Lah ba baia DP. Lah bataghiak piti saparo pek tabungan BRI Depok.  Bitu pulo jalan eah, kan ndak baa tereah?
         Iyo ado dampak eah ka utak wak, kalau piti lah poi keah. Tambah baputea eah. Ba caro mancaghi tambah eah baliak? Di tengok ka simpang jalan, ghami ughang makan pek pajak ‘tasosak’ jo bangku batutuk kain ajo , sonjo jo malam. “Pecel Lele” nyeah pek spanduk sakaliliang pajak reah. Ha, takona aka! Dibuek pulo ajak itu pek laman keah untuak sonjo jo malam ba nyeah? Kan manambah manggoreang ikan kalang ajo  nyeah. Sambalado jo antimun tambah daun ‘kemangi’.   Ntu, mulai hari akad, lah togak pulo pek laman keah, tuduang salayar, ‘pecel lele.’  Bangku panjang, lalab timun jo kemangi. Eee,...lain pulo ‘ambiak’an nyeah nan malam keah kigho eah. Ughang ba oto bagai indak sogan makan pek laman jo bangku kayu reah. Ntu, tambah balungguak piti dalam kotak! Kok ajak iko; indak cukuk sataun lah tacapai target ni Eni keah! Iyuh jo Amia lah sonang pulo ati eah, dapek tambahan!
  Dek lah koyun, lah basinar, lah banyak pulo ughang datang mintak sumbangan. Ampiang tiok aghi, kalau nan ketek-ketek.  Dibagi malah ghasoki keah yo ndak?  Tapi kalau nan dari ormas tertentu, alasan pertemuan anu, iyo saketek ajo di agiah Buyuang nyeah. Kalau kotak masojik, lah balotak-an pek ampiang meja.  Bahkan, listrik masojik pek bolah keen, mulai duo bulan lalu, awak ajo lah nan mambaia nyeah nan Buyuang.
Lah sonang pulo malah ati pengurus eah.  Tu parangai pak Syamsir nan manughun gak nyeah ka Buyuang.
        Tongah aghi cako, ni Eni manalepon. Dusanak, kotu iko lun ado HP lai.  “Yuang, ang lah managhiak carry uni dih?! Uda nyo ma-ambiak Kijang, tapi uni sayang ka carry ko, mesinnyo masih rancak, indak pernah rewel do, lah banyak jasonyo ka awak,” nyeah nan ni Eni.
        “Kok rancak kato uni, jadih! Bara ka wak baia? Lai ka talok dek awak?”
        “Asa jan lapeh ka urang se lah. Limo juta, lah jadi tu....”
        “Jadih malah,”nyeah nan Buyuang.  Kan ghancak pulo untuak panjonguak – jonguak umah pek Sawangan ten reah iah?
       Ba nyeah nan Amia,” Tu lah mintak urang nan ka manumpang nyo tu Yuang! Sakalian untuak paunyi umah baru sinan,...” sambia golak ketek. Kama arah kato Amia reah? Haiiii.....
        “Lai ado adiak ang nan rancak di kampuang?” gorah Buyuang. “Ba kaindak pulo. Nan ajak a nan katuju? Nan bulek, nan lonjong?” jawek Amia pulo. He he he...
        Sadang gorah-gorah tu tibo pulo urang godang badagok mintak sumbangan.  Ba jeket. Lah diagiah sakadar eah. Dimintak eah pulo tambah eah.  “Ini kegiatan pemuda, masak cuman segini? Tambahlah seratus lagi!” kato nan ba sunguk. “Kita biasanya juga segitu Bang! Ni sepuluh lagi,” kato Buyuang. “Ah, bang, malu lah, masak rumah makan segede gini cuman nyumbang enam puluh. Ini perlu untuk kekompakan dan nasionalisme Bang!” disosak-an nyeah Buyuang.  Nan soghang lai lah batodiek pinggang pek ampiang rak okok.  Oman eah ajak ughang bagak bona.
       “Cukuplah,” kecek Buyuang.
       “Abang tak mau kan, keamanan disini tak terjamin?” nyeah. Ajak manggertak!  “Nih,  lima rebu. Udahlah...” ditambah Buyuang limo lai.
       “Kan aku bilang seratus Bang?!” nyeah. Rak okok dipogang-pogangan nyeah. Talinteh pulo baliak parangai preman kandang pek Kubu Godang kotu nonton pacu kudoh!
       Daghi pado gaduah, mangganggu pelanggan pulo, kasudahannyo ontok ajo Buyuang. Pelajaran pak Syamsir nomor duo! Sobea!  
      “Sini! Biar kite ambil sendiri!” nyeah ma ampiang ka kotak piti. Buyuang lah manggigia; sobea!  Amia jo Iyus, lah togang pulo pek bolah lakang. Kan lai banyak pisau jo ladieng pek dapua?!
      Di egang eah loci piti. Iyo saungguak. Copek bona tangan eah mancokau ka nan sighah. Plop! Tangan eah dipogang-an nyeah dek Buyuang. Dasar ughang agak singkek pangona, di kitea – an nyeah Buyuang!
      Ikolah pangka bala! Buyuang bakilik, ntu lah kaluea pulo insting nan lamo! Masuak kaki ka dado! Talonguah! Kok godang bona badan eah, ujuang kaki lah tibo, taduduak juo! Iyus jo Amia lah maju pulo. Nan soghang lai kigho eah  ciuk juo nyali eah manengok lah ba limo nan tibo ka muko.
      “Gue balek sekarang! Tapi ingat, utang lu dibayar ntar!!” inyo mangancam. Ntu lah di putea eah onda eah. Ilang pek kelok-an.  Buyuang lansuang manalepon ka pak Syamsir. “Iyo, biko diurus, tonang ajolah dulu,”nyeah nan pak Syamsir.  Eeee.....indak sampai sa jam sudah itu, lah baliak paja reah. Tapi soghang ajo. Ntu lah disalami nyeah ajo Buyuang. “Bang maapin gue ye...” nyeah. Ajak manyombah-nyombah! “Gue tadi kurang kontrol...maaapin ya Bang?” nyeah, sujuk – sujuk. “Iye, iye,...” nyeah nan Buyuang sambia maosok-osok bau paja reah. He, lain pulo ‘makan tangan’ pak Syamsir!
Salain mintak sumbangan reah, banyak pulo nan datang manawarkan barang. Ughang manjua loji, tiok sabontea kiun. Lah ba otok-otok loji pek tangan-eah. “Murah Bang, murah. Asli....” nyeah sambia maadok-an loji reah ka Iyus bagai. Buyuang ndak tertarik jo loji jak itu reah. Indak masuak aka reah! Kok iyo asli, ba dek mughah?!
        Tukang jua hiasan dindiang kaligrafi kodok pulo manyandang-nyandang barang kiun. Ado nan ayat kursi, ado nan al-fatihah, ado pulo nan kalimat syahadat. Tapi ditengok-tengok Buyuang, terjemahannyeah pek bolah bawah, agak lain.... Ba dek ‘hanya kepada Engkau, kamu menyembah...dan kepada Engkau kami minta pertolongan...” Padahal satau Buyuang, hanya kepada Engkau ‘kami’ menyembah.... Lah ba paleset-an arti eah tu? “Tawarkan ke yang lain aja mas...”nyeah nan Buyuang.  Sudahlah ogo eah ba maha an bona, kaligrafi reah indak pulo ‘mancotuh’ ka pamandangan reah....
        Tu, tukang antea minuman dingin dalam’box’ lah tibo pulo jo oto eah ha. Lah tughun inyo batigo. Supir, ntu ado duo lai, jantan batino. Katigo eah ba pakaian saragam itam putiah, ba merek minuman pek baju eah. Lah patuk pulo disetor nan belok kini, iah. Nan padusi reah toba bona lipstik eah. Obuak eah ba koghek singkek ajo. “Bang boleh dapet nasi bungkus gratis kagak Bang?” nyeah. Bibia eah ba kamek-kamek an. E olah jeah, ajak biaso, adat ughang ba dagang!
      Buyuang lah golak pencong . Di baia eah piti panjualan minuman nan sabelok keah. Lai laku pulo. Nan soghang, lah manambah isi box reah baliak. Nan soghang lai, lah mancatat-caat pek buku eah.  “Kita ini dari Padang juga lho Bang...” nyeah nan padusi reah. Baju eah sompik. Sowa eah pas-pasan ajo. Buyuang golak ketek ajo. Padang ma pulo kau? Padang Sidempuan?
       Sakali keah ughang manjua talokuang jo baju toluak-balango nan tibo. Iyo lai aluh dasar eah. Lombuk di rosok jo jaghi tangan!  Ko ghaso  ka ghancak dipakai ibu eah, talokuang keah iah?  Baju toluak balango nan krem ten, ajak sasuai pulo dek apak eah.... “Mangga kang, dilihat heula’!” nyeah nan ughang manjua pakaian reah. Daghi Tasik Malaya inyo keah, nyeah. Pek Tanah Abang, banyak nan ancak; tapi bilo pulo ka poi kiun?
      Dibolian nyeah kain saghuang ciek soghang ibu jo apak eah. Talokuang ancak ciek untuak ibu. Baju toluak balango krem untuak apak eah. “Nuhun Kang, Nuhun, “nyeah nan ughang bajajo reah. Buyuang lah sojuak pulo ati eah.
        O dusanak, boghan-boghan aia mato ibu eah managhimo kain talokuang reah, sabelok sudah itu. Kok manunduak bonalah inyo, nampak juo dek suduk mato apak eah, ekspresi oman ibu eah reah! Apak eah manjopuk ka kantua Pos Ndonguang, jo keta-angin pagi cako. Apak eah, nengok ibu eah mamogang kain reah,  lah mailang ajo ka bawah batang pokat, lakang umah. Ontahlaaaaaah.....
Ibu Buyuang keah, ajak ado tali batin nan aluh jo Buyuang. Indak bisa ditulih jo di katoan deah. Hati ajo nan ma raso an. Indak pandai pulo wak manyobuk-an nyeah deah. Nan joleh, Buyuang anak jantan nan paliang tuo. Inyo keah laia kotu ughang sadang bansat. Nagoghi kotu itu kacau balau. Ulama batangkok-i. Preman jadi rajo. Nan ba kuaso ughang-ughang anti-Tuhan, ajo nan banyak!
      Kok di tengok ka oman eah, Buyuang mirip pulo jo ibu eah. Manih! Mato sayu!.  Tapi kalau bakat malogu keah jo sipat pa ontok, iyo daghi apak eah di taghimo Buyuang gak nyeah. Jadi kalau manengok Buyuang, ghaso manengok apak-paja kotu mudo! Paghangai eah saghoman!
Itulah sobab eah, masuak tahun ka duo Buyuang pek Jakarta keah, badan ibu eah agak kontak senek. Kadang-kadang domam. Tapi apak eah lai mangaroti bona jo kakobeh ibu eah keah. Kalau lah domam reah, ba ughuk pungguang eah, ba pabanyak minum aia putiah,....bagontian poi pokan.
        Ka Buyuang, mungkin ado pulo kontak eah gak nyeah. Ba pulo ka indak? Ughang ba tali daghah?  Itu dek di usaoannyeah bakighin tiok sabulan duo bulan. Lah rajin pulo apak Buyuang ka kantua Pos kini. Poi ka walijorong manandotangani C-7; sudah itu bajopuk piti ka kantua pos. Lah ajak senyum ajo oman apak Buyuang manggantiah keta pulang. Onde Tuhan!
        Pek pajak apak Buyuang, ughang nan mamboli makan pagi, sarapan, lah bagoghah-goghah pulo. "Lai lah ka babukak juo pajak apak Buyuang keah bulan muko keah?" nyeah nan soghang. "Kok indak? Pakighin lah banyak daghi Jawa ten?!" nyeah nan ciek lai mandokuk daghi suduk. Saghoman biaso, apak Buyuang indak banyak kecek deah. Nyo golak ketek ajo. Ughang pa ontok!
Ten, pek umah makan eah, Buyuang lah jago sajak pagi.  Lah mandi, lah sambayang subuah.  Lah bado’a-an ibu jo apak bagai.  Allahummghfirlana zunuubana wali walidaina warhamhuma kamaa rabbayana saghiira, Tuhan, ampuni tek doso deen, doso ibu jo apak den, tolong bona sayangi apak jo ibu den deah, saghoman inyo lah manyayangi deen kotu ketek, sampai lah godang jak iko ah......nyeah. Aamiin!
       Baghu ka babukak umah makan ghu, badoghiang talepon. Lansuang di angkek-eah dek Buyuang. “Hallo? Alaikumsalam. Eh Uda Irwan, ba kaba? Kasinan? Jam bara Da? Eh, lai katalok dek awak tu Da? Wak alun bapangalaman lai? Nan lain se baa Da? ......Yo kok bitu, wak cubo malah!....iyo. Alaikum salam!” nyeah ntu ditutuk eah talepon.
       Mamandang Buyuang jauah ka luea. Bekas manjua pecel-lele malam cako nampak agak basah-basah juo lai. Oto angkutan kota lah mulai lalu baganti-ganti. Oto pribadi, banyak. Mungkin ontah poi kama lah ughang geah aghi akad, yo ndak?  Buyuang, tapikie juo talepon da Irwan, laki ni Eni kamuah. Buyuang ditulih-an nyeah namo eah dek da Irwan sabagai sekretaris I Ikatan Keluarga Minang; da Irwan sekretaris eah. Kigho eah ado rapek pembentukan pengurus belok nan lalu. Ntu biko, sakalian acara serah tarimo pelantikan. Ado arisan bagai. Pek umah pak Syamsir! Awak dulu kan lai baraja sekretaris jo manajemen, dicubo malah! Kok ado nan sulik biko, batanyo lah wak ka da Irwan atau pak Syamsir, yo ndak?
       Ghami juo kigho eah ughang awak nan hadir. Ibu-ibu banyak pulo. Ado nan bujang jo gadih, mungkin anak sikola atau mahasiswa ughang awak nan pek iko gak nyeah.  Lah sampai namo sekretaris basobuk, da Irwan lah togak ka muko. Sudah tu, “sekretaris I; Sofyan Syafrizal!” , nyeah nan protokol; lah kamuko pulo Buyuang. Eee...Sofyan namo eah Buyuang keah kigho eah?! Sajak ketek ba Buyuang-an ajo. Sajak jolong laia, kok batanyo ughang ka ibu eah, “iyo olah? A namoeah?” Dijawab eah dek ibu eah,”Olah, indak soman jo awak reah. Buyuang!”.  He he he,...ughang pek kampuang jak itu lah kakobeh eah!
       Onde, ado grup anak-anak tari piriang bagai kigho eah! Lah sudah palantikan, ado orgen tunggal pulo. Ughang pek ampiang umah pak Syamsir keah ado nan tukang orgen deah; ntu disughuah-an nyeah dek da Irwan maibur tamu. Dek indak ughang awak, indak dapek bona cengkuak malodi logu awak dek inyo reah. Itulah sobab eah,  katiko Buyuang disughuah panitia nyumbang logu, digontiannyeah tukang orgen reah duduak pek itu.  Iko, hobi Buyuang bona kotu sakola akademi dulu keah!
       Yamaha, merek orgen reah. Lai samo jo nan pek sikola Buyuang dulu. Tapi iko lah lobiah longkok paragat-paragat eah. Di ubah eah dek Buyuang suaro melodi ka saruliang. Di palambek-eah ketukan birama eah. Ntu lah maluncua ajo melodi Malang Bacinto. Pek kunci A, Buyuang main. “Malaaaaaaaang bacintoooooo....bulaaaaan joooo bintaaaaang, kasiaah di gungguuaaaaang dek matooooariiiii......” Buyuang lansuang maninggih ka kunci D. Suagho poghuk bona nan dikaluea an Buyuang. Dilopeh-an nyeah sonak nan maimpik salamo keah!  Taoniang ughang nan ghami reah. Ibu-ibu nan maota inyo samo inyo, lah takanang! Ntu, lansuang ajo spontan ba topuak tangan! Plok-plok-plok!!!
        Buyuang maghondah ka kunci E. Ntu, baliak ka A, baliak! Ondee....tangan suok eah lah ajak moncak-moncak di ateh tuts orgen reah. Lah bakoluk-koluk suagho  saruliang! Agiah Yuang!!! Paontok, tapi baghisi kigho eah!
      “Ca reah?” nyeah nan Sutan Kayo, kawan pak Syamsir. “Paja daghi pikumbuah. Lah tigo taun leah pek iko. Kan inyo nan mamogang pajak pek Depok,” nyeah nan pak Syamsir. Lai sonang ati baliau takah eah.
      “Cintoooo...ka adiaaak, nan indak saaampaaai, yo naaan takanaaaaa, kasiaaaah taaak sampaaaiiiii........” tibo juo pek malodi panutup. Improvisasi! Buyuang pueh! Ughang batopuak tangan. “Tambaaaah!!! Tambaaah!!!” nyeah nan bujang-bujang pek topi bolah ka suok. Buyuang manunduak-an badan saketek , ntu di agiah-an nyeah orgen balaik ka nan punyo cako. Ndeh,....a lah nan ka disobuk keah?
  Lomak pulo makan ba ghami-ghami keah iah? Kaluea ikan bilih danau Singkarak bagai.  Ghondang jo kalio, lah ka joleh reah.  Pak  Syamsir sakalian basokat ghoto bagai gak nyeah.  Kolak dughian ado pulo.  Silomak jo tapai itam, banyak dalam mangkuak.  Ck-ck-ck!!!....  Taubek taghagak nti!
       “Tambuah Yuang,” nyeah nan pak Syamsir.  “Jadih pak, iyo lamak!” nyeah nan Buyuang. Golak pak Syamsir nengok eah.  Lah ba taghiak kolak dughian sa mangkuak lai.  Nan bujang-bujang, ado nan duo mangkuak tambah  eah.  “Pupuah,” nyeah; kagonti panambah gizi, yo ndak?  Pak Syamsir bagai lah soto pulo batambuah; he he he.....
        Ndeee..sanak; ontah ta banyak makan kolak dughian ontah baa; ponyiang kapalo pak Syamsir malam itu. Puku sambilan malam, lah tatalontang pek kamar mandi. Copek balaghian ka umah sakik. “Saghatuh sambilan puluah” nyeah nan dotor, kotu ba tanyoan tekanan dahgah apak reah. Ni Eni lah comeh.  Amai lah muncuang-muncuang ajo soghang,”Lah badatak ati den cako; tapi lupo den mangana-an nyo,..” nyeah.
        Bisuak eah, Buyuang dapek kobea pak Syamsir dirawat inap, inyo lah poi lansuang ka umah sakik.  Di bao eah Iyus jo Amia bagai, jo carry ba lampu bulek reah. Di bao eah botiak godang sighau, apel, mangga.  Tapi dek olun dapek mangecek, pak Syamsir badoa-an ajo sambia maughuk-ughuk kaki eah. Godang bona jaso apak keah ka awak! Kok indak ditolong eah dulu kotu jolong tibo, ontahlah!  Sudah itu, oman eah barasiah; ajak tanpa pamrih!  Sadangkan Sukirman nan ughang Pekalongan, nan manjago masojik ten, lai patah-lidah eah, kalau lah basuo jo pak Syamsir.
      Bitu pulo Tuhan mambuek iduk iah; kadang golak, kadang manangih.  Kadang lai tolok ma nahan ibo, kadang lah baghameh jaghi tangan, titiak juo aiemato!  Kadang di ateh ghoda, kadang baputea pulo ka bawah.  Kadang siat bona, kadang tatilontang sakik!  Jauaaaaaaah pangona.....
Tigo aghi sasudah manjonguak pak Syamsir, Buyuang kiun pulo baliak.  Ditengok malah kondisi badan induak somang awak reah.  Induak somang, kan lobiah ajak ughang tuo kalau pek ghantau keah?  Bangku tongah carry lah ba isi jo pokat, apel, mangga, kalengkeng, jo pier bagai.  Pokok eah, baa nan ka sonang ati ughang nan managhimo!  Pak Syamsir keah, salain panasehat pek masojik Kalideres, inyo kan penasehat pulo pek Ikatan Keluarga Minang.  Kok dapek, copeklah siat eah andak eah. Aaamiiin.
      Olun tibo jam-bezuk lai, Buyuang lah tibo. Sajam-satangah pulo baoto daghi Depok ka iko, ka umah sakik keah.  Dikecek-an nyeah ka petugas nan manjago, baso inyo datang daghi jauah.  Baso inyo parolu pulo copek baliak, indak ado ughang nan ka manjago pajak.  Di pandangi nyeah mato perawat nan manjago piket reah tonik-tonik.  Tengoklah, ati nan suci muko nan jonieh. Yo bona mamintak deen, nyeah dalam ati....
       Lai lunak ajo petugas piket reah. “Masuklah Bang. Mohon jangan banyak ribut dulu ya, kasihan pasiennya....” nyeah ka Buyuang. “Iya, iya. Makasih suster....” nyeah nan Buyuang. Ntu lah malughuh ajo Buyuang bajalan pek lorong mah-sakik ka kamar Pak Syamsir.
       Sudah manokok pintu, mangucap salamu’alaikum, Buyuang masuak. Ado soghang perawat nan sadang batugeh pek dalam kigho eah.  Sowa panjang putiah, baju barendo, putiah. Obuak bakobek pita, panjang. Ndeee...ancak eah perawat keah. Bulek mato eah. Toduah kalau di pandang.  Kamek pulo pipi eah. Iko yo bona perawat atau malaikat keah?
      “Alaikumsalaaam...”nyeah manjawab Buyuang.
      “Gimana bapak saya suster?” nyeah nan Buyuang.
      Suster itu manengok tajam ka Buyuang, indak ba kijok kalopak mato eah reah. Srrrr......! Badobok daghah Buyuang.  Copek-copek Buyuang manengok ka Pak Syamsir.  Lai agak tonang takah eah pak Syamsir.  Tapi ado juo  slang-slang bakobek ka tangan eah.
      Di pogang-an nyeah dek Buyuang kaki pak Syamsir. Masih kaku.  “Sudah baikan kan suster?” nyeah nan Buyuang. Lai indak pucek ajak ompek aghi nan lalu lai.
       Suster ancak reah lah maongguak – ongguak.  Baerarti lai banyak ansua-an nyeah reah kan? 
       “Waang ko Yuang?” nyeah nan pak Samsir.
       “Iyo Pak. Awak meah. Siat apak copek dih pak...” nyeah nan Buyuang.
       “Indak ta garikkan kaki nan sabalah kida do Yuang,” nyeah nan pak Syamsir.
      “Hooo, ho-oh. Tapi kalau bisuak lah gak kuek, digarik-an baliak pak.  Ditambah tanago apak toruh jo makanan nan di agiah dokter keah....” nyeah nan Buyuang. “Betulkan suster? Kalau rajin latihan, sembuh lagi kan?” nyeah nan Buyuang. Suster reah binguang ajo, ma ongguak-ongguak.  Sakali-sakali di ‘intip’ eah Buyuang jo suduk mato eah. Ba pulo ajak eah keah?
       “Yuang, iko anak Eni nan pek Padang. Tibo eah pagi cako jo pesawat.” Pak Syamsir mangecek.
       Tagalenjek Buyuang! Pantuang!! Anak ni Eni keah? Iko, nan kuliah pek Unand?
      “Ngggg, eh, oo, ngg, anak Uni ko?” nyeah nan Buyuang sambia ma ulua kan tangan. “Iyo Da....” nyeah. “Awak Atri, anak mama nan pek Padang” nyeah, sambia golak malu-malu. Ba dek indak tolok dek Atri keah madok ka mato sayu Buyuang?
       Sakali keah yobona mati kutu, Buyuang! Indak obeh nan ka disobuk! Tang-kapentong!!!
        

Sadang salah-tingkah reah, masuak ni Eni. Ee... ba ughang kigho eah dalam toilet... “Lah lamo ang tibo Yuang?” nyeah. “Alah sabanta Ni,..”nyeah nan Buyuang. “Ndeee, ba dek mambao-bao pulo ang lai? Awak bujang keah, tulang salapan karek sajo lah ka jadi tu mah...” tambah ni Eni pulo. “Ndak baa do Ni, kok indak apak, uni bagai malah mamakan, jo ‘suster’ nan kamek ko ha...” nyeah nan Buyuang. Ba dek bagak ajo Buyuang ngecek jak itu reah?
       “Eh, iyo, iko Atri, anak uni nan pek Padang. Tibo pagi tadi.  Lah maluncua ajo kasiko mandanga Inyieknyo sakik. Rencananyo tigo belok lai ka kasiko, manjapuik Uni jo Uda, ma-ajak ka Padang; wisuda.” Ni Eni manorangan. Atri reah lah senyum senyum ajo.  Samo bona kamek eah jo ‘nan ilang’, tapi Atri tinggih badan eah. Mungkin 3 senti beda eah jo Buyuang gak nyeah.
       “Tu mancari karajo lai tu yo? Tapi kalau sarjana bahasa Inggris keah lai laku; banyak urang nan butuh...”nyeah nan Buyuang. “Iyo Yuang, itu nan ka didanga-dangakan, kok lai ado peluang disiko....” Jawek ni Eni.
       “Awak bahaso Inggris tu iyo patah lidah wak. Ciek ‘Ai lof yu’ nan tantu dek awak nyo....” Buyuang ‘bakilik’. Atri sighah oman eah.  Tagolak pulo pak Syamsir dek Buyuang.
       Jadi kok pulang tasosak Buyuang duo bulan sasudah itu, mangobea-an baso inyo lah ado calon minantu ka ibu jo apak eah, kan lai wajar pulo reah, yo ndak?  “Ughang Kiktinggih calon minantu ibu jo apak, lai indak baa?” nyeah mangecek jo Ibu Apak eah. “Dek kami, pek ma ang ka sonang Yuang. Tapi kok buliah kondak; caghi nan elok laku, rajin sambayang. Kok lah sonang ang, lah sonang pulo kami, nan ka mamakai a-ang...”nyeah nan ibu eah.  Itulah sobab eah, dek lah baedar-an undangan ompek bulan sasudah itu. Pek  Kalideres bagholek. Ibu jo Apak eah, jo mamak jantan eah bagai, lah mancubo pulo naiak pesawat ka Jakarta, dek Buyuang  ‘bajadi’ keah.  Kotu iko, olun ajak nan kini keah mughah pesawat lai.  Merpati jo Garuda ajo nan ado ghu..... Selamat menempuh hidup baru iah Yuang....bahagia dunia akhirat!
EPISODE PENUTUP

        O dusanak kanduang; nyampang basobok dusanak jo ughang jantan saparo-baya, umua ompek puluhan, pek perumahan Puri Indah, Bogor, blok B no sakian, itu iyo Buyuang  meah! Lah batukea maso, lah bagonti tahun, lah panjang jalan iduk.  Umah makan nan pek Depok lah Iyus nan manjago kini. Umah nan pek Sawangan lah godang batingkek, kamanakan guru Wandi nan maunyi. Sakalian lah jadi pajak martabak pek halaman eah. Kalau sonjo jo malam, lah ghami pulo ungang ‘nongkrong’ pek itu
      Anak Buyuang nan tuo, lah klas 3 SMA, sataun lai lah kuliah pulo. Adiek itu, nan jantan, pek SMP, kelas duo.  Buyuang kini lah pek pajak nan di BaranangSiang ajo lai; lah baboli pulo ruko pek iko. Bakalola jo caro modern.  Ado fast-food bagai.  Kalau datang dusanak kiun, ba idangan jus buah jo raga-raga dulu, baghu ba tambuah-an nasi putiah ba asok-asok. Ughang-ughang godang jo pejabat nan banyak makan kiun. 
       Ten pek Puri Indah, Atri lah sibuk pulo tiok aghi mangalola roti usao rumah tanggo.  Kalau dusanak mamboli roti merek ‘Lezat’ pek terminal Baranang Siang, atau jalan Tajur, atau pasar raya, itu Atri nan mambuek jo pegawai-pegawai eah meah.  Inyo ma ajea Bahaso Inggris pek Akademi Perawat jo STIE, jadi lai banyak kotu balobiah, bisa mambuek ghoti pek umah. Lai ba ompek pulo ‘tenaga-kerja’ eah pek dapua!
        Pagi-pagi Buyuang lah maantea anak sikola. Sudah tu dicek umah makan di Baranang Siang.  Siang nyo lah pek umah manolong Atri mangalola ghoti.  Jo onda ba antea-an ka pajak-pajak jo toko minimarket, ghoti reah. Lah ompek pulo, onda manonggok pek dapua malam aghi.... Kok poi ma-ajea Atri, ba antea jo Innova, sudahtu pulang jo angkutan kota ajo nyampang Buyuang sibuk.  Dipandang-pandang, lai sadang-elok, sonang ati takah eah!
        Kecuali duo bulan nan lalu, kotu ado acara ughang awak 5o Kota pek Jakarta, dek Buyuang lai aktif juo di organisasi ughang awak keah, basobok jo Mita pek lokasi acara reah.... Lai pek umah ughang awak juo, nan lah jadi ‘ughang’ pulo pek Betawi keah.
       “Pak Sofyan, ibu itu batanyo, apak ughang mudiak pikumbuah, katonyo...” bawahan Buyuang mangecek.  Buyuang ma arahkan pandangan ka kurisi deretan nomor tigo, ka ‘ibu’ nan dikecek-an sabontea keah.  Astaghfirullah, ajak Mita!!!   Ditonek-an nyeah pandangannyeah dek Buyuang,...yo bona! Mita meah!! 
       Lansuang di jalang eah dek Buyuang kiun!  Mita?! Nde, ba dek lah agak tuo oman eah kini? “Mita kan?” nyeah nan Buyuang. 
“Ca nampak dek Uda? Ughang Bunian?!” nyeah nan Mita.
“Ba ajak eah? Ba dek lai pek iko?”
“Lah tigo taun wak pek Jakarta Da.  Sajak junjuangan wak daulu....” nyeah, sambia manunduak.
         Hah?  Mati laki kau? Ba jak eah?
“Sakik. Indak dapek diubek reah. Wak pindah maajea kiko. Indak ta tahan pek eten lai....”
        Garih pek pipih Mita lah kanampak-an.  Paja ketek nan duduak makan kueh pek bolah suok eah, di paguk eah.  “Iko anak Mita nan ketek....lah jadi yatim....” nyeah.
        “Jo ca Mita pek iko?”
        “Lai ibu mangawani. Apak kan lah daulu pulo....”
        “Wak lah lamo  indak pulang, indak tau berita ughang di umah lai....”
       “Ndak baa do. Uda kan sibuk.  Tapi awak iyo ado amanah nan harus wak sampai-an ka Uda.....” ntu Mita mamandang lughuh-lughuh ka mato Buyuang.  Ondeee, umua jo pangalaman lah maubah ughang manjadi tegas ma-adok-i iduk!  Dulu, katiko  gadih, banyak manunduak jo senyum. Kini lah ajak petugas pajak bumi dan bangunan, mandata penduduk!
       “Amanah apo nan ka ba sampai-an?”
       “Manjalang ka poi, da Irsal minta tolong ka Mita, katokan ka Buyuang Ta, wak mintak mooh, nyeah...”
       “Jadi itu nan da Irsal simpan salamoko?”
       “Katokan sajolah,.....mooh-an bona awak. Sudah itu, bisuak pagi, subuah, baghu poi eah ka Nan Kuaso.....” Mita totap mamandang lughuh. Indak manunduak! Indak ado ibo!  Ba pulo ka jajek?! Lah posai dek ombak!  Lah taompeh kenkaniak saja Irsal poi.  Rauk oman eah lah kogheh..... walau aura sinar mato nan lamo, lai ado juo tasiso.....!
         “Baa dek Uda reah?”
         “Iyo! Samo-samo! Samo-samo bamooh-an awak.” Nyeah nan Buyuang.  Ndak obeh nan ka dikecek-an deah.  Samo-samo ontok ajo, saminik duo minik!
        Tibo-tibo HP Buyuang babunyi. Dipencet Buyuang sudah tu tangoghan paja ketek mangecek monjo....”papa....gerimis niiii, jemputin ntar yaa...kalo jam lima masih hujan..”.  Ha, si Andre, anak Buyuang nan ketek.  Pasti sadang jam istirahat di sekolah unggulan terpadu, tompek Andre sikola kini reah! “Iya Bos kecil, dijemput dooong...” nyah nan Buyuang manjowob.
        Sudah tu inyo bapisah jo Mita.  Mita nan lah pek Jakarta pulo kini kigho eah.  Mita nan lah baubah manjadi ibu nan bajuang soghang jo anak-anak eah pek kota sagodang iko. Dikawani dek ibu eah.  Tapi, lai indak ado nampak sosa pek oman Mita cako reah! Tegar!! Buyuang ajo nan malamun-lamun soghang di ateh Innova daghi Jakarta ka Bogor.  Ati-ati Yuang, jalan tol keah ghami!