PINDAH

·         PINDAH

Oleh Hanafi Risa di mudiak @ dot COM · Sunting Dokumen · Hapus

‎"Ntu iyo indak ka babaliek ang ka ken tu?"

"Iyo indak takah e reah Da. Tianlah dicubo maubah tompek duduak..."

"Olah ang pikie an bona reah?"

"Raso-raso eah , olah..."

"Kok nyan deen, baliek awak ka rantau baliek, pek umah den ajo ang dulu manotap, kok makan pagi jo sonjo, kan lai ka samo makan juo wak nyeah?"

"Apo meah da, iko,..apo ko ha. Taragak pulo wak mancubo togak sorang, kok lai bakobua doa dalam sambayang tahajut, kok lai ka dapek pulo rasoki pek nan baru keah.."

"Indak tagak dek paja nan manih reah deah kan? Ang kodok bona ba sms jo inyo nampak dek den kotu rayo geah?!"

"Nggg...nggg,....nggg........t

ianlah Da, barangkek ajolah uda dulu bisuak...nggg..."

***

‎"Baa?"

"He..he...tianlah da."

"Jan golak-golak ketek ajo. Kok ragu-ragu, malah, masuak-an baju ang ka tas. Tu Uni jo Nakan ang lah dalam oto ha!"

"Raso-raso lai ka lomak pulo mbukak fotokopi pek ilie Da. Lai ado petak nan ka diseo..."

"Kok bitu nyen-ang, ndak baa reah. Ko den tambah piti ang sajuta ha. Ang lah banyak manolong kami pek eten salamo keah. Kami doa-an malah, berasil ang pek umah keah.."

"Mokasih da, mokasih banyak,...mokasih bona den..."

"Jan dicium-cium pulo tangan den lai. Ati ang ajolah pakoreh, jan biko lun sabelok, lah lomah pulo smangek!" 

"Indak da, indak! Mokasih ieh..."

***

‎"Assalamu'alaikum! Atuuuk o atuk!"

"Isan. HP ang babunyi!"

"Halo?"

"Assalamu'alaikum. San, ko uda!"

"Alaikum salam da, lah tibo Uda pek eten? Lai indak macet?"

"Alhamdulillah, basilambek ajo kami. Kodok baronti-ronti. Ba, lai bi siat ajo di umah? Amak jo Apak baa?"

"Lai. Lai siat ajo Da. Amak nyak meah pek dapua manumbuak lado. Apak ka baruah!"

"Syukurlah. Baa duduak ang? Lai jadi pek Tanjuang Pati? Lah mulai bakojo?"

"Lah tibo masin fotokopi cako pagi Da. Lah den ansua manyusun pajak; tapi olun babukak lai. Dibarasiehan bona dulu. Lai omuah urang punyo pajak reah dibaie duo tahun ....."

"Aa ancak reah. Elok-elok jo urang sakalilieng muah. Mangalah-ngalah ajolah...."

"Adih Da. Mokasih."

"Ho-oh. Katoanlah ka amak, den lai salamat tibo pek niak. Salam dari cucu amak pek niak sado eah jeah. Assalamu'alaikum."

"Iyo Da. Alaikumsalam.."

***

‎"Uda ang nelpon kamuah San?"

"Ho-oh."

"Lai salamat ajo eah pek jalan?"

"Lai. Lah tibo eah sonjo cako nyeah. Bisuak lah bukak toko eah baliek reah..."

"Syukurlah. Sudah rayo geah lun banyak jua boli biaso eah lai. Kotu amak pek itu dulu, lai sadang elok rami eah toko Uda ang reah..."

"Den bisuak mulai pulo nyubo Mak. Doa an dek amak dih....pagi-pagi den ka ilie, den bao onda apak!"

"Katoanlah ka apak ang."

***

SMS.

"Assalamualaikum da Isan, jadi ka ilie pagi ko kan? Eci tunggu di simpang....Kuliah jam 7...balas"

"Alaikumsalam Ci, iyo. Tapi wak barangkek jam satangah lapan. Dek nio samo jo Eci, wak barangkek jam sangah tujuah ajolah dari umah, tunggu yo...balas."

"Iyo. Eci tunggu...mokasih yo Da."

Ndeh!!

***

‎"Lah lamo Eci mnanti yo?" "Mananti tantu iyo lamo!" "Ndeh! Kok basayok onda keah lah tobang wak meah!" "He he" "Ba kok golak?" "Ma lo onda ka basayok!" "Ado!" "Onda apo tu?" "Onda urang kanai ati..." "Iiiih uda!"

***

‎"CI turun di gerbang ko ajolah Da..." "Bia uda anta sampai ka dalam kampus." "Jan lai. Siko ajolah. Siko ajolah Da!" "Malu nampak dek kawan yo? Atau ado pulo onda basayok dalam kampus reah?" "Ha Uda! Mulai ken kaniak pangona uda kan?" "Ngoku ajolah wak; iyo! Parumahan data pasti banyak nan katuju." "Sia nan parumahan data?" "Ado kawan wak ciek!" "Iiiiih... Ci kuliah yo. Ati-ati." "Weh, kok ado kawan fotokopi, suruah ka tompek wak yo?..."

***

‎"Trrrrrrrrrrnnnnnnnnn....trrn

, trrrrn.....klek!"

"Baru tibo ang? Lah sonjo piriek."

"Lai ado juo urang tibo kapajak puku limo Mak, ibo wak."

"Apak ang lah poi ka masojik, bajalan kaki ajo. Onda ang dinantiannyeah cako..."

"Bisuak malam pek ilie ajolah den lolok dih Mak. Lai lapang pek bolah lakang eah."

"Pek ilie ang malam, jo a ang ka makan?"

"Banyak urang manjua nasi pek Tanjuang Pati reah. Bakso pek bolah keen simpang kampus Politani ten, lomak pulo."

"Jak itu gaya ang, indak talungguak piti te reah! Baimat mangko ka kayo..."

"Bakso reah indak den tio mboli reah Mak.... Eci."

"Paja nan kaiko kotu rayo potang?"

"Ho-oh."

"Den tungkuhan lah nasi, ntuak kamakan ang. Jan bamakan pek pajak pulo lai!"

***

"Den ka ilie lai Mak, Pak. Assalamu'alaikum."

"Eh,San, kunci onda pek ma ang lotak-an? Den ka poi ka Mungka biko."

"Eh, iyo! Nyak dalam saku den juo baru."

"Anak Oji Kayo baposan potang pek masojik, nyo maajak rapek pemuda belok muko, nyeah!"

"Endi?"

"Iyo. Ang dek lah di umah, kok dapek samo mamikie an nagori keah awak, nyeah."

""Ari Sotu sonjo atau ari Akad den bisa e nyeah. E iyo; lapiek ketek den bao ka ilie dih Mak?"

"Baolah. Tu nasi ang pek teh meja lah batungkuh. Elok-elok. "

"Iyo, assalamu'alaikum."

"Alaikumsalam."

***

‎"Apo diek? Fotokopi?...."

"Tolong ganti kulik laporan wak ko Da. Jo hijau mudo. Salah wak kapatang! Rangkap tigo Da. ..."

"Jadih. Ditunggu? Japuk beko se?'

"Wak tunggu lah Da...jam sabaleh ko dikumpua jo dosen mah."

"Apak, apo pak? Fotokopi yo Pak?"

"Iko ah, buku palajaran anak wak. Klas limo SD. Tolong fotokopi. Antah baa lah sababnyo, buku teks ko indak nyo pinjami sajo dek sikola nyo. Tapaso awak mamfotokopi. Kama pai nyo piti BOS tu.. Bali buku gak ampek puluah, kan indak ka bara bana tu do.?"

"Iyo Pak , yo. Duduak apak manunggu sabonta dih..."

"Sangah jam lai lah den kamari. Tolong jaleh-jalehkan hurufnyo yo, jan kabua!"

"Kalau nan ba warna ko, mungkin agak kabua setek Pak...tapi wak usaokanlah supayo tarang."

"Iyo. Tolong lah!"

"Adiek, apo diek?"

"Ado pensil warna Da?"

"Onde alun manjua Uda pensil warna lai do Diek. Bisuak mungkin lah ado..."

***

‎"Assalamu'alaikum ......."

"Hallo? Alaikumsalam! Uda?"

"Iyo. Wak lah manutuk pajak. Jadi ka mudiek sonjo keah?"

"Iyo Da. Iyo. Ci mandi dulu sbonta dih? Tunggu Ci di simpang bawah batang kayu muah......."

"Weh, jadi Ci ka pasea potang?"

"Lai Da. Lah Ci bolian posan Uda. Rantang rancak, sirah mudo."

"Bara ogo eah?"

"Jan tanyoan pulo lai. Ci bolian untuak Amak. Ikhlas....."

"Ndee....iyolah. Uda tunggu yo. Assalamu'alaikum."

***

"Mudiek! Mudiek! Sorang lai!"

"Tu oto Da.!"

"Ka mudiek Da? Ni? Malah!"

"Lai ado juo bangku? Lai tamuek kami baduo?"

"Lai Da. Masuak tangah ko ha. ..."

"Nde, lah batigo? Pek ma kami ka duduak geah?"

"Tamuek ma Da. Ko balimo isi nyo ko! Tolong geser-geser sinan Apak tu sktek Pak! Ha masuak Uda ka dalam Da, urang-rumah uda duduak tapi ko ha... Masuaklah! Oto ndak ado lai, ari lah sanjo!"

***

"Ba kok senyum-senyum Ci?"

"Goli-goli poruk Ci ndonga kecek cingkariek cako..."

"He he. Mungkin dek awak mambao sia rancak untuak amak keah gak nye ieh? Anggap sajo do'a, yo ndak?"

"Iyo lai ka lai Da? Kuliah Ci insyaAllah tingga sataun iko lai..."

***

‎"E uda Ican tibooo..uda Ican tibooo..."

"Salamu'alaikum. Ma amak Ta?"

"Uda mboli kueh bolu yo? Aa isi sia uda reah?"

"Sia kosong meah. Baru boli, ntuak amak."

***

"E, lai jadi ang bolian den sia? A iyo jak iko. Soman jo nan dibao Supiek kotu barolek paja kaluak bulan nan lopeh."

"A samba amak mak?"

"Ikan rayo diboli apak ang pek Ndonguang cako. Gulai kamumu. Karupuak Lamiah bagai pek lam boto tuha."

"Tu iyo makan wak ciek lu reah!"

"Lah sambayang magorik ang? Sambayang dulu!"

"Iyo. Mbayang lu. Solang onda Mak? Den ka mahsikola mudiek, rapek pemuda bontea lai..."

"Ngeceklah ka apak ang. Kunci dalam loci masin-jaik dilotak-an apak ang meah!"

"Apak ma nyeah?"

"Tu nyo pek lakang nonton tipi."

***

“Lah makan apak?”

“Makan lah ang lu, nyak sadang bakatumpeh urang pek tipi ah…”

“Apak Eja sakik, ndak bulieh dek dotor nonton tipi lai pak.”

“E nyo dijadian hiburan ajo ‘silek’ urang geah. Awak manonton. Tengok dek ang, lah di’kojo’an nyeah sado eah. Lah disimpai eah sado nan ka godang. Soman jo Akbar dulu. Sudahtu Yusril. Kini Anas, Muhaimin. Biko manjalea pulo ka Gamawan …”

“Apak pikie-i sadoan nyeah? Biko sakik ajo kapalo apak sorang.”

“Ndak den pikian bona tio deah. Tapi taragak juo wak jo Hatta, Natsir, Hamka, Agu Salim, Yamin, Syahrir. Padiea an ajolah ieh. Nyo ka ajak itu ajo toruh sampai kiamat takah e nyeah! “

“Onda, den bao ka mahsikola dih Pak. Rapek nan diposanan Endi reah ha…”

“A, sasuai jo nan pek tipi geah ha. Pek kampuang awak geah lah tabolah-bolah pulo urang. Pajak simpang bolah kida kalompok eten. Pajak bolah suok, kalompok inyak. Biko kok jadi rapek; ba pandai-pandai ajolah ang. Kok indak sasuai awak, jan dilawan ajo. Ancaklah ontok; urang indak tasingguang. Awak ka bagaul lamo dalam nagori keah.”

“Den manolong dari topi ajo Pak. Dek den, asa lah tabukak pajak pek Tanjuang Pati ten, lah jadi reah…”

“Yo bitu. Sadangkan kami pek masojik, lai ado juo gisie manggisie. Bak kecek pak Quraish Sihab pek tipi eah; pek masojik ado pulo syetan eah…”

“Onda den bao dih pak.”

“Baolah. Ati-ati.

***

"Ku bara ang baliek rapek malam?"

"Lah ampieng ku duoboleh Pak!"

"Lai lancea-lancea ajo tu?"

"Bagalebuk juo pangka eah. Tapi untuang ado da Iwan ka tongah. Bak kecek apak potang, bagai-bagai urang keah. Ado nan codiek mangecek. Ado nan tukang sunu. Ado nan datang mambagi-bagi okok Samsu."

"Ntu aa hasil eah?"

"Pengurus remaja masojik dijadian lansuang sabagai seksi rohani Pengurus Pemuda."

"Ba rencana kegiatan nyeah?"

"Itu nan agak panjang etongan nyeah malam Pak. Ado nan mangaritik, program salamo keah indak efektif reah nyeah. Pangajian itu-ka-itu ajo nyeah. Lai bisa agamo keah ma mikie an penanggulangan anak yatim piatu jo kaluarga miskin; lai bisa pemuda remaja masojik ma mediasi urang kayo jo nan bansat?"

"Iyo pulo reah ieh. Kalau gotong-royong jo pangajian reah, tianlah kami nan tuo-tuo keah ajo manjalanan."

"Solang onda Pak?"

"Kama leah ang?"

"Den tagak main ka umah kawan ilie ten bonta ha..."

"Kawan ma pleah? Sijadi eah orun ang tabaun dek den."

***

“Kama Isan cako pak-paja?”

“Ka umah kawan eah nyinyo!”

“Ka ilie reah;  ka umah Eci..”

“Lah tapauk bona ati eah Nampak dek den?!”

‘Iyo takah eah. Lah jauah marantau, lai nan pek umah keah juo nan manyangkuk ati eah.. Anak bujang Tuan reah mambisiek-an ka den malam cako, sia rancak reah hadiah dari Eci untuak Amak, nyeah”

‘Nan ka siko kotu ari rayo kan? Nengok pambawaan nyeah, lai manih lombuk nampak dek den. Eee, ajak kau kotu gadih dulu eah.”

“Ho-oh. Iyo itu! Ntah pek ma basobok eah, lah ajak sailie-samudiek ajo!”

“Kecek Uda eah, sobok pek pesbuk, nyeah.”

“Bolah ma Kiktinggih, pesbuk reah tuan?”

“Baa kok ganjie coliek papa ka Eci?”

“Yelsi, …..iyo ado nan ka Papa  tanyoan….”

“Apo Pa?”

“Papa disindie kawan pek  pajak pagi cako. Ka ma anak jo minantu pak Mantari poi-manjalang,  mambao sia,  potang, nyeah. Pek Pikumbuah baduo jo ‘laki’ eah, nyeah…”

“Ndeh, salah sangko urang tu meah Pa..”

“Lah bajalan bairieng baduo-duo Yelsi jo Isan tu?”

“Samo pulang dari Kumbuah ajo nyo Pa…kan ndak baa tu do? Satau Ci, da Isan reah lai elok ajo nyo…”

“Mambao sia baa pulo?”

“Da Isan mambolian rantang untuak Amak nyo…”

“Ooooo….tapi kuliah Elsi  baa? Tahun ko lah tomat  kan?”

“InsyaAllah Pa.”

“Baa rencana anak Apa sudah tu?”

“Ci jo kawan-kawan lah maisi formulir karajo manjalang puaso Pa. Ado perusahaan perkebunan sawit di Riau. Nyo mambukak paluang pengawas lapangan jo administrasi, nan ba latar balakang pertanian. Kakak angkatan Ci nan lain, ado nan lah bakojo pek dinas pemda Batusangkea, penyuluh lapangan.”

***

“Weh,…..”

“Tibo? Ba dek babaju ancak bona reah?”

“He he. Baju biaso ajo nyeah. Rami rang fotokopi? Ci tolongi ….”

“Nolong jan tangguang-tangguang, saumua iduk! He he..”

“Da, ado surek dari perkebunan sawit di Riau tibo potang.  Ci disuruah ngiriman ijazah SMA jo transkrip samantaro. Ci fotokopi dih..”

“,,,,,,,,,,,,,,,,,,,,,”

“Ba dek ontok ajo Uda?”

“Kok ditarimo pek itu, baa?”

“Alhamdulillah. Indak manganggur Ci sudah wisuda do, kok lai tomat bulan-bulan ka datang.”

“Iyo. Tapi ka Riau berarti reah kan?”

“…………..iyo.”

“Ndeee, tu borek reah kanduang! Wak salosaian fotokopi iko bonta, ngecek bona wak pek lakang!”

“?”

****

“Ci. Sajak sobok di facebook, wak iyo lah tatariek jo Ci. Status Ci santun, kadang ayat Qur’an, kadang hadis.  Sojuak ati wak nyeah. Foto profil iyo lai sasuai pulo jo ati wak. Sajak ngecek partamo kali dulu, lah badotak ati wak,  iko mungkin nan ka kawan iduk wak. Itu dek koreh ati wak pulang. Itu pulo sobab eah wak tulak Uda mambao baliek keen. Lah bagaua sajak manjalang rayo, sampai kini, iyo lai katuju laku Ci dek awak.”

“…………..”

“Nyampang poi Ci jauah-jauah, iyo borek ati wak,…..”

“………….”

“Ba dek Ci reah?”

“…………..”

“Ba-a dek Ci?”

“…………..”

“Ba dek  ontok, manunduak, main-main jari ajo? Ilang aka wak nyereah Ci. Jaweklah, gak sapatah baiek….”

“Da. Ngoku ajolah Ci. Ci iyo jak itu pulo. Nyampang iyo baniat elok Uda, jankan lamaran bakojo, lah bakojopun, omuah wak baronti, kalau itu nan ka ridho dek laki wak… Bajoleh-joleh awak jo amak jo apak lai. “

“Nde, koncang donyuk jantuang wak ndongea jawek Ci reah. Pucuak dicinto ulam tibo bona. Raso-raso ka awak,  Tuhan Alloh palieng sayang kini keah ha…”

“Ci iyo pulo Da.”

“Kok halal, wak paguk Ci orek-orek kini juo…”

“Ado urang di muko, Fotokopi , gak nyeah?!”

***

UNDANGAN

Yelsi Rahman Dt Mantari

&

Ihsan Saputra

“Dan diantara tanda-tanda kekuasaanNya ialah Dia

menciptakan untukmu isteri-isteri dari jenismu

sendiri, supaya kamu cenderung dan merasa tenteram

kepadanya, dan dijadikanNya diantaramu rasa kasih dan

sayang. Sesungguhnya pada yang demikian itu benar-benar

terdapat tanda-tanda bagi kaum yang berpikir”

****

Toko FOTOKOPI & ALAT TULIS 'HIJRAH"

Juga tersedia: Rendang telur dan Kerupuk Sanjai

Melayani pesanan bibit bunga dan buah-buahan.

Tanjung Pati- Payakumbuh.

(Ihsan dan Yelsi)

Selesai....tq dan maaf.