BUYUANG PANTUN

*BUYUANG PANTUN* Pagi Sabtu Buyuang Pantun indak ado acara. Pansiun dari BUMN Karya. Indak eselon tinggi bana. Hanyo pegawai karoco saja... Buyuang duduak di kurisi. Mancakah mairuik kopi pagi. Sambia manonton televisi. Tantang Joshua, capres dam G twenty... Ditengok pulo di layar hape. Urang kayo tanahnyo gede. Luas DKI hanyo saparampek sae. Nagari lawehko, nyo bagi bak kue. Dicaliak ka badan diri. Dulu manganggur indak bapiti. Ka Jakarta untuang dicari. Karajo sarabutan manjadi kuli. Tiok pagi makan bakwan. Jo Paijo Satiman badan bakawan. Bangunan tinggi sampai ka awan. Di sinan untuang bagadaikan... "Srrrrp....." dihiruik kopi dulu yo kawan...😁🙏 BUYUANG PANTUN Salasai Rayo kawan lah baliak. Lah rami pulo camp triplek. Taidang kue jo dodol baminyak. Puehlah Buyuang mangulek-ngulek. Takana kue sagun Bundo. Atau kacang tujin dalam boto. Nyampang di Pikumbuah badan Rayo. Tantulah pueh pulo salero. Disabakan malah dulu hati. Adaik kayu batambah tinggi. Kan iyo banyak rintang dilalui. Dikadukan sajo ka Ilahi Rabbi. Kok puaso buluih iyo lah nyato. Tapi sumbayang kan lai indak tingga. Kadang iyo dijamak juo. Dalam zuhur tabaok asha. Paijo pandai bainduak samang. Mandor nyo agiah kue kacang. Tantu nyo tarimo jo ati gadang. Nyo puji Paijo tinggi ka awang-awang! "Enak bener lho bang Paijo. Bini lu pinter masak nye!" 😁👍 BUYUANG PANTUN Pagi tadi Buyuang indak masuak. Badannyo damam sajak kapatang. Malam mandingin basin jo batuak. Lalok malangkuang kapalo paniang. Pak Manap ibo mancaliak. Nyo agiah ubek duo tablet. Ubek komersil iklannyo rancak. Ampuh malawan damam mumet. Sanjo sapulang bakarajo. Pak Manap lai singgah pulo. Lai sanang di dalam dado. Buyuang baransua siat juo. Sakali wakatu pak Manap maimbau. Buyuang ditawari baraja nyopir. Siapo tau nasib tarambau. Malicak aspal karikil pasir. Mako batambah ilemu Buyuang. Indak sakadar maaduak simin. Wakatu taluwang usah bamanuang. Bantu pak Manap aspal licin. BUYUANG PANTUN Hari Minggu karajo libur. Walau ado juo nan lembur. Paijo alah sarapan jo bubur. Sudahtu nyo lah lansuang mandi badebur-debur. Nonton pelem ke Senen yok! Kato Paijo maajak kawan. Sawijo setuju matonyo mangijok-ngijok. Buyuang maleh, kapalo nyo geleangkan. Lamak maota sajo jo pak Manap. Tantang karajo dan kehidupan. Gaji ditabung Yung jangan kalap. Kalo bisa kredit rumahan.. Kredit rumah, tanyo Buyuang. Iya, jawek pak Manap. Kito indak tau nasib jo untuang. Hiduik harus ditata dengan mantap. Sadang maota Paijo tibo. Sawijo maikua dari bulakang. Sarupo kusuik roman muko. Ruponyo dompet alah hilang! Aku tak pinjam duit jenengan yo! Kato Paijo baibo hati. Buyuang maangguakkan kapalo. Paijo talungkuik wajahnyo pasi.. Jooo, Jo! 1 BUYUANG PANTUN O dusanak kasadonyo. Bak ikolah rasonyo tarimo piutang. Pitih Buyuang lah dibayia Paijo. Buyuang saraso kayo gadang! Beli motor yo Yung? Baitu tanyo si Sawijo. Buyuang bapikia hati binguang. Nasehat pak Manap malinteh tibo-tibo. Mambali rumah ketek? Bara haragonyo? Angan tinggi pinggalan singkek. Antah kok angan-angan sajo. Ada kok yang murah. Info dari kawan pak Munap. Namun jauah dakek sawah. Pinggiran kampuang rasonyo mantap. Maklum di maso nantun. Jakarta alun sarami nangko. Masih banyah daerah dusun. Walaupun administrasinyo ibukota juo. Lah babayia anamratuih ribu. Sisonyo dijanjikan Buyuang bulan katibo. Lai dingin tangan anak ibu. Barokah rasaki bujang nangko... BUYUANG PANTUN Tigo bulan rumah ketek lunas. Tapi dompet jadi kosong. Piti nan gadang alah tewas. Piti ketek tabao lendong Namun hati lai sanang. Halaman muko balakang laweh. Ditanam sajo sawo jo balimbiang. Rajin dibarasiahkan supayo segeh. Tapi kan baitu pulo dusanak. Angin indak taruih kancang. Matohari indak taruih tagak. Kadang timbua kadang mahilang. Mako tajadilah malapetaka. Demo gadang di Jakarta. Rami masyarakat campua mahasiswa. Sado produk Japang dibaka. Abihlah sedan corolla jo corona. Baitu pulo truk kepala buaya. Land Cruiser hardtop terbawalenda. Malari orang beri nama. Tahanti proyek tampek karajo. Abih oto dibaka massa. Pak Manap tabaok sato. Nyo dijadikan pahadang mahasiswa. Tamanuang Buyuang di suduik Jakarta...ndeh tuan. 1 BUYUANG PANTUN Situasi ternyato lamo barubah. Indak sacapek bumi hangus. Buyuang bapikia di bulakang rumah. Sabab iduik balanjuik terus. Bialah urang maoyak pentas. Atau orasi level atas. Nan paruik indak bisa bebas. Manuntuik bakwan, jo teh panas. Mako dirabuih aia jo gincu. Dimasuakkan induak gulo. Usah cameh ayah jo ibu. Buyuang bajuang saabih tanago. Didagang minuman dalam plastik. Dibaok ka simpang rami. Wahai abang wahai adik. Tolong, balilah bali.... Kok indak bana gadang labonyo. Bareh jo sapek lai tabali. Usah mengkhayal randang kalio. Asalkan ado lado, baguak sarato nasi. Makin jauah badan bajajo. Makin sampai di pusek kota. Urang mambangun nampak pulo. Karajo daulu baliak takana.... Lai lah ado peluang Om? BUYUANG PANTUN Dimasuki pintu gerbang. Didakek-i urang manjago. Silakan beli minuman, Bang. Gocap satu, cepek duo! Panjago proyek mancaliak angkuh. Kagak, sono jualan, katonyo. Tapi awak iyo butuh. Ditahankan sajo raso di dado. Kerja bangunan gua mau. Kato si Buyuang sasudah tu. Tapi panjago diam bisu. Sarupo maleh kanai ganggu. Untuang lewat mandor tuo. Inyo batanyo apo keperluan. Awak ko mancari karajo. Kato si Buyuang mambungkuakkan badan. Sudah penuh semua. Kerjaan gini mah banyak peminatnya. Situ bisanya apa. Bisa hendel bebiroller, apa? Tahantok malah anak mandeh. Bebiroller tu apo mukasuiknyo. Muncuang mangango, mato awaih. Galedor kah mukasuik apakko? Tuh, talunjuak apak tu ka galedor. Muko Buyuang langsuang ceria. Engkol mesin gigi diopor. Tuas kiri pengarahkan roda. Bisa pak jaweknyo capek. Takana palajaran pak Manap. Coba lihat SIM alat barek. Kato apaktu, sunguiknyo diusap. Onde mande, apak jo amai. Jikok SIM nan ditanyo. Alamat badan ka marasai. Sabab kartu SIM tu indak ado. BUYUANG PANTUN Buyuang disuruah maiduk-i mesin. Lalu lanjuik maju mundur. Buyuang gembira dalam batin. Kapado Tuhan inyo basyukur. Bisa juga ya? Tukang jual minuman bawa alat berat? Apak mandor senyum gembira. Lansuang nyo salami erat-erat. Hari tu juo masuak karajo. Saragam kostum dapek pulo. Makan siang basamo-samo. Onde Tuhan, samudah iko? Data diri dimintak mandor. Duo hari surek SK kalua. Saminggu Buyuang disuruah lapor. Ka kantua di pusat kota. Tanyato Buyuang dibuekkan SIM. Diagieh tau hak kewajiban. Bismillahirrahmanirrahim. Kini status jadi karyawan. Manangih Buyuang sujud syukur tangah malam... BUYUANG PANTUN E agak lapang taraso dunia. Lah sabulan -duo bulan badan bakarajo. Lah tabali lepis jo kemeja. Rambuik balumua jo minyak Tancho. Bulan kaduo disuruah pindah. Ka komplek perumahan punyo kantua. Rumah di jaksel dikontrakkan malah. Ka pegawai lurah paro umua. Adaik urang baru masuak. Tatap yunior posisi awak. Parentah atasan pantang ditulak. Bakubang tanduak asalai lamak capak. Satahun lah barubah tampilan. Lah agak barisi badan. Sajuak hubuangan atasan sarato kawan. Ka kampuang lai pulo ado kiriman. Kain saruang kopiah beka. Untuak sumbayang ayahanda. Sajadah mukenah biru muda. Untuak sujuik dek ibunda. Laweh galak ibu pai ka mushalla pangajian. Buah paluah anak deyen... 1 BUYUANG PANTUN Jadi, indak lagak sajo nan batuka. Pergaulanpun agak barubah. Dulu hari Minggu di camp sajo maota. Kini lah ado undangan ka gedung mewah. Acok pulo dibaok dek kepala divisi. Mahadiri pesta sana-sini. Buyuang ikuik sajo walau gali. Sabab banyak nan hadir basuami istri. Minggu kapatang ka Kebon Sirih. Iko pesta kamanakan wadir. Buyuang manyiapkan baju batiak tulih. Sarawa Arafiq putih ba ulir Satiok kondangan banyak pamandangan. Ado nan kamek ado nan sopan. Anak Amai mulai ba angan-angan. Raso ka lamak pai baralek babimbiang tangan. Mako dipanggia Buyuang jo pak Mandor. Diajak duduak di barisan muko. Sofa empuk per nyo kendor. Lah tabanam pinggua sarato paho. Kenalkan Yung, anak pak Kadiv. Baitu kato pak mandor Jakfar. Gadih sumampai babungo motif. Buyuang mamandang dado badebar... Antaro senyum jo indak. Antaro manunduak jo tagak..... Parfumnyo lambuik semerbak. Buyuang tangango capek tagak... Selamat datang abang Buyuuung, tadanga sapo. Suaronyo mirip jo dusanak padusi di kampuang. Iyo, iyo,..Buyuang manjaweknyo. Sudahtu lah sarupo urang binguang.... BUYUANG PANTUN Pulang kondangan pak Kadiv maimbau. Buyung pulang bareng sajo. Jo jeep willyz oto baliau. Tantu barek ka manulaknyo. Buyuang naiak di jok bulakang. Hep, ruponyo anaknyo lah di dalam. Si Nurma senyum mengembang. Monggo bang Buyung usah terdiam... Singgah ke rumah dulu Yung. Nanti bapak antar ke mess. Buyuang lah patuah sarupo patung. Nurma bacolak bibia bapoles. Singgah dulu ke gubuk kami ya Bang. Baitu kato si Nurma. Sesampai oto masuak ka laman gadang. "Indak, indak usah, kapan-kapan saja" Pak Kadiv senyum mamacik setir. Anak jo bini alah turun. Buyuang anggan singgah melipir. Hatinyo badabok jantuang badabun. "Langsung sajalah saya ke mess pak ya...." BUYUANG PANTUN Sampai di mess Buyuang tilantang. Maetong petak di plafon kamar. Fenomena "aneh" di satiok anak bujang. Sarupo labah manampak mawar. Nyampang ditanyo ka dalam hati. Jujur, indak ado nan sasayang Ibu. Nan bajuang iduik mati. Manganduang, malahiakan , maagiah susu. Namun adaik hiduik di dunia. Maso ketek kini lah tingga. Lah pulo talampaui remaja. Lah patuik koklah jadi apak paja? Dikana-kana paras si Nurma. Matonyo bikilau bagai kejora. Saraso kalbu terpesona. Anu, apo, itu, eh, ba'a koh ba'a.... Mandor Jakfar senyum dikulum. Mancaliak Buyuang makan siang. Di area karajo dakek stadium. Lansuang nyo mandakek mamandang. Bapak tau yang Buyung fikirkan. Baitu baliau mamulai pembicaraan. Sudahtu sesuatu nyo bisiakkan. Buyuang tagalenjek taheran-heran... Yobana tuh pak? BUYUANG PANTUN Pak Jakfar mamandang tanang. Incek matonyo indak berkedip. Buyuang antok malayangkan pandang. Dalam hati persaan terselip. Kato pak Jakfar, Nurma tu jando. Parnah balaki satahun sajo. Alun baranak, suaminyo marabo. Lalu nyelonong pai baitu sajo. Pak Kadiv tak bisa berbuat apo-apo. Nurma pun baitu pulo. Suaminyo minggat bahati hibo. Alasannyo, mooh, iko rahasio. Sajak sudahtu Buyuang manjago diri. Indak jauah indak pulo dakek. Muduh-mudahan pak Kadiv memaklumi. Usah tatimpo kuah angek. Tapi nyatonyo indak baitu. Pak Kadiv mungkin raso kecewa. Buyuang dimutasi ka Bengkulu. Propinsi nan umuanyo sadang remaja. Oih, ditangguangkan sajo dulu.... BUYUANG PANTUN Naiak pesawat di bandara Halim. Dari mess pagi-pagi. Kawan-kawan bersimpati mambari salamsalim. Raso taibo dalam hati. O rantau sati lauik batuah. Salamat tinggal ambo ka pai. Ikhlaskan sagalo khilaf jo salah. Singguang jo gisia kito sudahi. Fesawat fokker tabangnyo randah. Lautan jaleh dari jendela. Antah ka siapo tangan dahdadah. Di Bengkulupun tak ado sanak saudara.. Lah mandarat di Kemiling. Tabang mulus tak ado goncangan. Urang manjapuik iring beriring. Anak amai mancari tumpangan. Pasar Jitra Teluk Segara. Buyuang manyabuik ka taksi bandara. Sopir oto tasenyum gembira. Lai tak jauah dalam kota. Tasarah sajo barapo sewo. Nan pentiang badan tibo di alamat. Tas jo dompet salalu dijago. Jikok hilang bisa kiamat. Untuang ado panjago kantua. Buyuang ditempatkan di kamar paviliun. Manjalang mugarik Buyuang jalan ka lua. Siapo tau ado sate bubua kampiun... Langang di Bengkulu ko yo? BUYUANG PANTUN Bisuak pagi cuaca cerah. Buyuang tajago agak fajar. Mungkin dek suhu rada gerah. Sumbayang subuah, qiraah sa lembar. Lai lah banyak jualan kue. Di tapi jalan Hazairin. Di tampek kapatang bali sate. Donat jo sus rada asin.. Dipiliah baju nan langan panjang. Dipakai sarawa baru hitam. Buyuang lah di kantua saat masih langang. Mananti pak kasie duduak di dalam. Ado padusi ketek duduak di meja. Sadang manyiapkan absen dan vas bunga. Buyuang ado kesempatan sekadar bertanya. Menghadap kasie di kesempatan pertama. Bapak tunggulah sebentar, katonyo. Pak Mulia biasonyo datang on time. Buyuang patuah mahangguakkan kapalo. Lansuang Buyuang duduak kalem. Panarimo tamu tu sibuk barasiah-barasiah. Sasakali mancaliak ka Buyuang. Indak lamo datanglah oto putiah. Pak Mulia turun mamacik karateh baguluang. Di kamar beliau Buyuang ditarimo. Apak tu maangguakkan kapalo. Memang Jakarta lah kontak ka ambo. Kebetulan posisi kosong lah lamo. Jiko di pusat awak jadi kalene. Di daerah disuruang kapalo gudang. Amanah nan usah dipandang sepele. Tegas harus, senyumpun ijan kurang Sabulan duo bulan mulai lamak. Lai takumpua gaji anak amak. Makan murah marokokpun tidak. Libur tahun baru pulkam yo sanak? BUYUANG PANTUN Dari pengalaman di Jakarta Buyuang baraja. Baa caronyo manyanangkan hati atasan. Usah sakalijuo budi tanoda. Barek resiko lancuang ka ujian. Pandai-pandai manjago diri. Jan diupek pilihan politiknyo. Sakalipun tak sasuai jo hati. Elok antok usah bakato. Jikok disuruah capek karajokan. Istilah kini; ketawa karir. Tugeh nan capek disalasaikan. Pabanyak angguak senyum di bibir. Dek capek kaki ringan tangan. Acok diajak ka lapangan. Muko-muko, Curup, Manna bahkan. Kadang pulangnyo dibalikan durian. Dek banyak oleh-oleh. Diagiah Buyuang ka pak Soleh. Kadang durian, kadang bareh. Kadang sakaniro renyah meleleh. Pak Soleh ko panjago kantua. Tampek paviliun tumpangan badan. Urangnyo lah gak ba umua. Mungkin lah hampia kapalo anam. Nde, elok nak Buyuang ko ka apak, ...katonyo. 1 BUYUANG PANTUN Rumpuik saruik panjanglah baa. Lah lamo pandan maladuangkan. Indak taraso wakatu baputa. Lah talewat pulo tigo bulan. Iyo tibo di ujuang tahun. Lah tabayang libur di kampuang. Lamo marantau pulang sakalipun alun. Kadang tabaok dalam manuang. Tiket ALS lah dibali. Izin pak Kasie dapek pulo. Uda kok pulang nyampang jadi. Baoklah makanan jo handuak baru ko. Baitu kato si Uci. Gadih ketek meja tamu. Nan dahulu partamo ditamui. Eh, Uci, baa pulo kok baitu? Indak tinggi indak randah. Tido buruak tido rancak. Sadonyo ambiak sifat di tangah. Jiko dimake-up tantulah tacelak. Salamoko dianggap kawan biaso. Ponakan pak Soleh panarimo tamu. Tiok hari meja muko dijago. Tampil sederhana, pegawai baru. Tingganyo tak jauah dari kantua. Ibunyo manjua lontong pical. Satiok sanjo inyo maaja. Mangaji Quran anak-anak sakitar. Tantu bapikia Buyuang jadinyo. Makanan jo handuak partando apo. Cubo dipandang nyo manunduak sajo. Indak tapanca sapatah kato. Baa lah ko Tuan? BUYUANG PANTUN Sampai malam sabalun barangkek. Buyuang masih raso penasaran. Dicubo maingek-ingek. Rasonyo indak pernah tingkah jo kato basampaikan. Pagi akaik alah tibo. Tas ransel panuah isinyo. Pulang kampuang anak amai beko. Eh, si Uci takana juo. Elok dituruik ka lapaunyo. Diajak barundiang baiyo-iyo. Supayo jaleh duduak tagaknyo. Sanang hati sajuak kiro-kiro Baru tibo nyo lah senyum. Dibaok duduak di ruang tangah. Langsuang dibuekkan aia minum. Dibukak kato jo bismillah. Mako fahamlah Buyuang kini. Awal mulo tasangkuik hati. Dulu kutiko Buyuang baru kamari. Inyo qiraah subuah hari. Uci mandanga dari subalah. Di baliak dindiang rumah. Kebetulan nginap di situ lah. Pak Soleh tu mamak tu mah. Qiraah pagi jadi kabiasaan. Kadang salaman kadang duo. Indak disangko ado nan mandangakan. Tembus ka hati biliak jantuangnyo. BUYUANG PANTUN Dinda Uci janyo denai. Badan barangkek lah dahulu. Raso dapek kato sasuai. Baliak dari kampauang kito batamu.... Hari nan sadang tangah hari. Bus ALS panuah pasisia. Taraso langang di nan rami. Wajah teduh, salamaik tingga... Mandaki oto ka kota Curup. Lagu Batak puta- baputa. Bapak mandeh, sarupokokoh hidup. Sai horas jala gabe ma hita,... Baa kok bak cando iko. Bapisah mako nyo tabayang. Bus mandaki dalam rimbo. Bengkulu Pikumbuah tenggang manenggang. Lah hampia ko Lubuaklinggau. Oto baranti di rumah makan. Makanan paragiah Uci maimbau-imbau. Lapek daun luwo katan. Diisi paruik dulu dih Tuan🙏🙏 BUYUANG PANTUN Siti Aisah namo panjangnyo. Tapi Uci sajo baimbaukan. Tamaik SMEA nyo lah karajo. Ka pak Soleh ijazah batitipkan. Dikana-kana baliak ka nan sudah. Waktu pertemuan istri arisan ramai. Uci sibuk maurus juadah. Sarato bakameh acara salasai. "Makan jo apo Da?" Rang restoran manyapo Buyuang. Eh sadang indak di badan pangana. Capek Buyuang mamasan tunjang. Makan sudah sumbayang sudah. Di bangku tangah Buyuang tapurangah. Sabanta bajalan kantuak baulah. Mato tapejam mimpi indah... Singkek carito lah sampai badan. Di Pikumbuah kampuang kasayangan. Buyuang maimbau dari halaman. Apak jo Ibu tasentak, bahamburan. Onde anak den...! BUYUANG PANTUN Sabana sajuak tingga di rumah ibu. Tabek janiah sawahnyo hijau. Tabayang maso ketek dahulu. Main, makan, lalok, tiado risau.... Duduak di dapua emper jendela. Mangawani ibu mamasak nasi. Ditumpahkan raso sado takana. Plong, pueh sanang hati. Buruang balam di dahan karambia. Buruang tingalau di dahan surian. Nasi masak diabuih aia. Maco jo rubik di lado kan. Akhianyo sampai juo curito. Tantang rencana kawan iduik. Kamanakan apak ang lai ado. Kawan pangajian ibu ado pulo manyabuik. Mintak tenggang Buyuang daulu. Sabab di kantua ado lo nan katuju. Kurenahnyo lai mirip-mirip ibu. Saulah indak banyak bumbu. Dek kami dima waang ka sanang nak. Sabab waang nan ka mamakai. Rajin karajo pandai mamasak. Sumbayang rajin mangaji pandai.. Lai sajuak ati Buyuang. Raso berkah pulang kampuang. Oleh-oleh sadonyo alah takaruang. Anak mandeh lai bak cando singguluang. BUYUANG PANTUN Ramo-ramo si kumbang janti. Katik Endah pulang ba kudo. Raso lah di Bengkulu pulo hati. Karicih Putra Rafflesia dibali beko. Rang Bujang ka Bukiktinggi. Mambali tiket baliak ka rantau. Dibali sanjai karupuak ubi. Diulang makan nasi kapau. Saminggu libur di kampuang. Kini babaliak hanyo lai. Tingga apak jo mandeh kanduang. Suratan nasib anak jalani. Manurun jalan ka Singkarak. Lapeh nan dari Padang Panjang. Doa dibaco ampun dipintak. Bakeh Tuhan Nan Maha Panyayang. Belok babelok jalan oto. Cingkariak duduak blakang jo muko. Pasisia panuah di dalamnyo. Dari nan gaek, sarato mudo. Bus marapek di Gunuang Medan. Rami urang turun makan. Dek untuang takadia Tuhan. Ado saluang di emperan. Sato manonton Buyuang ...yo Tuan🙏 BUYUANG PANTUN Sapartigo malam di ujuang. Dingin taraso ka dalam oto. Sopir malambek habis manikuang. Lalu nyo ma rem baranti pulo. Lah tibo malah di Curup. Kenek oto maimbau makan. Pasisia takalok jendela tertutup. Kantuak dilawan diluruihkan badan. Samba ikan goreng balado. Ado ayam sarato randang. Tangah malamko indak tabik salero. Nan lamaktu lalok gadang. Indak lamo sasudah makan. Bus barangkek malanjuikkan jalan. Pasisia taoleng kiri kanan. Kepahiang jalannyo babelok tajam. Pagi subuah masuak kota. Bengkulu, denai lah tibo. Turun manumpang nak karaia. Sudahtu sumbayang subuah pulo. Sanang hatinyo pak Soleh. Dapek sanjai sarato batiah. Iko pak, sakadar oleh-oleh. Pitando silaturahmi hati nan putiah. Disambuang lalok saketek lai yo Tuan....🙏 BUYUANG PANTUN Antah diagiah tau mamaknyo. Antah dek ado kontak batin. Manjalang zuhur "inyo" lah tibo. Mambaok nasi jo sampadeh patin. Awak nan baru jago lalok. Masih tasiso bau oto. Capek mandi dibasuah cotok. Sudahtu dipakai baju biru tuo. Tuan jo uni janyo denai. Agak barubah romannyo tacaliak. Tambah dalam ati takanai. Kawin sajolah kito lai Piak! "Lai salamai sajo Uda di jalan?" Baitu kato nan nyo tanyokan. Buyuang maangguak gemuruh ditahankan. "Ibu jo Apak sehat sajo kan?" Ikan patin bawang tarapuang. Makan siang batunggukan. Raso hilang kecerdasan Buyuang. Raso tabayang Uci lah di palaminan. Nde, tambah rancak dipandang..😁🙏 BUYUANG PANTUN Antah dek abih jago lalok. Antak dek memang paruik lapa. Abih nasi suok demi suok. Tulang patin sajo nan tingga. Kadang iyo basarobok pandang. Raso manyangek ka dalam dado. Tapi awak kan lai mangaji sumbayang. Ado pituah nan kadijago. Tapi samantangpun baitu. Nasehat lamo kan ado pulo. Jan tasalah langkah dahulu. Alah biso dek biaso! Mako dipintak nasehat pak Soleh. Tigo hari sasudah itu. Karajo elok dipagageh. Kato sapatah subana katuju. Kami lah mambaco garak jo garik. Mandeh si Uci lah satuju pulo. Cari wukatu nan indak sampik. Ditamui ibu jo apak rangmudo.... Tuak Mongguang mambali badia. Tabali badia pacah. Dek untuang jo takadia. Dapek bini Siti Aisah... Baitu singkek carito Uni, Uda..🙏 BUYUANG PANTUN Sajak Buyuang iduik baduo. Dapek rumah di komplek kantua. Disitulah iduik bajuang basamo. Kadang terjal, kadang lai data. Sakali-sakali main ka Jakarta. Maurus rumah di Jaksel. Duo tahun, batambah anggota. Anak padosi sabana comel. Limo tahun dapek pulo bayi. Nan kaduo ko laki-laki. Lah sapasang anak kini. Ibunyo lai rajin maaja sumbayang mangaji. Dek lai tatap syukur nikmat. Ibu anak-anak amuah iduik sederhana. Rajin manabuang pandai bahemat. Lah sukses pendidikan paja. Nan tuo sarjana kehutanan. Kuliah di Bengkulu. Kini alah pulo mapan. Di Biotrop nasib bapadu. Adiaknyo marantau jauah. Etan ka ranah Sulawesi. Karajo di dinkes Buton Tengah. Nan bungsuko pendiam sarupo Uci. Kini Buyuang manikmati pensiun sajo. Di Jakarta Selatan...🙏 *BUYUANG PANTUN* Pagi Sabtu Buyuang Pantun indak ado acara. Pansiun dari BUMN Karya. Indak eselon tinggi bana. Hanyo pegawai karoco saja... Buyuang duduak di kurisi. Mancakah mairuik kopi pagi. Sambia manonton televisi. Tantang Joshua, capres dam G twenty... Ditengok pulo di layar hape. Urang kayo tanahnyo gede. Luas DKI hanyo saparampek sae. Nagari lawehko, nyo bagi bak kue. Dicaliak ka badan diri. Dulu manganggur indak bapiti. Ka Jakarta untuang dicari. Karajo sarabutan manjadi kuli. Tiok pagi makan bakwan. Jo Paijo Satiman badan bakawan. Bangunan tinggi sampai ka awan. Di sinan untuang bagadaikan... "Srrrrp....." dihiruik kopi dulu yo kawan...😁🙏