IMEL
Oleh: Hanifa Marisa
Ujang yo
mangalah ajo eah nyeah. Ka -pulo mambuek masalah pek kampuang awak geah. Malu
malah awak. Tapi preman loket geah tambah mangalah, tambah indak batarotik
takah eah. "Ka ma Uda, sabuiklah! Kami nan maatur siko!" nyeah. Dek indak
katuju basiraruak, Ujang golak ketek ajo. "Ndaak, wak poi ka musola ten
ha, wak lun sambayang lai..."nyeah. Diusaokannyo juo senyum ramah. Tapi
preman loket keah tambah sakik ati eah dibituan. "Kama ang?
Bajaleh-jalehlah! Kok ka Solok, naiak oto Uda ko ha, kok ka Pakanbaru, sinan!
Jan bantuak padusi se gaya ang tu!" Mulai cingkaneh kecek nan kalua. Tapi,
Uajng kan lah mangaroti tabiat urang loket oto. Kasa! "Bialah wak cari se
sorang biko sanak....wak istirahat sabanta dulu,..."Ujang ba baso-basi, ba
elok-elok. "Pant..mandeh ang! Anak baruak ang? Pakak! Karambie mayai ang
yo?!" preman tangguang reah mandokek ma alangi jalan Ujang. Tu, tapaso
bapandangi bona incek mato e reah lai ! Dek lah basobuk bagai mayai awak
karambie! Tu, sakik ka dalam jantuang reah sanak! "Baelok-elok sajolah
mangecek. Wak baru pulang, badan sadang latiah na baru. Alun mancari oto wak
lai. Sambayang bagai alun gai lai do.!" mulai agak kareh tekanan suaro
Ujang. "E, lai malawan ang kapunduang?! Lun tau ang sia den lai?"
Mulai agak iruak dimuko oto reah. Kawan preman tu lah tibo pulo sorang lai.
"A keceknyo Tiang?" tanyonyo. "Iko ha! Paja karapai ko ha. Nyo
sangko sia waden ko?! Indak ba bapak laie ang yo?!" harieknyo ka Ujang, jo
incek mato tabudua!.... Tu iyo lah basalemak peak kecek nan kalua namo e reah!
Iyo taontok Ujang sakali geah. Awak pulang kan dek sayang jo kampuang? Ntu, ba
dek ajak iko nan tibo? Mailak ajolah! Mancari panyakik ajo meah! Baru ka
malangkah, kalepak baju Ujang lah dibensoan nyeah! Tu, iyo abih sumbek ati lai
reah! Lah basobea-sobea ajak cako, bazalimi juio toruh! Ujang lansuang
mambaliek badan, "Klapak!!!" kaki masuak ka dado paja reah! Lansuang
tajangkang ka lakang! Tigo dopo.....!! "Bukkk!!" kaki Ujang tibo pulo
pek karampang kawannyo nan sorang lai, sobab cako kawan e reah lah manggarik
pulo ka manolong! Balingkuk-an kaduoan nyeah!!
Sabolun
kaduoan nyeah togak, Ujang lah maelo kobek pinggang eah. Bosi putieh pek ujuang
kulik reah manggantuang babuai-buai. "Den ndak mancari musuah reah sanak.
tapi kok pek itu tibo eah; majulah! Jan manyosa kok bongkak-bongkak kapalo
!" Ujang mangcek jo suaro borek. Ilang rangkik-rangkik badan eah, nengok
parangai pareman keah!
"Priiit!!"
polisi loket tibo kiun. Preman baduo reah lansuang babaliek badan. Ajak-ajak
indak tau! Urang nan manengok, samo salieng pandang. Sudahtu bubar! E olah
jeah!
Lah taluu,
Ujang tibo pek mudiek. Urang baru baliek dari masojik. ado nan jo keta angin,
ado nan bajalan kaki. Oji Sami, jo onda bebek 70...
Tiko
mancoguk pek umah, basinar-sinar oman ibu eah. Sonang bona ati eah. Pulang anak
bujang eah!.....Ujang lansuang sujuk ka ibu eah. Dilamo-lamoan nyo salam ka
kaki ibu eah. Ndee,...abih ponek badan pek di ateh oto, duo malam geah!
"Lai salamat ajo ang pek jalan. Puku bara barangkek dari pek eten? Pajak
ang ca nan manjago? " batirik-tirik tanyo ibu eah.
Pagi-pagi
Ujang lah necis. Niat utamo pulang kampuang, kan taragak mangecek jo Imel.....
Baa lah nan ancak geah; ka datang ka umah eah pagi ko, atau ka sikola tompek
inyo maaja, atau dinanti baliek sikola? Kalimat-kalimat nan lah basiap-an jak
dari pek eten, lah bakona-kona juo......"Mel, iyo ka Imel juo ati wak
jatuah ..." atau "Ka umah juo wak balabuah Mel, ...." atau
"Taragak wak ajak nan dulu Mel, tiko wak ketek-ketek. " Ndee, .....
Dek indak
tolok manahan ati, bajalang juo ka sikola ten. Murik lah masuak, sadang baraja.
Ancak ka kantin langkah dikelok-an. Ha, lai ado goreng pisang, roti, kue,
raga-raga bagai. Ado pak guru sadang minum pulo takah eah baduo. Nan ciek
tinggih godang, nan ciek kuruh lujua. Lomak bona carito eah takah nyo.
"Masuaklah,
jo a ka makan? Lontong? Gado-gado?" amak kantin lansuang batanyo. Ujang
mancocahan panggua eah pek bangku. Nengok apak-apak guru bolah keen sadang
minum kopi, taragak pulo Ujang mintak kopi. "Kopi susu lai ado Ni?"
nyeah. "Lai. Nanti bonta dih, wak buek-an.." Ujang mamparatian ka
arah lokal. Bolah ka ma lah Imel ma aja? Kok lai pek kantua eah? Ba dek
dobok-dobok ajo dado den geah,...nyeah dalam ati! Apak-apak guru basaragam
mamandang sabontea ka Ujang, sudah tu nyo toruh juo bacarito. Kadang-kadang
takekeh. Bau asok okok eah orun bona dibao angin.....
"Lontong
ado Diek. Lai ka makan lontong kuah?" Uni Kantin batanyo sambie malotak-an
kopi susu. "Olah reah minum ajol Ni..." Ujang manjawek. "Maurus
sikola anak kaiko? Lun pernah nampak dek Uni lai.." Uni Kantin manyalidik.
"Ndak eah. wak lamo ndak di umah , wak lai ughang mudiek geah juo."
Ujang manjoob. "Anak Sidar den Ni..." tambah Ujang. "E yayai,
nan tuo geah, nan tongah ?" Uni reah takojuk. "Nan tongah."
jawek Ujang. "Eee, nan ba pajak pek pulau saborang? Bilo tibo? Ba dek lai
singgah ka pajak Uni geah?" Ha, tu iyo malu ati Ujang manjoob tanyo Uni
geah reah. Ka dikatokan baso wak taragak jo Imel tu? Ngggg...nggg....nggg.......
Kopi susu lah
tingga satangah. Suduk mato mamandang arah ka sikolah. Sakali-sakali, murik
kaluea ba baju putiah. Ka ma lah inyo kok lah? Ka toilet atau poi mamboli
paragat baraja? Angin lombuk ba ombuh dari lakang mah sikola. Daun batang kayu
nampak baguyang-guyang,...sojuak. Tapi, dado Ujang, ndak sojuak tio deah. Agak
eboh pek dalam! Mananti, Amelia Wati, lai takona juo den dek kau lai.......?
Padusi
rancak bakaruduang kalua dari lokal bolah suok. Jalan lenggak lenggok. Baju
putieh karuduang putieh. Oman eah ajak barasieh. Ontah sojuak ontahnyo senyum.
Ajak tarintang sado masalah pek ati. Ilang sado nan taimpik. Raso tabukak pintu
dunie...oi lah! Ba dek batambah rancak kau diek....Bataun-taun nan lalu, kau
gadih ketek pagorah, olun sakamek iko bona lai.....
Pak Guru nan
godang tinggih mangode ka nan kuruh lujua. Sudah tu, nyo golak-golak baduo. Ta
kangkang-kangkang. "Sertifikasi kan lah kalua! Ditambah pariuak ciek lai
ndak baa tu do!" kato nan sorang. "Kok ajak itu roman eah, indak
sertfikasi, di usaoan juo ha ha ha..." nan ciek lai maningkah. Sudahtu nyo
golak baliek, takekeh-kekeh. Ujang, lah ajak taimpik ajo galombang eah.
Ee,...lai parotian pulo guru-guru nan senior geah jo nan baru tu? A nyinyo
cako? Sertifikasi? Istilah a pulo reah? Samo jo 'partisipasi'? Ba dek tobik
cimburu Ujang eah? Disiramanlah siso kopi susu nan satangah galeh keah ka urang
baduo reah?
Sadang
batingkah parasaan, Imel lah lucuk ka dalam kantua. Di kojea lah kiun? Kok iyo
lai bagak serius, a pulo nan kaditakuk-an? Ujang lansuang togak! Ee, tapi lai
indak ka mambuek malu ajo biko? Kok rami bagai urang dalam kantua reah? Aso-aso
kadigonggaman ajo tangan eah sakali! Hep! Wak ndak katuju jo pilem India reah!
Jan lai!!!!
Tapi ati nan
bakatuncak nyak, baa mangomohi nyeah? O dusanak sadoannyo, baa
mangomohinyooooo...? Batanyo Ujang nyak setek, ba'a lah lai ko?
Sadang jak
itu, Imel kaluea baliek dari kantua, sambie manjinjieng tape- kompo. Ha, ka
malatieh logu eah pek dalam lokal? Sumringah! Karuduang putieh! Oman jonieh!
"Kopiti Uni ah Ni, kopi susu sagaleh!" Ujang copek mambaie balanjo;
sudah tu nyo lah maloncek kaluea, .... "Imel,...Mel!
Tagalenjek
Imel dek baimbau sambie balari . Sia iko ko? Onde mak, da Ujang? Yo bona inyo!
Yo bona da Ujang!!! Ampie talopeh tip-kompo nan bajinjieng nyak Uda oii.... Ba
dek ajak barasian kami, Uda datang takojuk? Pek laman mahsikola pulo
lai?!
"Mel..."
Ujang lun abih sosak ongok eah lai.
"Da..."
Imel indak pulo tontu nan kadisobuk e reah.
"Mel,.."
taimbau juo sakali lai.
"Uda..."
tajawek pulo saulang lai. Ndeh mak!
Untuanglah
Imel copek manguasoi parasaan.Astagfirullah, iko kan pek laman mahsikola geah?
Banyak mato silang pintang dari suduk lokal jo pajak kantin ten ha! Kalobiehan
Imel kan pek itu pulo; pandai mambaoan badan!
"Da,
bilo Uda tibo?"
"Potang
sonjo." Ujang lah kondua pulo gorik eah. Lah ondo pulo gadebak-gadebuk
jantuang eah.
"Imel
taragak na mangecek jo Uda. Imel sadang maaja. Nantian Imel sabontea lai dih
Da. Togak Uda pek kantin atau pek pajak ampieng gerbang ten dih. ...."
"Adih,..adih,
adih Mel!" Ujang jak konai hipnotis ajo. Maongguak-ongguak. Bubuh
pertahanan 'ati' eah nengok oman sa ancak iko ha.
Jak itu juo
lah ajak dari ketek. Kotu kenek-kenek dulu, samo mancari polam pek ampieng
tobieng, jak itu pulo. Awak ba baju kumuah, Imel bakobek obuak eah jo kojai.
Kan ado polam cik-kudoh pek lakang umah tek Suma. Kok dapek polam dek Ujang
dulu, lansuang dimintak eah dek Imel. "Mintak Da!" nyeah. Ntu, lah
ngalah ajo Ujang. Tapi lai dapek juo sa kiuh-duo kiuh. Ganti-ganti!
Kini, ajak
itu pulo baliek. Nantian Imel da!, nyeah cako. Ujang lah ngalah ajo.... Weh,
UJang; ensuk lah langkah kaki reah! Jan dipandangi juo Imel masuak ka pintu
lokal!
Imel masuak
ka lokal. Anak murik lah antusias nengok Bu Guru ancak reah mambao tape
recorder. "Logu Hetty Koes Endang buuu..." nyeah nan murik duduak
palieng blakang. Imel senyum ajo. "Cubo kalian dongea an lagu nan ibu
putea ko,...klek! Do re mi fa sooool mi doooo...." "Ha, rancak kan?
Kompak suaronyo. Indak pocah do. Cubo nan padusi suaro satu, nan laki-laki
suaro duo! Satu, dua ti...ga!"
"Do re
mi fa sooool mi dooo...." "Bagus! Cubo, Ujang, pimpin kawan-kawan
togak di muko kelas,......baraja jadi derijend!" Anak murik salieng
pandang! Ujang? Ujang ma makosuk bu Imel geah? "Ujang ma bu?" murik
nan pek muko batanyo heran. "Eh, maaf, maaf! Rizal, cubo Rizal,
mamimpin..." Lah kasaleo lidah wak, Imel golak sorang dalam ati, bacampua
jo malu, tapi disuruakkannyo jauah-jauah! Sobab , memang indak ado murik nan
banamo Ujang doooo......ndeh tuan!
Ten, pek
pajak ampieng gerbang, Ujang togak mananti. Ponek togak, nyo basandea ka
tunggak. Dibujuak-bujuak eah hati, supayo sobea. Tiok sabontea bapandangi jam
tangan. Nan sakali geah, bapihaklah ka parasaan den, jarum jam! Jan lambek bona
pindah dari pukua sambilan ka pukua sapuluah...... Pukua sapuluah kurang
sapuluah minik, dado lah agak copek dotak eah. sabontea lai! Iyo, sabontea lai!
Guru piket,
guru sikola, atau tata usaha, atau sia ajolah nan batugeh mangguguah lonceang;
guguahlah lonceng kaluea main kini juo! Kurang-kurang saminik duo minik, moohan
ajolah...yobona badoa deen!
"Teeeeettt..."
Ha, tando kaluea main! Srrrr...!!! Dak-dik-duk. dak-dik-duk!! Mel, lah den cubo
mancaghi nan lain, tapi indak ado nan ajak Imel deah,...di apal-apal kalimat
nan kadikecek-an. Dak-dik-duk. Dak-dik-duk!
Lah tibo
Ujang jo bu Imel pek pajak sate. Lah ba pilieh bangku bolah ka lakang, pek
dalam. Lah ba posan sate duo pinggan. Tapi Imel mintak satangah pinggan ajolah,
nyeah. Poruk wak sketek isi eah, nyeah.
Tapi, kok
pek dalam, kok pek muko, samo ajo rancak eah oman Imel nyo. Parumahan data!
Konai cahayo, coga. Agak talindok, kamek. Cahayo mato e reah nan mambuek wak
oliek! Yobona oliek!!
"Lah
dicubo mancaghi nan lain, ndak ado nan ajak Imel reah"...lah hapal bona
luea kapalo kan? Sabontea lai di kecek-an bona kinyo! Tasorah ka Nan Kuaso lah,
baa ka jadinyo. Kok lai, alhamdulillah, kok indak, alhamdulillah juo. Hah?
Yobona alhamdulillah kok indak tu? Atau Allahuakbar! Ntahlah sanak oi...
"Sonang
ati ibu jo apa Uda, Uda lai pulang gak nye reah ieh.." Imel juo nan dulu
mangecek. Nyo duduak pas pek muko Ujang bona, pek kurisi bolah kiun. "Iyo.
Alhamdulillah, liau lai siat-siat ajo." Ujang manimpali. Kalimat nan ba
hafal cako lai takona juo kan? Jan sampai lupo!
"Kan
lai maju toko Uda pek eten? Lah lamo bona aso eah Uda indak pulang..."
Imel mangecek baliek. Ujang golak ketek.
"Maju
sakadar eah. Malah lai ba usao awak, kok lai di agieh eah jalan dek Tuhan. Iyo
lah lobieh limo taun wak ndak pulang gak nyo....sajak Imel masih smp juo dulu
lai kan?"
"Ho-oh.
Sajak wak digolak-golak-an urang bapacaran kan? Sampai ado kawan nan usil
manulih pek buku catatan PMP Imel, pek kulik lakang eah, Imel = Ujang. Hi hi
hi...konai bongih Mel dek guru." Susana tambah caie. Ujang lah agak tobik
bagak eah. A garan kalimat nan lah hafal cako?
"He
he. Kini lah jadi guru, indak ado urang ka bongih lai kan?" Ujang masuak
sa kaki.
Imel ta
ontok. Manakua sabontea, sudahtu dipandangin nyo Ujang. Ajak ado nan tasompa
pek dalam!
"Da,....
Imel lah batando bulan nan lopeh...." taloncek kato kadian.
Giliran
Ujang pulo nan tagalenjek. Lah ba tando? Ntu, tingga barolek ajo lai reah? Jo
ca?
"Jo ca
Mel ka balaki Mel. ....." suaro Ujang agak parau. Sate sapinggan ajak
barubah ajo raso eah. Ilang ajo manyih poi sambayang tarowieh samo-samo dulu
tu? Abih ajo rancak main olek-olek-an pek bawah kopuak kotu ketek? Tapi den nan
ka laki kau dulu kotu basuntieng jo bungo rimbang-rimbang sirah pek obuak
ampieng talingo kau?
"Da
Fadli nan pek ampieng tanah lapang, anak pak Syamsie, lai takona dek Uda?"
Ujang ajak
bapikie, mangona-ngona. Limo taun tuo Fadli reah dari den...lah tuo reah?
"Lai,
nan sikola farmasi pek Padang dulu kan?"
"Iyo,
kini nyo bagian kesehatan pertamina Pokanbaru. Tibo mamak jo pangulu eah ka
rumah, ntu satuju ajo ama jo apa sakali."
Oning
sabontea. Indak ado sendok jo lidih sate nan manggarik do. Sosak ongok, tapi
ndak talopehan do. Ko kabua kaji namo e keah!
Mato rancak
Imel, lah ajak jauah ajo. Jauah...jauah bonaaa......
"Mel.
Indak awak nan barasoki jo Imel reah ieh..."taloncek ajo kecek Ujang. Cayah
ajo nada eah. Pasrah.
"Ditanyoi
ama ka Mel njalang kabatarimo dulu. Lah ado dek kau nan katuju....Ontok ajo
Mel. Takona dek Mel, Uda. Tapi Uda indak ado batingga kato..."Imel
tasondek rangkuangan nyo. Nyo lah manakua. Bulu mato eah tasusun rapi, itam. Ujang
ajak anak ayam disambea olang ajo. Lamo pulo baontok-ontok. Sate lah
dingin........... Indak sate ajo nan dingin do; hati bagai. Nde mak!
"Sabonea
eah,....sabonea eah...." Ujang gagok.
Imel
mananti. Mamandang. Nde, rancak eah mato kau lai.....
"Sabonea
eah, Uda pulang dek taragak jo Imel. Takona-kona juo main olek-olek-an kotu
ketek......Dulu, togak Uda olun kokoh raso eah lai, pajak manyewo juo baru.
Sajak tigo bulan nan lopeh, bacubo togak sorang. " Ujang baronti. A garan
kalimat nan lah bahapal cako? Ba dek lah ilang ajo pangona?
"Tapi
kok jak itu kajadiannyo, ndak baa te reah. Lah rancak pulo reah Uda doa an Mel
bahagia, baranak cucu..." Ujang ba-juang untuak tegar. Pek luea, onda lalu
koncang-koncang. Kadang madok ilie, kadang madok mudiek. Sakali-sakali oto pulo
nan lewat. Silang pintang. Samo jo silang pintang parasaan pek dalam nyak, o
kanduang oiii.
Bu Amelia
Wati, nan sumringah, ceria, rancak coga; kini ajak taungguak ajo pek kurisi
muko. Ndak obeh nan kadikecek-an lai!
****
Duo rai sudah
itu, lah balipek pulo baju dek Ujang. lah basompa-an ka dalam tas. Ibu eah lah
ontok ajo. Nyo tau dari carito pek pajak, Ujang makan sate jo Imel anak bu
Yani, nyeah nan urang. Padahal , Imel lah batando bulan nan lalu. Lai taraso
dek ibu ati ang Yuang!.........................
Pek loket
Kiktinggih, basobok pulo jo paja nan konai sipak tigo ari nan lalu. Cutiang!
Lah ka di irik eah pulo tas Ujang. Ujang lansuang ta onti! Cutieng mamandang!
Eh, iko nan tigo ari lopeh manyipak awak kan?
"Ba
kondak ang kini? Ati den sadang ndak lomak nyak! Kok ba-abih bona sampai mati,
mnalah wak cari tompek nan longang! "Ujang lah songa!
Cutieng geah
nengok mato Ujang lah sirah, ajak ndak lolok duo malam; lah kenyuk ajo nyali
eah. "Ndak Da. Wak mancari makan sajo..."nyeah. Ntu lah basuruk ajo
eah,...cigin!
Oto ANS ba
ensuk lambek-lambek kaluea dari loket. Ujang taduduak pek bolah lakang. Boto
aqua (aie mineral) lah abih saparo isi eah. Lopek batungkuh jo daun pisang
porak mudiek, tagayuk dalam kantong asoy, pek sandaran kursi . Mato balayangkan
ka luea. Ujan ronyai! Kaco bolah kida, lah bintiek-bintiek dek titiek aie.
Masin oto malonguah-longuah ketek, mandaki Padang Lua. Ten, jauah pek dalam
lubuak ati, lah ronyai pulo hari. Titieknyo ka suduk pipih
