Lang-Olang

 LANG-OLANG

Hanifa Marisa

Nyampang golop tangoran birunguk.

Jan batanyo dalam ati. Itu lang-olang donguk-donguk. Tobang tinggih di malamhari

Bangkalai godang tukuknyo gagah. Bacampua biru, kunyieng jo sirah. Barompek kawan mamapah. Rami penonton tangah sawah.

Urang nan baru manyabik padi. Panen raya di taun kini. Tuo mudo lai sadang bapiti. Dilopeh malah kondak ati.

Diosong lang-olang ka ilia. Disuruah kawan mauwakkan. Dielo tali godang bagilia. Lang-olang saborek kambieng karuban.

Lah naiek lang-olang kateh. Lansuang babunyi donguk-donguknyo. Tampilannyo yobona segeh. Ramilah urang mamujinyo.

"Nguuung...ngooong....nguuung....ngooong..."

Buyuang Mipih taragak soto. Bacari porieng ka bingkainyo. Tapi baalah mangatokannyo. Lang-olang togok, tobang tio.

Ibo apaknyo mamandangi. Dibuekkan lang-olang ketek. Lang-olang maco tukuk baragi. Dirokek-an ikua agak ciek.

Rami urang tongah sawah. Soto pulo Buyuang maunggah. Lang-olang maco  putieh sirah. Buyuang senyum golak sumringah.

Bajalan pindah ka sawah ilia. Arah ka baruah Banuampu. Tianlah ketek usah dicibia. Lai togak tali punyo anak-ibu.

Boluk

 BOLUK

Hanifa Marisa

Sonjo manyungkuk baruah kampuang. Cahayo sirah di bukik Andiang. Urang bajalan boban di pungguang. Lukah boluk barisi caciang.

Di rasau jalan dari mudiak. Lanteh ka baruah bateh ilia. Ditanam lukah baiak-baiak. Sambia bado'a ka Nan Mulia.

Ditandoi jo umpuk soruk. Dietong langkah kelok pamatang. Sakik iduk usah disobuk. Dapek rasoki pambaia utang.

Lidih bakanyam jo kulik rotan. Umpan batungkuh daun taleh. Samati kaji dapek makan. Uang sikola paja lai lopeh.

Buyuang Mipih balain caro. Kayie bapauk jo tali panjang. Basuruang umpan caciang gilo. Ditusuakkan ka lubang pamatang.

Dinanti sajam duo jam. Sambia maota-ota ketek. Sudahtu dipareso nilon umpan. Kok lai manjujuk orek-orek.

Urang mambangkik lukah pagi. Buyuang manjinjiang embe ponuah. Nyampang dek lai barasoki. Manggalinjang boluk golak tumbuah.

Lain pulo parangai kawan. Nyo cucuakkan caciang lidih sondek. Lidih mudo karambia pirauan. Bagili-gili ka lubang tobek 

Nyampang dicongap boluk godang. Instink disentak ka bulakang. Boluk manjalea ateh pamatang. Lansuang diompok jo mumbang godang!

Labu Tanam

 LABU TANAM

Hari Komih kutiko itu. Sadangnyo bunta bayang-bayang. Tuk Sidi baronti mangguntiang dulu. SurauKorieng maimbau sumbayang.

Tuk Lieh Pokieh namo kawannyo. Lah tangoran obang taluhua. Disimpan guntieng jo sikektuo, baitu pulo pisau cukua.

Sudah sambayang litak poruk. Digantieh keta ka Pitopang. Ditengok pintu muko batutuk. Lalu babelok ka pintu balakang.

Disandea keta ka tunggak kopuak. Dielo langkah ka anak jonjang. Dikode Yai-Maah jo suaro batuak. Tando laki olah datang.

Katongah samba ikan baguak. Samba lado jo pucuak ubi. Nasi putiah lansuang disonduak. Dianyang-anyak nasi jo jari.

Sadang lomak Tuk Sidi makan. Tangoran badontang ateh atok. Iyo malah turun ujan. Ibarat tatunda kojo dikakok.

"O rang rumah, nompang batoduah ..."

Tangoran suaro dari laman. Buyuang Mipih togak kapalo manjanguah. Urang Tuo togak mamaguk badan.

Ditanyo TukSidi malah inyo. Dari ma andak ka maa. Liou golak giginyo lah tangga. Andak ka pulang ka Tolang Maua.

Tolang Maua?

Itu nagori jauah bona.

Malinteh Jopang nan jo Mungka.

Babelok pulo kito ka kida.

Urang tuo gigi lah tangga. Bajo jo sarowa tampak lusuah. Usah badingin biko bagawa. Molah naiak samo mamupuah.

Ditariakkan pinggan disuruah makan. Lai omuah baliau kironyo. Sajak itu jadi bakawan. Kadang sangajo singgah mambao.

Buyuang maimbau baliau Tuk Tolang. Sobab inyo barasa dari situ. Badannyo ketek atinyo lapang. Kadang nyo singgah batamu.

Iko nan paliang takona dek Buyuang. Tuk Tolang maagiah labu tanam. Labu balubang bisa dituyuang. Pambao aia jiko poi bajalan.

Indak ado urang di sekitar iko. Nan manaruah labu saroman itu. Bawah bulek ateh bakapalo. Bontuaknyo yobona katuju.

Indak disangko sirao-rao. Unggeh pipik mamakan padi. Indak disangko Tuk Tolang nangko. Pandai pulo maota kaji.

Kadang nyo singgah kadang indak. Tolang Maua ka Limbonang. Sajauah itu baliau manapak. Mancari rasoki untuak nak-urang.

Bagai-bagai nan liau bao. Kadang ubi kadang pisang. Tajuwa hasia sado nan ado. Lah siang babaliak pulang.

Sampai akhirnyo ndak ado kobea. Mungkin baliau lah tiadoh. Tapi labutanam masih tahampea. Di lamari lakang garejoh.

Cekuh Sonduak

 CEKUH SONDUAK

Hanifa Marisa

Hari Komih kutiko itu. Sadangnyo bunta si bayang-bayang. Manuruk Buyuang nan jo ibu. Ka pokan salosai sumbayang.

Rami urang topi jalan. Ado nan poi ado nan pulang. Remaja bairiang bakucindan. Nan tuo golak manjujuang kibang.

Rami urang di tongah pokan. Kalua pakaian barono-rono. Kudo bendi usah diiriangkan. Kok manyipak bisa tabedo.

Lah bakaliliang ken kaniak. Ponuah kombuk dek pamboli. Di nan rami payah baranjak. Elok-elok kok tapijak jari kaki.

Dielo langkah ka los cindua. Kain panutuk sakaliliang. Bangku kayu usah maunjua. Mintaklah nankatuju, jan manamiang.

"Aa dek akak, cindua atau estebak?"

Batanyo panggaleh bakeh ibu. "Cindua lah pak. Itu bona nan katuju!"

Dirogoh galeh tinggih tak batalingo. Ditatiang jo tangan kida. Tangan suok mamogang sonduaknyo. Cindua dipindah sambia maota.

Ditambah pulo jo santan pakek. Lah ampia ponuah muncuang galeh. Tarakhir dituyuang tangguli saketek. Manyihnyo yobona segeh...!

Itu bona nan katuju dek Buyuang. Sonduak mancekuh bibia galeh. Tangoran bonyi badontuang. Tapi galeh indak tabokeh.

Ciri khas panjua cinduako. Jadi paratian Buyuang bona. Tiok maambiak, badontiang bunyinyo.

Buyuang mamandang terpesona.

"Kuh!" basewek topi galeh. Tando lah salosai sado menu. Yobona lopeh uweh-uweh.  Kadang omuah baronti manoguak dek manunggu.

"Kuh" tangoran sakali lai. Tando ado lai nan mamboli. Lah jadi rasio saponuah nagori. Cekuh Sonduak mancocah tangguli.

🙏🙏